UNICEF៖ កុមារ​ច្រើន​ជាងពាក់​កណ្តាល​នៅ​មីយ៉ាន់ម៉ា​រស់នៅក្នុ​ងភាពក្រីក្រ

អង្គការយូនីសេហ្វ មីយ៉ានម៉ា ​(UNICEF Myanmar) បានប្រកាសថា អសន្តិសុខស្បៀង និងកង្វះអាហារូបត្ថម្ភ ស្ថិតក្នុងកម្រិតគួរឱ្យព្រួយបារម្ភ នៅ​ក្នុងប្រទេសមីយ៉ាន់ម៉ា ខណៈមានកុមារចំនួន៥៥​ភាគរយរស់នៅក្នុងភាពក្រីក្រ។ ​យោង​​របាយការណ៍​អង្គការ​ UNICEF ​និង​​ការ​ចេញផ្សាយ​របស់​បណ្តាញ​សារព័ត៌មាន​មួយចំនួន។

យូនីសេហ្វ មីយ៉ាន់ម៉ា បាននិយាយថា ប្រទេសមីយ៉ាន់ម៉ាបាននឹងកំពុងប្រឈមមុខនឹងជម្លោះអស់រយៈពេល៤​ឆ្នាំមក ដោយ​ស្ថានភាពនេះបានធ្វើឱ្យកុមារស្លាប់ច្រើនជាងគេបំផុត ជាមួយនឹងអំពើហិង្សា ការផ្លាស់ទីលំនៅ និងការរំខានដល់សេវាសំខាន់ៗ ដូចជា សុខភាព និងការអប់រំ ដែលគំរាមកំហែងយ៉ាងធ្ងន់ធ្ងរដល់ការរស់រានមានជីវិត និងសុខុមាលភាពរបស់កុមារ។ ប្រហែលមួយភាគបីនៃអ្នកផ្លាស់ទីលំនៅទាំងនោះគឺជាកុមារ ដែលត្រូវបានបង្ខំឱ្យចេញពីផ្ទះ និងសហគមន៍របស់​ពួកគេ ហើយឥឡូវនេះកំពុងប្រឈមមុខនឹងអនាគតមិនច្បាស់លាស់។

សារព័ត៌មាន Viet Nam News នៅថ្ងៃទី១២ខែកុម្ភៈ បាន​លើក​ឡើង​ថា អសន្តិសុខស្បៀង និងកង្វះអាហារូបត្ថម្ភស្ថិតក្នុង​កម្រិតគួរឱ្យព្រួយបារម្ភ ដោយ​៥៥ភាគរយនៃកុមារក្នុងប្រទេសមីយ៉ាន់ម៉ារស់នៅក្នុងភាពក្រីក្រ គ្រួសារផ្លាស់ទីលំនៅជាច្រើនកំពុងជួបការលំបាកក្នុងការបំពេញតម្រូវការមូលដ្ឋាន ហើយកុមារពិការ និងគ្រួសាររបស់ពួកគេងាយរងគ្រោះបំផុត។

លើសពីនេះ ប្រព័ន្ធថែទាំសុខភាពសាធារណៈ ដែលត្រូវបានចុះខ្សោយដោយជំងឺរាតត្បាតកូវីដ១៩ ពេលនេះកំពុងរងការខូចខាតយ៉ាងធ្ងន់ធ្ងរដោយជម្លោះ អសន្តិសុខ និងការជម្លៀសបុគ្គលិកសុខាភិបាលយ៉ាងច្រើន ធ្វើឱ្យកុមារជាច្រើនមិនអាចទទួលបានការថែទាំសុខភាពសំខាន់ៗ។ កុមារជាងមួយលាននាក់ពុំបានទទួលថ្នាំបង្ការសំខាន់ៗ ធ្វើឱ្យប្រទេស​មីយ៉ាន់ម៉ាក្លាយជាប្រទេសមួយដែលមានចំនួនកុមារមិនបានចាក់វ៉ាក់សាំងច្រើនជាងគេនៅលើពិភពលោក។

យូនីសេហ្វ មីយ៉ាន់ម៉ា បាននិយាយថា កុមារជិត ៥ លាននាក់កំពុងបាត់បង់ការអប់រំ បាត់បង់ឱកាសសិក្សា និងប្រឈមមុខនឹងហានិភ័យធ្ងន់ធ្ងរ រួមទាំងការប្រើប្រាស់ជាពលកម្មកុមារ ការបង្ខំឱ្យរៀបការនៅវ័យក្មេង និងការកេងប្រវ័ញ្ច។ នៅឆ្នាំ ២០២៤ កុមារចំនួន៧៥០នាក់បានស្លាប់ ឬរងរបួសនៅក្នុងជម្លោះ ហើយចំនួននៅតែបន្តកើនឡើង។

បញ្ហាគួបផ្សំដូចជា ព្យុះស៊ីក្លូន Ragi ក្នុងឆ្នាំ២០២៤ បានប៉ះពាល់ដល់កុមារជាង៣០ម៉ឺននាក់ និងបានបំផ្លាញសាលារៀនជាច្រើន។ ជំរំជនភៀសខ្លួនដ៏ចង្អៀត និងសហគមន៍ដែលងាយរងគ្រោះកំពុងប្រឈមមុខនឹងជំងឺអាសន្នរោគឆ្លងពីទឹកធ្ងន់ធ្ងរ និងជីវភាពរស់នៅខ្វះខាតដ៏ធ្ងន់ធ្ងរ ជាមួយនឹងផលប៉ះពាល់ដែលរំពឹងថានឹងបន្តដល់ឆ្នាំ២០២៥។

មានតែ២៥ភាគរយនៃទឹកប្រាក់ដែលត្រូវការចំនួន២០៨លានដុល្លារអាមេរិកនៅឆ្នាំ២០២៤ប៉ុណ្ណោះ ដែលទទួលបាន ដែល​ធ្វើឱ្យកុមារជាច្រើនមិនអាចទទួលបានជំនួយសំខាន់ៗ។

នៅឆ្នាំ២០២៥នេះ យូនីសេហ្វត្រូវការប្រាក់ចំនួន២៨៦​លានដុល្លារ ដើម្បីផ្តល់សេវាសង្គ្រោះជីវិត និងសង្គ្រោះបន្ទាន់ដល់កុមារ និងគ្រួសារដែលងាយរងគ្រោះបំផុតចំនួន ៤.១លាននាក់នៅទូទាំងប្រទេសមីយ៉ាន់ម៉ា។ បើគ្មានមូលនិធិនេះទេ កុមារអាចប្រឈមមុខនឹងកង្វះអាហារូបត្ថម្ភ ការផ្ទុះឡើងនៃជំងឺ កង្វះទឹកស្អាត និងការបាត់បង់ការអប់រំបន្ថែមទៀត៕

អត្ថបទ៖ ប៊ុន សុភាព