ព័ត៌មានអន្ដរជាតិ

កូរ៉េខាងជើង ថ្កោលទោសផែនការហ្គាហ្សារបស់លោក ត្រាំ ថាជាទង្វើគួរឲ្យអស់សំណើច

បានផុស

២៣ វិនាទី មុន

នៅ

ថ្ងៃពុធ ១២ កុម្ភៈ ២០២៥

ដោយ

Chheang

ផែនការរបស់ប្រធានាធិបតីអាមេរិក លោក ដូណាល់ ត្រាំ ក្នុងការកាន់កាប់តំបន់ហ្គាហ្សា និងផ្លាស់ទីលំនៅរបស់ប្រជាជនប៉ាឡេស្ទីន ត្រូវបានរិះគន់ និងថ្កោលទោសដោយកូរ៉េខាងជើង ដែលនិយាយថា នេះគឺជារឿងគួរឲ្យអស់សំណើច និងបានចោទប្រកាន់អាមេរិកអំពីបទចាប់ជំរិត។

ជំនួបរវាងលោក គីម ជុងអ៊ុន មេដឹកនាំកូរ៉េខាងជើង និងលោក ដូណាល់ ត្រាំ ប្រធានាធិបតីអាមេរិក កាលពីឆ្នាំ២០១៩ (រូបថត៖ KCNA)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទីភ្នាក់ងារព័ត៌មានរដ្ឋកូរ៉េខាងជើង KCNA បានចុះផ្សាយនៅថ្ងៃពុធទី១២ខែកុម្ភៈឆ្នាំ២០២៥នេះថា ក្តីសង្ឃឹមតិចតួចរបស់ប៉ាឡេស្ទីនសម្រាប់សុវត្ថិភាព និងសន្តិភាព កំពុងត្រូវបានកម្ទេចដោយសំណើរបស់លោក ត្រាំ។

KCNA បានរៀបរាប់ថា៖ «ពិភពលោកឥឡូវកំពុងពុះកញ្ជ្រោលដូចឆ្នាំងបបរនៅក្បែរគ្រាប់បែកដែលប្រកាសដោយសហរដ្ឋអាមេរិក»។

ការអត្ថាធិប្បាយនេះ គឺសំដៅលើការប្រកាសដ៏គួរឲ្យភ្ញាក់ផ្អើលរបស់លោក ត្រាំ ដែលថា អាមេរិកមានបំណងដកអ្នកស្រុកហ្គាហ្សា និងផ្លាស់ប្តូរទឹកដីដែលរងការបំផ្លិចបំផ្លាញដោយសង្រ្គាមទៅជាអ្វីដែលប្រធានាធិបតីអាមេរិកបានចាត់ទុកជាតំបន់ «Riviera of Middle East»។

ការជម្លៀសខ្លួនរបស់ជនជាតិប៉ាឡេស្ទីននៅតំបន់ហ្គាហ្សា (រូបថត៖ Getty)

ការអត្ថាធិប្បាយរបស់ KCNA ក៏បានរិះគន់រដ្ឋបាលលោក ត្រាំ ជុំវិញការអំពាវនាវរបស់ខ្លួនក្នុងការកាន់កាប់ព្រែកជីកប៉ាណាម៉ា និងកោះ Greenland ព្រមទាំងការផ្លាស់ប្តូរឈ្មោះ «ឈូងសមុទ្រម៉ិកស៊ិក» ទៅជា «ឈូងសមុទ្រអាមេរិក»។

KCNA បានសរសេរទៀតថា៖ «សហរដ្ឋអាមេរិកគួរតែភ្ញាក់ពីភាពវង្វេងស្មារតីរបស់ខ្លួន ហើយបញ្ឈប់ជាបន្ទាន់នូវការរំលោភលើសេចក្តីថ្លៃថ្នូរ និងអធិបតេយ្យភាពរបស់ប្រទេស និងប្រជាជនដទៃទៀត» ខណៈពេលដែលហៅសហរដ្ឋអាមេរិកថាជា «ជនជំរិតទារប្រាក់»។

សូមបញ្ជាក់ថា កូរ៉េខាងជើង ដែលជារឿយៗប្រឆាំងនឹងទស្សនៈរបស់លោកខាងលិចលើបញ្ហាអន្តរជាតិ បានរិះគន់ឥតសំចៃមាត់អំពីស្ថានភាពនៅតំបន់ហ្គាហ្សា ដោយបានបន្ទោសអ៊ីស្រាអែលចំពោះការបង្ហូរឈាម និងបានហៅអាមេរិកថាជា «អ្នកសមគំនិត»៕

ដោយ៖ ឈាង

ចុចអាន៖ ដូណាល់ ត្រាំ ចង់ជួប គីម ជុងអ៊ុន ម្តងទៀត