អ៊ីស្រាអែល កោះហៅ​ទ័ព​បម្រុងប្រមូល​ផ្ដុំ​គ្នា ត្រៀម​ខ្លួន​ពេល​បទ​ឈប់​បាញ់​ត្រូវ​រំសាយ

អ៊ីស្រាអែល​ បាន​កោះហៅ​​ទ័ព​បម្រុង​របស់​ខ្លួន ដើម្បី​​ត្រៀម​សម្រាប់​​សង្រ្គាម​ដែល​អាច​កើត​មាន​ឡើង​វិញ​នៅ​តំបន់​ហ្កាហ្សា ​បើ​ក្រុម​ហាម៉ាស​មិន​បាន​បំពេញ​តាម​កាលកំណត់​នៅ​ថ្ងៃ​សៅរ៍​សប្ដាហ៍​នេះ ក្នុង​ការ​​​ដោះលែង​ចំណាប់ខ្មាំង​​បន្ថែម​ទៀត។

រដ្ឋមន្ត្រីការពារជាតិអ៊ីស្រាអែល លោក Israel Katz បាននិយាយថា បទឈប់បាញ់នេះ គឺសំដៅនាំមកនូវការដោះលែងចំណាប់ខ្មាំងយ៉ាងឆាប់រហ័ស ដែលឃុំខ្លួនក្នុងស្ថានភាពដ៏លំបាកនៅតំបន់ហ្គាហ្សា។ លោកបានបន្ថែមថា បើក្រុមហាម៉ាសបញ្ឈប់ការដោះលែងចំណាប់ខ្មាំង នោះ​វា​នឹង​គ្មានបទឈប់បាញ់​ទៀត​ទេ ហើយសង្គ្រាម​នឹង​ផ្ទុះ​ឡើង។

លោក Katz បានសង្កត់​ធ្ងន់​ថា សង្រ្គាម​ហ្គាហ្សា​ថ្មី នឹង​មាន​ទំហំ​ខ្លាំង​ក្លា​ជាង​មុន។

នាយករដ្ឋមន្ត្រី​អ៊ីស្រាអែល លោក បេនចាមីន ណេតាន់យ៉ាហ៊ូ បាន​ឲ្យ​ដឹង​ថា លោកបានបញ្ជា​ឲ្យ​យោធាប្រមូលផ្តុំកងកម្លាំងនៅក្នុង និងជុំវិញតំបន់ហ្គាហ្សា ហើយយោធាបានប្រកាសថា ខ្លួនកំពុងដាក់ពង្រាយកងកម្លាំងបន្ថែមទៅកាន់ភាគខាងត្បូងរបស់ប្រទេស នៅជិតតំបន់ហ្គាហ្សា រួមទាំងការចល័តក្រុមបម្រុងផងដែរ។

ការ​ប្រកាស​របស់​អ៊ីស្រាអែល ធ្វើ​ឡើង​បន្ទាប់​ពី​ប្រធានាធិបតី​អាមេរិក លោក ដូណាល់ ត្រាំ បាន​ប្រកាស​ថា ចំណាប់ខ្មាំងទាំងអស់ត្រូវតែត្រូវបានដោះលែងនៅវេលាថ្ងៃត្រង់នៅថ្ងៃសៅរ៍ បើមិនដូច្នោះទេ​លោក​នឹង​​ធ្វើ​ឲ្យ​សង្គ្រាម​ផ្ទុះ​ឡើង​ម្ដង​ទៀត។

ការព្រួយបារម្ភ​ដែល​ថាបទឈប់បាញ់នឹងដួលរលំកំពុងកើនឡើង ខណៈរដ្ឋ​អារ៉ាប់​​កំពុង​មិន​ពេញចិត្ត​ ជុំវិញផែនការរបស់​លោក ត្រាំ ក្នុងការកាន់កាប់តំបន់​ហ្គាហ្សា តាំងទីលំនៅ​ប្រជាជន​ប៉ាឡេស្ទីន​ទៅ​កន្លែង​ថ្មី​​ និងសាងសង់រមណីយដ្ឋានឆ្នេរ​សមុទ្រ​អន្តរជាតិ។

ក្រុមហាម៉ាស បានយល់ព្រមនៅក្រោមកិច្ចព្រមព្រៀងដោះលែងចំណាប់ខ្មាំងបីនាក់ទៀត​នៅ​ថ្ងៃសៅរ៍ ប៉ុន្តែបាននិយាយ​​​ក្នុង​សប្តាហ៍នេះ​វិញ​ថា ខ្លួនកំពុង​ផ្អាកការប្រគល់នេះ ក្រោម​មូលហេតុ​​ដែល​ខ្លួនបានចាត់ទុក​ថាជាការរំលោភលើលក្ខខណ្ឌរបស់អ៊ីស្រាអែល។

អ្នកនាំពាក្យក្រុមហាម៉ាស លោក Hazaem Qassem បាននិយាយនៅក្នុងសេចក្តីថ្លែងការណ៍មួយថា៖ «ក្រុមហាម៉ាសនឹងមិនទទួលយកភាសានៃការគំរាមកំហែងរបស់អាមេរិក និងអ៊ីស្រាអែលទេ។ ការ​ទាក់ទង​គ្នា​កំពុងដំណើរការជាមួយប្រទេសអ្នកសម្រុះសម្រួល ដើម្បីសម្រេច​បាន​នូវ​ការអនុវត្តកិច្ចព្រមព្រៀងបទឈប់បាញ់»៕

ដោយ៖ ឈាង