វៀតណាម នឹងប្រើ​កម្ចី​ចិនជាង ៨​ពាន់​លាន​ដុល្លារ លើ​គម្រោង​ផ្លូវ​រថភ្លើង​តភ្ជាប់​ប្រទេស​ទាំង​ពីរ

វៀតណាម កំពុងជំរុញផែនការសាងសង់ផ្លូវរថភ្លើងថ្មីតភ្ជាប់​ទៅកាន់ប្រទេសចិន ជាមួយនឹងការវិនិយោគប៉ាន់ស្មានប្រមាណ ៨,៣​ពាន់លានដុល្លារ។

ផ្លូវដែកប្រវែង ៣៩១​គីឡូម៉ែត្រ ដែលត្រូវបានស្នើឡើង នឹងតភ្ជាប់ទីក្រុងព្រំដែន Lao Cai ទៅទីក្រុងហាណូយ និងពង្រីកទៅកាន់ទីក្រុង Haiphong ដែលជាកំពង់ផែសមុទ្រដ៏ធំបំផុតនៅភាគខាងជើងប្រទេសវៀតណាម។ ផ្លូវដែកនេះ ត្រូវបានរចនាឡើងដើម្បីផ្ទុកអ្នកដំណើរ និងដឹកជញ្ជូនទំនិញ ដោយមាន​ប្រវែង​ទទឹង​ផ្លូវ​​ ១ ៤៣៥​មិល្លិម៉ែត្រ និងអនុញ្ញាត​ឲ្យ​រថភ្លើងដំណើរការក្នុងល្បឿនរហូតដល់ ១៦០​គីឡូម៉ែត្រក្នុងមួយម៉ោង។ ការ​សាង​សង់​ត្រូវ​បាន​គេ​រំពឹង​ថា​នឹង​ចាប់​ផ្តើម​នៅ​ឆ្នាំ​នេះ ដោយ​​គ្រោង​នឹង​បញ្ចប់​​​នៅ​ឆ្នាំ២០៣០។

ដើម្បីផ្តល់ហិរញ្ញប្បទានដល់គម្រោងហេដ្ឋារចនាសម្ព័ន្ធនេះ វៀតណាមនឹងធានាប្រាក់កម្ចីពីរដ្ឋាភិបាលចិន រួមជាមួយនឹងមូលនិធិក្នុងស្រុក និងប្រភពហិរញ្ញវត្ថុផ្សេងទៀត។ សភាវៀតណាមគ្រោងនឹងបោះឆ្នោតលើគម្រោងនេះនៅសប្តាហ៍ក្រោយ។

គំនិតផ្តួចផ្តើមនេះ គឺជាផ្នែកមួយនៃកិច្ចខិតខំប្រឹងប្រែងយ៉ាងទូលំទូលាយរបស់វៀតណាម ដើម្បីធ្វើទំនើបកម្មប្រព័ន្ធផ្លូវដែកដែលមានវ័យចំណាស់របស់ខ្លួន និងលើកកម្ពស់ការអភិវឌ្ឍសេដ្ឋកិច្ចតាមរយៈការធ្វើ​ឲ្យ​ប្រសើរឡើងនៃការតភ្ជាប់។ នៅខែវិច្ឆិកាឆ្នាំ​២០២៤ សមាជិកសភាវៀតណាមបានអនុម័តសេចក្ដី​សម្រេច​មួយ ដែលគាំទ្រគម្រោងផ្លូវដែកល្បឿនលឿនប្រវែង ១ ៥៤១​គីឡូម៉ែត្រជាមួយ​​តម្លៃ ៦៧​ពាន់លានដុល្លារ ដែលតភ្ជាប់ទីក្រុងហាណូយជាមួយទីក្រុងហូជីមិញ ដោយប្រតិបត្តិការគ្រោងនឹងចាប់ផ្តើមនៅឆ្នាំ​២០៣៥៕

ដោយ៖ ឈាង