Connect with us

ព័ត៌មានអន្ដរជាតិ

អ៊ីស្រាអែល អាចវាយប្រហាររោងចក្រនុយក្លេអ៊ែរអ៊ីរ៉ង់ នៅប៉ុន្មានខែទៀត

បានផុស

នៅ

តាមព័ត៌មានដែលទទួលបានដោយ Wall Street Journal និង Washington Post បានបង្ហាញថា អ៊ីស្រាអែលអាចវាយប្រហាររោងចក្រនុយក្លេអ៊ែរអ៊ីរ៉ង់ ក្នុងរង្វង់៦ខែទៀតនៃឆ្នាំ២០២៥នេះ។

(រូបថត៖ AP)
សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដ្បិតមិនបកស្រាយលម្អិត តែប្រភពខាងលើអះអាងថា របាយការណ៍នានាត្រូវបានទីភ្នាក់ងារចារកម្មអាមេរិក លាតត្រដាងជាបន្តបន្ទាប់ ដែលបង្ហាញថា មេដឹកនាំអ៊ីស្រាអែល កំពុងពិចារណាវាយប្រហាររោងចក្រនុយក្លេអ៊ែរអ៊ីរ៉ង់ក្នុងឆ្នាំនេះតែម្តង។ ក្នុងនោះរោងចក្រធំទាំង២ដូចជា Fordow និង Natanz អាចនឹងត្រូវកំណត់គោលដៅក្នុងរង្វង់ពេល៦ខែដំបូងនៃឆ្នាំ២០២៥។ 

ចំពោះការវាយប្រហារវិញ អ៊ីស្រាអែល អាចបាញ់មីស៊ីលបាលីស្ទិកចេញពីខាងក្រៅដែនអាកាសអ៊ីរ៉ង់ ឬអាចទម្លាក់គ្រាប់បែកពីយន្តហោះចម្បាំង ហើយអ្វីដែលសំខាន់គឺថា ប្រតិបត្តិការនោះក៏អាចមានជំនួយពីសហរដ្ឋអាមេរិកផងដែរ។

ម្យ៉ាងវិញទៀត ប្រភពដដែលលើកឡើងថា ពេលនេះនាយករដ្ឋមន្ត្រីអ៊ីស្រាអែល Benjamin Netanyahu កំពុងមានទំនុកចិត្តខ្ពស់មែនទែនចំពោះប្រធានាធិបតីអាមេរិកលោក ដូណាល់ ត្រាំ ព្រោះជឿជាក់ថា បុរសម្នាក់នេះ មានការគាំទ្រអ៊ីស្រាអែល ម៉ឺងម៉ាត់ជាងលោក ចូ បៃដិន ទៅទៀត។

(រូបថត៖ Getty)

ទោះបីជាយ៉ាងណាក៏ដោយ ជុំវិញបញ្ហានេះ ភាគីខាងអ៊ីស្រាអែល មិនទាន់ចេញមុខនិយាយអ្វីនោះទេ។

ប្រសិនបើការវាយប្រហារនេះកើតឡើងមែននោះ ស្ថានការណ៍នៅតំបន់មជ្ឈិមបូព៌ានឹងកាន់តែក្តៅរោលរាលជាក់ជាមិនខានឡើយ ព្រោះ អ៊ីរ៉ង់បានព្រមានរួចទៅហើយថា សង្គ្រាមធំច្បាស់ជានឹងផ្ទុះឡើងបើសិនជាទីក្រុងហ្ស៊េរុយសាឡិម បើកការវាយប្រហារទីក្រុងតេហេរ៉ង់។

សូមជម្រាបថា កាលពីឆ្នាំ២០២៤ អ៊ីរ៉ង់និងអ៊ីស្រាអែល បានផ្ទុះអាវុធដាក់គ្នាជាច្រើនលើកច្រើនសា ធ្វើឲ្យស្ថានការណ៍ក្នុងតំបន់មជ្ឈិមបូព៌ាឡើងកម្តៅ ប្រៀបបាននឹងគ្រាប់បែករៀបនឹងផ្ទុះ។

(រូបថត៖ Reuters)

នៅថ្ងៃទី១ខែមេសា អ៊ីស្រាអែលបានវាយប្រហារតាមអាកាស លើស្ថានកុងស៊ុលអ៊ីរ៉ង់នៅទីក្រុង ដាម៉ាស នៃប្រទេសស៊ីរី បណ្តាលស្លាប់ឧត្តមសេនីយ៍អ៊ីរ៉ង់ពីរនាក់ និងមន្រ្តីកងឆ្មាំបដិវត្តឥស្លាម (IRGC) ជាច្រើននាក់ទៀត។

១២ថ្ងៃក្រោយមក អ៊ីរ៉ង់ក៏សងសឹកវិញ ដោយបញ្ជូនយន្តហោះគ្មានមនុស្សបើករាប់រយគ្រឿង និងមីស៊ីលរាប់រយគ្រាប់ បាញ់សន្ធាប់លើអ៊ីស្រាអែល ក្នុងទំហំដែលគេមិនធ្លាប់ឃើញពីមុន។

(រូបថត៖ Reuters)

លុះមកដល់ថ្ងៃទី៣១ខែកក្កដា មេដឹកនាំនយោបាយក្រុមហាម៉ាសលោក Ismail Haniyeh ត្រូវគេធ្វើឃាតនៅទីក្រុងតេហេរ៉ង់ ក្នុងការវាយប្រហារដែលគេសន្មតថាជាស្នាដៃអ៊ីស្រាអែល។

នៅថ្ងៃទី១ខែតុលា អ៊ីរ៉ង់បានបើកការវាយប្រហារដោយផ្ទាល់ជាលើកទីពីរលើអ៊ីស្រាអែល ដោយបាញ់មីស៊ីលផ្លោងប្រមាណ២០០គ្រាប់។ យ៉ាងណា នៅថ្ងៃទី២៦ខែតុលា អ៊ីស្រាអែលក៏បើកការវាយប្រហារតាមអាកាសទ្រង់ទ្រាយធំលើហេដ្ឋារចនាសម្ព័ន្ធយោធាអ៊ីរ៉ង់វិញ ដោយបង្កការខូចខាតយ៉ាងដំណំលើបន្ទាយទ័ព៕

អត្ថបទ៖ សុខ សុវណ្ណ

ចុចអាន៖ អ៊ីស្រាអែល ក៏ដកខ្លួនចេញពីក្រុមប្រឹក្សាសិទ្ធិមនុស្ស UN តាមអាមេរិក ដែរ 

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

ព័ត៌មានជាតិ១ ម៉ោង មុន

ផ្លូវថ្មើរជើងរាត្រីនេះ មានល្ខោន​បាសាក់ ចាបុីដងវែងនៅសប្តាហ៍ក្រោយ នឹងមានកំប្លែងនាយក្រឹម

ព័ត៌មានជាតិ២ ម៉ោង មុន

រដ្ឋមន្ត្រីបរិស្ថាន ប្រកាសបន្តធ្វើបុណ្យកោងកាងសន្តិភាពរៀងរាល់ឆ្នាំ ដើម្បីរក្សាព្រៃកោងកាង និងបរិស្ថានកម្ពុជា

ព័ត៌មានជាតិ២ ម៉ោង មុន

តើបាតុកម្មដែលរៀបចំដោយពលករមួយក្ដាប់តូចនៅកូរ៉េ អាចតំណាងឱ្យពលរដ្ឋខ្មែរនៅកូរ៉េដែរឬទេ?

ព័ត៌មានអន្ដរជាតិ៣ ម៉ោង មុន

មេដឹកនាំ​បណ្តា​ប្រទេសនៅ​អឺរ៉ុប​បង្ហាញ​ជំហរ​​ពិត​ក្នុងជម្លោះត្រាំ​និង​ហ្សេលេនស្គី​ ​

ព័ត៌មានអន្ដរជាតិ៤ ម៉ោង មុន

ជនរងគ្រោះ​​៥០០០​នាក់នឹងត្រូវបញ្ជូនចេញ​ពី​មីយ៉ាន់ម៉ាទៅ​ចិនវិញនៅសប្តាហ៍ក្រោយ

Sokha Hotels

ព័ត៌មានពេញនិយម