ព័ត៌មានអន្ដរជាតិ

លោក ត្រាំ ចង់ឲ្យរុស្ស៊ីចូលរួមក្នុង G7 ឡើងវិញ

បានផុស

៣២ វិនាទី មុន

នៅ

ថ្ងៃសុក្រ ១៤ កុម្ភៈ ២០២៥

ដោយ

Chheang

នៅក្នុងការអត្ថាធិប្បាយកាលពីថ្ងៃទី១៣កុម្ភៈ២០២៥ ប្រធានាធិបតីអាមេរិក លោក ដូណាល់ ត្រាំ បានសម្តែងការគាំទ្ររបស់លោកចំពោះការដាក់បញ្ចូលប្រទេសរុស្ស៊ីទៅក្នុង G7 វិញ ដោយពណ៌នាថាការបណ្តេញរុស្ស៊ីចេញគឺជាកំហុសមួយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

និយាយអំពីជម្លោះដែលកំពុងបន្តនៅក្នុងប្រទេសអ៊ុយក្រែន លោក ត្រាំ បានស្នើថា ការចូលរួមរបស់រុស្ស៊ីនៅក្នុងក្រុមនេះ អាចជួយទប់ស្កាត់សង្គ្រាម ដោយបន្ថែមថា ការចូលរួមឡើងវិញជាមួយប្រធានាធិបតីរុស្ស៊ី លោក វ៉្លាឌីមៀរ ពូទីន អាចនឹងផ្តល់ផ្លូវទៅកាន់សន្តិភាព។

ប្រទេសរុស្ស៊ីត្រូវបានបណ្តេញចេញពី G7 ក្នុងឆ្នាំ២០១៤ បន្ទាប់ពីការឈ្លានពាន និងកាត់យកឧបទ្វីបគ្រីមៀពីអ៊ុយក្រែន ដោយបង្វែរពី G8 ទៅជាទម្រង់ G7 បច្ចុប្បន្ន។ ទោះបីជាបែបនេះក៏ដោយ លោក ត្រាំ បានអំពាវនាវជាយូរមកហើយឲ្យមានការសន្ទនាជាមួយរុស្ស៊ី ហើយជឿជាក់ថា ការចូលរួមរបស់រុស្ស៊ីនៅក្នុងការពិភាក្សាជាសកលនេះនឹងមានផលប្រយោជន៍។ សុន្ទរកថារបស់លោកបានជំរុញឲ្យមានការជជែកដេញដោលបន្ថែមទៀត ជាពិសេសនៅពេលដែលកិច្ចប្រជុំកំពូល G7 ខិតជិតមកដល់ក្នុងខែមិថុនាឆ្នាំ២០២៥។

មេដឹកនាំពីមុនៗមួយចំនួន ដូចជាអតីតនាយករដ្ឋមន្ត្រីជប៉ុន លោក Shinzo Abe បានគាំទ្រគំនិតនេះ ខណៈដែលអ្នកផ្សេងទៀតនៅតែស្ទាក់ស្ទើរ ដោយសារមានការព្រួយបារម្ភជាបន្តបន្ទាប់ចំពោះសកម្មភាពរបស់រុស្ស៊ីនៅលើឆាកពិភពលោក។

នៅពេលដែលភាពតានតឹងនៅតែបន្តកើតមានជុំវិញសង្រ្គាមនៅអ៊ុយក្រែន ការជជែកដេញដោលជុំវិញកន្លែងរបស់រុស្ស៊ីនៅក្នុងវេទិកាអន្តរជាតិដូចជា G7 នៅតែជាបញ្ហាចាក់ដោត៕