ព័ត៌មានអន្ដរជាតិ

Viktor Orban ដែលកាន់អំណាច១៥ឆ្នាំនៅហុងគ្រី បរិហារការដឹកនាំអឺរ៉ុបដែលឈឺជំនួសអ៊ុយក្រែន

បានផុស

១ ខែ មុន

នៅ

ថ្ងៃសុក្រ ១៤ កុម្ភៈ ២០២៥

ដោយ

នាយករដ្ឋមន្ត្រីហុងគ្រី លោក Viktor Orban ដែលត្រូវបានគេដឹងថា រក្សាទំនាក់ទំនងយ៉ាងល្អជាមួយប្រធានាធិបតីរុស្ស៊ី លោក វ៉្លាឌីមៀរ ពូទីន ដែលរងទណ្ឌកម្មពីសហរដ្ឋអាមេរិក និង សមាជិកអឺរ៉ុបភាគច្រើនក្នុងការធ្វើសង្គ្រាមនៅប្រទេសអ៊ុយក្រែននោះ បានប្រើវោហារស័ព្ទវាយប្រហារមេដឹកនាំអឺរ៉ុបជាបន្តបន្ទាប់ បន្ទាប់ពីជំនួបតាមទូរស័ព្ទជាង១ម៉ោងរវាងលោក ដូណាល់ ត្រាំ និង លោក ពូទីន ដោយលើកឡើងថា ថ្នាក់ដឹកនាំសហភាពអឺរ៉ុប មិនទទួលបានកៅអីនៅតុចរចាអ៊ុយក្រែន រួមជាមួយនឹងរុស្ស៊ី និងសហរដ្ឋអាមេរិកនោះទេ។

នាយករដ្ឋមន្ត្រី ហុង គ្រី លោក Viktor Orban ដែលកាន់អំណាច១៥ឆ្នាំនៅប្រទេសហុងគ្រី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នាយករដ្ឋមន្ត្រី ហុង គ្រី លោក Viktor Orban ដែលបានកាន់អំណាច១៥ឆ្នាំនៅប្រទេសហុងគ្រីចាប់តាំងពីឆ្នាំ២០១០នោះ បានអត្ថាធិប្បាយឆ្លើយតបទៅនឹងសេចក្តីថ្លែងការណ៍របស់ប្រធានគោលនយោបាយការបរទេសរបស់សហភាពអឺរ៉ុបលោកស្រី Kaja Kallas បង្ហាញការរួបរួមគ្នាគាំទ្រអ៊ុយក្រែន និងចាត់ទុកថាការចរចាសន្តិភាពអ៊ុយក្រែនមិនអាចអត់វត្តមានអ៊ុយក្រែននិងអឺរ៉ុបនោះទេ។

ពិភាក្សាតាមទូរស័ព្ទរវាងប្រធានាធិបតីរុស្ស៊ីលោក វ្ល៉ាឌីមៀរ ពូទីន និងប្រធានាធិបតីសហរដ្ឋអាមេរិក លោក ដូណាល់ ត្រាំ កាលពីថ្ងៃពុធទី១២ខែកុម្ភៈ បានធ្វើឲ្យអឺរ៉ុបក៏ដូចជាអ៊ុយក្រែនស្រឡាំងកាំងជាខ្លាំង ពីព្រោះថា ការជជែកទ្វេភាគីរវាងមហាអំណាចទាំងពីរដោយពិភាក្សាលើបញ្ហាអ៊ុយក្រែន ដោយមិនបានរួមបញ្ចូលអ៊ុយក្រែននោះទេ។

ដោយបានចេញសេចក្តីថ្លែងការណ៍ក្នុងនាមសហភាពអឺរ៉ុប ក៏ដូចជា ប្រទេសបារាំង អាល្លឺម៉ង់ ប៉ូឡូញ អ៊ីតាលី អេស្ប៉ាញ និងចក្រភពអង់គ្លេសផងនោះ លោកស្រី Kaja Kallas ដែលជាអនុប្រធានគណៈកម្មការអឺរ៉ុបផងនោះ បានទទូចថា អឺរ៉ុប និងអ៊ុយក្រែនគួរតែត្រូវបានរួមបញ្ចូលនៅក្នុងការចរចាណាមួយដើម្បីដោះស្រាយជម្លោះ។

នាយករដ្ឋមន្ត្រីហុងគ្រី លោក Viktor Orban បានថ្លែងថា៖«សេចក្តីប្រកាសនេះគឺជាសក្ខីភាពដ៏ក្រៀមក្រំមួយនៃភាពជាអ្នកដឹកនាំនៅទីក្រុងប្រ៊ុចសែលដ៏អាក្រក់។ ខណៈពេលដែលប្រធានាធិបតី ដូណាល់ ត្រាំ និងប្រធានាធិបតី ពូទីន ចរចាសន្តិភាព មន្ត្រីសហភាពអឺរ៉ុបបានចេញសេចក្តីថ្លែងការណ៍ដែលគ្មានតម្លៃ។ អ្នកមិនអាចស្នើសុំកៅអីនៅតុចរចាបានទេ។ អ្នកត្រូវតែរកបានវា តាមរយៈកម្លាំង ភាពជាអ្នកដឹកនាំល្អ និងការទូតដ៏ឆ្លាតវៃ។ ជំហររបស់ទីក្រុងប្រ៊ុចសែល ក្នុងការគាំទ្រការសម្លាប់ដរាបណាខ្លួនត្រូវការ នោះគឺគ្មានសីលធម៌ និងនយោបាយ។»

ចាប់តាំងពីដឹងថា លោក ដូណាល់ ត្រាំ ឈ្នះការបោះឆ្នោតនៅសហរដ្ឋអាមេរិក នាយករដ្ឋមន្ត្រី ហុងគ្រី បានចេញសារអបអរសាទរ និងបានបង្ហាញជំហរវាយប្រហារសហភាពអឺរ៉ុប ដែលប្រទេសហុងគ្រីជាសមាជិកសហភាពអឺរ៉ុបផង និងជាសមាជិកអង្គការណាតូផង។

ក្នុងចំណោមប្រទេសសមាជិកទាំង៣០ពេលដែលស៊ុយអែតនិងហ្វាំងឡង់ដាក់ពាក្យចូលជាសមាជិកអង្គការណាតូ ព្រោះតែភ័យខ្លាចការឈ្លានពានពីសំណាក់រុស្ស៊ីដូចករណីអ៊ុយក្រែន គឺនាយករដ្ឋមន្ត្រីហុងគ្រី លោក Viktor Orban ជាអ្នកជំទាស់ខ្លាំងបំផុតនិងយូរបំផុតសម្រាប់ការអនុម័តសមាជិកភាពរបស់ស៊ុយអែត៕

ដោយ រ៉ាន់ រើយ