រុស្ស៊ី វាយប្រហាររោងចក្រនុយក្លេអ៊ែរនៅ Chernobyl បង្កហានិភ័យលេចធ្លាយជាតិវិទ្យុសកម្ម

ដ្រូនរបស់រុស្ស៊ី បានបើកការវាយប្រហារលើរោងចក្រនុយក្លេអ៊ែរនៅទីក្រុង Chernobyl ដោយបង្កការខូចខាតយ៉ាងដំណំ ហើយធ្វើឲ្យគេបារម្ភអំពីការលេចធ្លាយនិងសាយភាយជាតិវិទ្យុសកម្ម។ នេះបើតាមការអះអាងពីសំណាក់ប្រមុខដឹកនាំរដ្ឋាភិបាលទីក្រុងកៀវ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងសេចក្តីរាយការណ៍របស់ CNN នៅថ្ងៃសុក្រទី១៤ខែកុម្ភៈឆ្នាំ២០២៥, លោក វ្ល៉ាឌីមៀរ ហ្សេលេនស្គី និយាយថា ដ្រូនរុស្ស៊ីបំពាក់ជាមួយក្បាលគ្រាប់មានកម្លាំងផ្ទុះខ្លាំង បានវាយប្រហាររោងចក្រនុយក្លេអ៊ែរដែលមានទីតាំងស្ថិតនៅជាប់ព្រំដែនអ៊ុយក្រែន-បេឡារុស ដោយកម្ទេចខែលដែលការពារជាតិវិទ្យុសកម្មនៅត្រង់ម៉ាស៊ីនទី៤។

ការវាយប្រហារនោះកើតឡើងនៅរាត្រីថ្ងៃព្រហស្បតិ៍ (ពេលវេលានៅអ៊ុយក្រែន) ដោយបង្កសំឡេងផ្ទុះ ​លាន់ឮយ៉ាងទ្រហឹង និងមានអគ្គិភ័យឆាបឆេះយ៉ាងសន្ធោសន្ធៅ ប៉ុន្តែក្រោយមកត្រូវបានពន្លត់វិញ។

នៅយប់ថ្ងៃដដែលនោះ កងទ័ពអ៊ុយក្រែន ក៏បានរាយការណ៍អំពី ដ្រូនរុស្ស៊ីចំនួន១៣៣គ្រឿង ហោះចូលដីអ៊ុយក្រែនផងដែរ ដោយក្នុងនោះមាន៧៣គ្រឿងត្រូវបានបាញ់ទម្លាក់។

ការវាយប្រហារនេះទៀតសោត កើតឡើងមុនពេលគណៈប្រតិភូអ៊ុយក្រែន និងសហរដ្ឋអាមេរិក គ្រោងជួបពិភាក្សាគ្នានៅទីក្រុង Munich នៃប្រទេសអាល្លឺម៉ង់ ស្តីពីការបញ្ចប់សង្គ្រាមជាមួយរុស្ស៊ី ឈានឆ្ពោះទៅរកកិច្ចព្រមព្រៀងសន្តិភាព។

ពាក់ព័ន្ធបញ្ហានេះ ប្រធានាធិបតីអាមេរិក លោក ដូណាល់ ត្រាំ បានចេញសេចក្តីថ្លែងការណ៍កាល​ពី​ថ្ងៃ​ទី​១៣​ខែ​កុម្ភៈ​ដោយធានាថា អ៊ុយក្រែននឹងមានតួនាទីសំខាន់នៅក្នុងកិច្ចចរចាសន្តិភាពណាមួយជាមួយរុស្ស៊ី ដើម្បី​ដោះស្រាយ​វិបត្តិ​សង្គ្រាម​ដែល​កំពុង​កើត​ឡើង​នា​ពេល​បច្ចុប្បន្ន។

ការ​លើក​ឡើង​របស់​លោក ត្រាំ ដែល​ថា អ៊ុយក្រែននឹងមិនត្រូវបានគេដកចេញពីការចរចាជាមួយរុស្ស៊ី គឺធ្វើឡើងបន្ទាប់ពីមានក្តីបារម្ភពីសំណាក់មន្ត្រីអ៊ុយក្រែន ដែលសម្តែងការមិនសប្បាយចិត្តក្រោយលោក ត្រាំ ចូលរួមក្នុងកិច្ចពិភាក្សាជាមួយប្រធានាធិបតីរុស្ស៊ីលោក វ៉្លាឌីមៀរ ពូទីន មុនពេលនិយាយជាមួយប្រធានាធិបតីអ៊ុយក្រែនលោក វ៉ា្លឌីមៀ ហ្សេលេនស្គី។

ដូច្នេះហើយ លោក ត្រាំ ​​បញ្ជាក់​ថា៖ «ពួក​គេ​នឹង​ជា​ផ្នែក​មួយ​នៃ​កិច្ច​ពិភាក្សា។ យើង​នឹង​​មាន​អ៊ុយក្រែន ហើយ​យើង​មាន​រុស្ស៊ី, ​​យើង​នឹង​មាន​​មនុស្ស​ម្នា​​ច្រើន​នាក់​ផ្សេង​ទៀត​ចូលរួម»៕

អត្ថបទ៖ សុខ សុវណ្ណ

ចុចអាន៖ អាមេរិក ធានាការចូលរួមរបស់អ៊ុយក្រែន ក្នុងកិច្ចចរចាសន្តិភាពជាមួយរុស្ស៊ី