ព័ត៌មានអន្ដរជាតិ

ចិន ជំទាស់ដាច់អហង្ការចំពោះការដាក់ពង្រាយមីស៊ីលអាមេរិកលើទឹកដីហ្វីលីពីន

បានផុស

១ ខែ មុន

នៅ

ថ្ងៃសុក្រ ១៤ កុម្ភៈ ២០២៥

ដោយ

Chheang

ប្រទេសចិន បានប្រឆាំងយ៉ាងខ្លាំងចំពោះការដាក់ពង្រាយប្រព័ន្ធមីស៊ីល Typhon របស់អាមេរិកនៅលើទឹកដីហ្វីលីពីន ដោយចោទប្រកាន់ប្រទេសនេះថាបានបង្កើនភាពតានតឹងនៅក្នុងតំបន់អាស៊ីប៉ាស៊ីហ្វិក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រដ្ឋាភិបាលចិន បានអំពាវនាវនៅថ្ងៃទី១៤កុម្ភៈនេះឲ្យហ្វីលីពីនដកប្រព័ន្ធមីស៊ីលចេញ ដោយព្រមានថាបើមិនដូច្នោះ វានឹងនាំឲ្យមានការប្រកួតប្រជែងសព្វាវុធ និងបំផ្លាញស្ថិរភាពក្នុងតំបន់។

ក្រសួងការបរទេសចិន បានបញ្ជាក់ថា ប្រព័ន្ធមីស៊ីល Typhon ដែលមានសមត្ថភាពបាញ់មីស៊ីល Tomahawk និងមីស៊ីល SM-6 បង្កការគំរាមកំហែងដោយផ្ទាល់ដល់សន្តិសុខជាតិរបស់ប្រទេសចិន។ ការដាក់ពង្រាយនេះគឺជាផ្នែកមួយនៃកិច្ចសហប្រតិបត្តិការយោធាដែលកំពុងបន្តរវាងសហរដ្ឋអាមេរិក និងហ្វីលីពីន ដែលបានធ្វើឲ្យទំនាក់ទំនងកាន់តែតានតឹងជាមួយទីក្រុងប៉េកាំង ជាពិសេសលើជម្លោះដែនទឹកនៅសមុទ្រចិនខាងត្បូង។

មីស៊ីល Tomahawk អាចបាញ់ដល់គោលដៅទាំងក្នុងប្រទេសចិន និងប្រទេសរុស្ស៊ី ពីហ្វីលីពីន ខណៈដែលមីស៊ីល SM-6 អាចវាយប្រហារគោលដៅអាកាស ឬលើសមុទ្របានចម្ងាយជាង ២០០គីឡូម៉ែត្រ។

ប្រព័ន្ធមីស៊ីល Typhon ត្រូវបានដាក់ពង្រាយលើទឹកដីហ្វីលីពីន កាលពីខែមេសាឆ្នាំ២០២៤ អំឡុងការចូលរួមសមុទ្ធរួមគ្នារវាងសម្ព័ន្ធមិត្តទាំងពីរ។

ជាការឆ្លើយតបទៅនឹងភាពតានតឹងដែលកំពុងកើនឡើង ហ្វីលីពីនបានការពារសិទ្ធិរបស់ខ្លួនក្នុងការដាក់ពង្រាយប្រព័ន្ធមីស៊ីលរបស់អាមេរិក ដោយអះអាងថា ការរៀបចំនេះស្របតាមតម្រូវការសន្តិសុខរបស់ខ្លួន។ ទោះបីជាមានការជំទាស់ពីចិនក៏ដោយ ក៏មន្ត្រីហ្វីលីពីនបានសង្កត់ធ្ងន់ថា ប្រទេសខ្លួននឹងបន្តពង្រឹងសមត្ថភាពការពារជាមួយនឹងការគាំទ្រពីសម្ព័ន្ធមិត្តអាមេរិក។

ការដាក់ពង្រាយប្រព័ន្ធមីស៊ីល Typhon គឺជាបញ្ហាថ្មីមួយនៅក្នុងភូមិសាស្ត្រនយោបាយដ៏ស្មុគស្មាញរវាងចិន អាមេរិក និងហ្វីលីពីន ជាមួយនឹងផលប៉ះពាល់ដ៏ធំធេងសម្រាប់ការចូលរួមផ្នែកយោធានាពេលអនាគតនៅក្នុងតំបន់៕

ដោយ៖ ឈាង