ជំនួយការលោក ត្រាំ៖ អ៊ុយក្រែន ត្រូវតែសងអាមេរិក 

ថ្លែងប្រាប់ Fox News កាលពីថ្ងៃអាទិត្យទី១៦ខែកុម្ភៈឆ្នាំ២០២៥ ទីប្រឹក្សាសន្តិសុខជាតិអាមេរិកលោក Michael Waltz និយាយថា អ៊ុយក្រែន ត្រូវតែសងមកនូវការវិនិយោគរបស់អាមេរិកក្នុងសង្គ្រាមនេះ ព្រោះវាជាវិធីដ៏ល្អបំផុត បើចង់ឲ្យអាមេរិកជួយខ្លួនទៀត នាពេលអនាគត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជំនួយការប្រធានាធិបតិអាមេរិករូបនេះ លើកឡើងថា  អាមេរិកសមនឹងទទួលបានការតបស្នង ហើយសមនឹងទទួលបានការសងប្រាក់រាប់ពាន់លានដុល្លារដែលខ្លួនបានវិនិយោគក្នុងសង្គ្រាមនេះ។ គ្មានអ្វីធ្វើឲ្យប្រជាជនអាមេរិកសប្បាយចិត្តជាង ការឃើញអ៊ុយក្រែន ព្រមធ្វើជាដៃគូនោះទេ។

ការអះអាងរបស់លោក Waltz កើតឡើងបន្ទាប់ពីមេដឹកនាំអ៊ុយក្រែន Vladimir Zelensky ត្រូវគេរាយការណ៍ថា មិនព្រមចុះហត្ថលេខាលើឯកសារដែលផ្តល់ទុនបម្រុងរ៉ែនាពេលអនាគត៥០% ដល់សហរដ្ឋអាមេរិកទេ។

ជុំវិញរឿង ក្នុងបទសម្ភាសជាមួយ Fox News កាលពីសប្តាហ៍មុន ប្រធានាធិបតីអាមេរិក ដូណាល់ ត្រាំ ក៏ទារឲ្យទីក្រុងកៀវ សងប្រាក់៥០០ពាន់លានដុល្លារមកទីក្រុងវ៉ាស៊ីនតោនវិញផងដែរ ដោយសងតាមរយៈកិច្ចព្រមព្រៀងប្រគល់ធនធានរ៉ែកម្រ ដូចដែលលោកធ្លាប់បានលើកឡើង។

ថ្លែងប្រាប់ពិធីករ Bret Baier, លោកត្រាំនិយាយថា «វាពិតជារឿងដ៏ឆោតល្ងង់ណាស់សម្រាប់អាមេរិកដែលខំជួយអ៊ុយក្រែនយ៉ាងច្រើន ប៉ុន្តែបែរជាគ្មានអ្វីតបស្នងមកវិញទាល់តែសោះ។ យើងចង់បានមកវិញមិនថាជាធនធានរ៉ែកម្រ ប្រេង ឧស្ម័ន ឬអ្វីផ្សេងក៏បាន។ ខ្ញុំប្រាប់ពួកគេថា ខ្ញុំចង់ធ្វើឲ្យស្មើភាព! ប្រហែលជាធនធានរ៉ែកម្រតម្លៃ៥០០ពាន់លានដុល្លារអ៊ីចឹងទៅ ដូច្នេះយើងលែងមានអារម្មណ៍ថា យើងល្ងង់ទៀតហើយ»។

សូមជម្រាបថា សហរដ្ឋអាមេរិកគឺជាអ្នកគាំទ្រដ៏សំខាន់របស់ទីក្រុងកៀវ ចាប់តាំងពីជម្លោះរុស្ស៊ី-អ៊ុយក្រែន ផ្ទុះឡើងក្នុងខែកុម្ភៈឆ្នាំ២០២២ ហើយកាលពីខែមុន ប្រធានាធិបតីអាមេរិកលោក ដូណាល់ ត្រាំ អះអាងថា ទីក្រុងវ៉ាស៊ីនតោនបានចំណាយប្រាក់ចំនួន ២០០ពាន់លានដុល្លារជួយទីក្រុងកៀវ។

យ៉ាងណា លោក ហ្សេលេនស្គី បានបដិសេធ ហើយឆ្លើយតបវិញថា អ៊ុយក្រែនទទួលបានតែ ៧៦ពាន់លានដុល្លារប៉ុណ្ណោះពីសហរដ្ឋអាមេរិក៕

អត្ថបទ៖ សុខ សុវណ្ណ

ចុចអាន៖ អង់គ្លេស ត្រៀមបញ្ជូនទ័ពទៅ អ៊ុយក្រែន