ជំនន់ទឹកភ្លៀងនៅភាគអាគ្នេយ៍អាមេរិក បណ្តាលឲ្យមនុស្សស្លាប់ ឈានដល់ប្រកាសអាសន្ន

ភាគអាគ្នេយ៍សហរដ្ឋអាមេរិក កំពុងរងគ្រោះដោយជំនន់ទឹកភ្លៀងយ៉ាងធ្ងន់ធ្ងរ ឈានដល់ប្រកាសអាសន្ន ខណៈគិតត្រឹមថ្ងៃចន្ទទី១៧ខែកុម្ភៈឆ្នាំ២០២៥ មនុស្សចំនួន៩នាក់ ត្រូវបានគេរាយការណ៍ថា បាត់បង់ជីវិត។ យ៉ាងណា ក្រុមមន្ត្រីនិងអ្នកជួយសង្គ្រោះបានព្រមានថា តួលេខមនុស្សស្លាប់ អានកើនលើសបន្ថែមទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ BBC, ភ្លៀងធ្លាក់ដូចហែកមេឃ បានវាយប្រហាររដ្ឋ Kentucky និង Georgiaបង្កការជន់លិចដងផ្លូវនិងផ្ទះសម្បែង បណ្តាលឲ្យរថយន្តជាច្រើនគ្រឿងត្រូវជាប់គាំង ខណៈអ្នកខ្លះត្រូវគេចឡើងលើដំបូលផ្ទះ ដើម្បីសុវត្ថិភាព។

ក្រៅពីរដ្ឋទាំង២ខាងលើ នៅមានរដ្ឋចំនួន៦ទៀតដែលត្រូវទឹកជំនន់វាយលុកដូចជា Alabama, Mississippi, Tennessee, Virginia, West Virginia និង North Carolina។ មិនត្រឹមប៉ុណ្ណឹង មនុស្សប្រហែល ៤០០ ០០០នាក់ ក៏គ្មានអគ្គិសនីប្រើប្រាស់ផងដែរ។

យ៉ាងណា ក្នុងចំណោមរដ្ឋទាំងអស់ គឺ Kentucky ដែលរងទុក្ខខ្លាំងជាងគេ ពោលគឺរដ្ឋនេះ ត្រូវវាយប្រហារដោយភ្លៀងធ្លាក់ក្នុងកម្រិត ១៥សង់ទីម៉ែត្រ នាំឲ្យទឹកទន្លេឡើងខ្លាំង ដល់ថ្នាក់អភិបាលរដ្ឋលោក Andy Beshear ស្នើសុំជំនួយគ្រាអាសន្នពីសេតវិមាន។

លោក Beshear និយាយថា នេះគឺជាព្រឹត្តិការណ៍អាកាសធាតុដ៏អាក្រក់បំផុតមួយ ដែលរដ្ឋមិនធ្លាប់ជួបប្រទះសោះ ក្នុងរយៈពេលប៉ុន្មានទសវត្សរ៍មកនេះ។

គ្រោះធម្មជាតិនេះកើតឡើង ស្របពេលទីភ្នាក់ងារអាកាសធាតុជាតិ ព្រមានថា សប្តាហ៍នេះ ភាគកណ្តាលសហរដ្ឋអាមេរិក នឹងត្រូវវាយប្រហារដោយខ្យល់អាក់ទិកត្រជាក់ដល់ឆ្អឹង ធ្វើឲ្យសីតុណ្ហភាពតំបន់ខ្លះ អាចធ្លាក់ចុះដល់ទៅ -៥១ អង្សាសេឯណោះ៕

អត្ថបទ៖ សុខ សុវណ្ណ

ចុចអាន៖ ជំនន់ទឹកភ្លៀងកំពុងហូរកាត់ផ្លូវជាតិលេខ៣​ចន្លោះ​គីឡូម៉ែត្រ​ ៥៣​-៥៤​