ព័ត៌មានអន្ដរជាតិ

ហេតុការណ៍រត់ជាន់គ្នាបណ្តាលឱ្យស្លាប់១៨នាក់នៅស្ថានីយរថភ្លើង New Delhi

បានផុស

១ ខែ មុន

នៅ

ថ្ងៃចន្ទ ១៧ កុម្ភៈ ២០២៥

ដោយ

មនុស្សយ៉ាងហោចណាស់១៨នាក់ក្នុងនោះមានស្ត្រី១៤នាក់ បានស្លាប់នៅក្នុងហេតុការណ៍រត់ជាន់គ្នាដ៏រន្ធត់នៅស្ថានីយរថភ្លើងក្នុងរដ្ឋធានី New Delhi ប្រទេសឥណ្ឌា។ នេះបើយោងតាមការចេញផ្សាយរបស់ទីភ្នាក់ងារព័ត៌មាន AP កាលពីថ្ងៃទី១៦ខែកុម្ភៈ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍រត់ជាន់គ្នានេះបានកើតឡើងកាលពីល្ងាចថ្ងៃសៅរ៍ ខណៈដែលមនុស្សរាប់ពាន់នាក់បានប្រមូលផ្តុំគ្នានៅស្ថានីយ៍រថភ្លើង New Delhi រង់ចាំឡើងរថភ្លើង បណ្ដាលឲ្យមនុស្ស១៨នាក់ស្លាប់និងរបួសជាច្រើននាក់ទៀត។

យោងតាមក្រុមមន្ត្រី រថភ្លើងចំនួនពីរត្រូវបានពន្យារពេលនៅស្ថានីយ ខណៈដែលរថភ្លើងទីបី ឆ្ពោះទៅកាន់ទីក្រុង Prayagraj ដែលជាកន្លែងប្រារពពិធីបុណ្យសាសនាហិណ្ឌូដ៏ធំ Kumbh Mela កំពុងរង់ចាំការចេញដំណើរ ទើបមនុស្សបានរុញច្រានគ្នាទៅវិញទៅមកដើម្បីសម្រុកទៅជិះរថភ្លើងនោះ។ ជនរងគ្រោះជាច្រើននាក់ គឺជាអ្នកធ្វើធម្មយាត្រាហិណ្ឌូ ដែលកំពុងធ្វើដំណើរទៅពិធីបុណ្យនោះ។

ដោយសារតែហេតុការណ៍នេះ លោកនាយករដ្ឋមន្ត្រីឥណ្ឌា លោក Narendra Modi ក៏បានបង្ហោះសារលើបណ្តាញសង្គម X ចូលរួមរំលែកទុក្ខដល់គ្រួសារជនរងគ្រោះ។ នៅពេលនេះការស៊ើបអង្កេតកំពុងដំណើរការ ហើយអាជ្ញាធរបានប្រកាសផ្តល់សំណងដល់ជនរងគ្រោះផងដែរ។

គួររម្លឹកថា យ៉ាងហោចណាស់មនុស្ស៣០នាក់បានស្លាប់នៅក្នុងការរត់ជាន់គ្នានៅឯពិធីបុណ្យរយៈពេលប្រាំមួយសប្តាហ៍កាលពីខែមុន បន្ទាប់ពីអ្នកកាន់សាសនាហិណ្ឌូរាប់សិបលាននាក់បានប្រមូលផ្តុំគ្នាដើម្បីជ្រមុជទឹកនៅក្នុងទឹកទន្លេដ៏ពិសិដ្ឋ៕