ត្រាំ ចង់បញ្ជូនទ័ពអាមេរិក ទៅយាមការពារអណ្តូងរ៉ែកម្រ នៅ អ៊ុយក្រែន

យោងតាមប្រភពស្និទ្ធិនឹងរដ្ឋាភិបាលទីក្រុងវ៉ាស៊ីនតោន ប៉ុន្តែសុំមិនបញ្ចេញឈ្មោះបានប្រាប់ទៅសារព័ត៌មាន NBC កាលពីចុងសប្តាហ៍ថា លោក ដូណាល់ ត្រាំ ប្រហែលជានឹងបញ្ជូនទ័ពអាមេរិក ទៅយាមការពារអណ្តូងរ៉ែកម្រនៅអ៊ុយក្រែន ដែលមេដឹកនាំសេតវិមានចិញ្ចឹមចិត្តចង់បាន ជាថ្នូរជាមួយនឹងជំនួយយោធាដល់ទីក្រុងកៀវ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មន្ត្រីបួនរូបប្រាប់ថា នេះគឺជាកុងត្រាមួយ ហើយក្នុងនោះមានចងលក្ខខណ្ឌថា ទីក្រុងវ៉ាស៊ីនតោងនឹងបញ្ជូនទ័ពទៅយាមការពារអណ្តូងរ៉ែកម្ររបស់ទីក្រុងកៀវ ជាពិសេសគឺបន្ទាប់ពីរុស្ស៊ី-អ៊ុយក្រែន ឯកភាពចុះហត្ថលេខាលើកិច្ចព្រមព្រៀងសន្តិភាពជាមួយគ្នា។

មិនទាន់មានការបញ្ជាក់ច្បាស់អំពីរឿងនេះទេ ប៉ុន្តែកាលពីសប្តាហ៍មុន រដ្ឋមន្ត្រីការពារជាតិអាមេរិក Pete Hegseth បានបង្ហើបថា រដ្ឋបាលលោកត្រាំ មិនទាន់គិតឡើយ ចំពោះរឿងបញ្ជូនទ័ពទៅអ៊ុយក្រែននោះ។ 

ទោះបីជាយ៉ាងណាក៏ដោយ អនុប្រធានាធិបតីអាមេរិក J.D. Vance អះអាងថា ការបញ្ជូនទ័ពទៅអ៊ុយក្រែន នៅតែជាជម្រើសក្នុងចិត្តទីក្រុងវ៉ាស៊ីនតោន ប្រសិនបើរុស្ស៊ី មិនព្រមចូលចរចារកសន្តិភាព។

ព័ត៌មាននេះ កើតឡើងចំពេលទីប្រឹក្សាសន្តិសុខជាតិអាមេរិកលោក Michael Waltz ទារឲ្យអ៊ុយក្រែន សងមកវិញនូវការវិនិយោគរបស់អាមេរិកក្នុងសង្គ្រាមនេះ ព្រោះវាជាវិធីដ៏ល្អបំផុត បើចង់ឲ្យទីក្រុងវ៉ាស៊ីនតោនជួយខ្លួនទៀត នាពេលអនាគត។

ចំណែកលោក ត្រាំ ឯណោះ ក៏ទារឲ្យទីក្រុងកៀវ សងប្រាក់៥០០ពាន់លានដុល្លារមកទីក្រុងវ៉ាស៊ីនតោនវិញដែរ ដោយសងតាមរយៈកិច្ចព្រមព្រៀងប្រគល់ធនធានរ៉ែកម្រ ដូចដែលលោកធ្លាប់បានលើកឡើង។

សហរដ្ឋអាមេរិកគឺជាអ្នកគាំទ្រដ៏សំខាន់របស់ទីក្រុងកៀវ ចាប់តាំងពីជម្លោះរុស្ស៊ី-អ៊ុយក្រែន ផ្ទុះឡើងក្នុងខែកុម្ភៈឆ្នាំ២០២២ ហើយកាលពីខែមុន ប្រធានាធិបតីអាមេរិកលោក ដូណាល់ ត្រាំ អះអាងថា ទីក្រុងវ៉ាស៊ីនតោនបានចំណាយប្រាក់ចំនួន ២០០ពាន់លានដុល្លារជួយទីក្រុងកៀវ៕

អត្ថបទ៖ សុខ សុវណ្ណ

ចុចអាន៖ ជំនួយការលោក ត្រាំ៖ អ៊ុយក្រែន ត្រូវតែសងអាមេរិក