ហ្សេលេនស្គី ប្រកាសមិនចូលរួមការចរចាសន្តិភាពរុស្ស៊ី-អាមេរិក ហើយក៏មិនទទួលស្គាល់លទ្ធផលដែរ

ប្រធានាធិបតីអ៊ុយក្រែន វ្ល៉ាឌីមៀរ ហ្សេលេនស្គី បានប្រកាសក្តែងៗថា ទីក្រុងកៀវ នឹងមិនចូលរួមកិច្ចចរចាសន្តិភាពរវាងរុស្ស៊ីនិងអាមេរិកទេ ហើយក៏មិនទទួលស្គាល់លទ្ធផលនៃជំនួបនេះដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ Kyiv Independent, ក្នុងសន្និសីទកាសែតកាលពីថ្ងៃចន្ទទី១៧ខែកុម្ភៈឆ្នាំ២០២៥ លោកហ្សេលេនស្គី និយាយថា លោកមិនទទួលបានព័ត៌មានអ្វីទេអំពីកិច្ចចរចារកសន្តិភាពរវាងរុស្ស៊ីនិងអាមេរិក នៅប្រទេសអារ៉ាប៊ីសាអូឌីត ដូច្នេះហើយទីក្រុងកៀវ នឹងមិនទទួលយកលទ្ធផលនៃជំនួបនេះដាច់ខាត។

លោកអះអាងថា អ៊ុយក្រែនគ្មានដឹងអ្វីសោះចំពោះកិច្ចពិភាក្សានេះ ហើយបើចង់ឲ្យអ៊ុយក្រែនទទួលស្គាល់លទ្ធផល លុះត្រាតែជំនួបនោះមានអ៊ុយក្រែន ចូលរួមដែរ។ ដរាបណាអ៊ុយក្រែន មិនមានវត្តមានក្នុងកិច្ចចរាចសន្តិភាព នោះអ៊ុយក្រែន នឹងនៅតែមិនទទួលស្គាល់លទ្ធផល។

បើយោងតាមទីក្រុងមូស្គូ, មន្ត្រីជាន់ខ្ពស់រុស្ស៊ីនឹងជួបពិភាក្សាជាមួយសមភាគីអាមេរិក លើការស្តារទំនាក់ទំនងឡើងវិញ កិច្ចចរចារកដំណោះស្រាយដោយសន្តិវិធីចំពោះសង្គ្រាមនៅអ៊ុយក្រែន និងរៀបចំសម្រាប់ជំនួបកំពូលរវាងលោក វ្ល៉ាឌីមៀរ ពូទីន និងលោក ដូណាល់ ត្រាំ។

ស្របពេលជាមួយគ្នានោះ អ្នកនាំពាក្យវិមានក្រឹមឡាំង លោក Dmitry Peskov ប្រកាសថា រដ្ឋមន្ត្រីការបរទេសរុស្ស៊ី Sergey Lavrov និងជំនួយការគោលនយោបាយការបរទេសកំពូលរបស់លោកពូទីន គឺលោក Yury Ushakov នឹងធ្វើដំណើរទៅកាន់ទីក្រុងរីយ៉ាដ ដើម្បីជួបគណៈប្រតិភូអាមេរិក។

ចំណែកគណៈប្រតិភូរបស់អាមេរិកឯណោះវិញ គឺត្រូវដឹកនាំដោយរដ្ឋមន្ត្រីការបរទេស Marco Rubio ហើយក៏មានការចូលរួមពីសំណាក់ប្រេសិតលោក ត្រាំ ប្រចាំតំបន់មជ្ឈិមបូព៌ា Steve Witkoff និងទីប្រឹក្សាសន្តិសុខជាតិ Mike Waltz ផងដែរ។

សូមជម្រាបថា ជំនួបនេះកើតឡើង បន្ទាប់ពីលោក ត្រាំ និងពូទីន ជជែកគ្នាតាមទូរស័ព្ទកាលពីសប្តាហ៍មុន ដែលគេមើលឃើញថា ជាសញ្ញាឈានឆ្ពោះទៅដល់ការបញ្ចប់ភ្លើងសង្គ្រាមនៅអ៊ុយក្រែន ហើយវាជាការដើរផ្ទុយពីគោលនយោបាយរបស់លោក ចូ បៃដិន ដែលប្តេជ្ញាចិត្ត មិនចូលរួមជាមួយទីក្រុងមូស្គូ ដាច់ខាត៕

អត្ថបទ៖ សុខ សុវណ្ណ

ចុចអាន៖ ហ្សេលេនស្គី៖ វា​​នឹង​មាន​ហានិភ័យ​១០០%ដែល ពូទីន អាច​កាន់កាប់​អឺរ៉ុប បើ​អាមេរិក​ដក​ខ្លួន​ពី​ណាតូ