គ្រោះទឹកជំនន់នៅភាគអាគ្នេយ៍សហរដ្ឋអាមេរិក សម្លាប់មនុស្សបន្ថែមទៀត

ប្រតិបត្តិការជួយសង្គ្រោះកំពុងបន្ត ខណៈកម្រិតទឹកនៅតែបន្តកើនឡើងក្នុងរដ្ឋ Kentucky ភាគអាគ្នេយ៍សហរដ្ឋអាមេរិកនិងផ្នែកផ្សេងទៀតនៃជ្រលង Ohio និងតំបន់កណ្តាលអាត្លង់ទិក ដែលជន់លិចដោយសារឥទ្ធិពលព្យុះរដូវរងាដ៏សាហាវ រីឯតួលេខមនុស្សស្លាប់ក៏កើនដល់១៥នាក់ហើយដែរ។​ នេះបើយោងតាមការចេញផ្សាយរបស់សារព័ត៌មាន BBC នៅថ្ងៃទី១៨ខែកុម្ភៈ។

ភ្លៀងធ្លាក់ច្រើនជាងមួយខែនេះបានជន់លិចរដ្ឋ Kentucky បង្កើតជាគ្រោះទឹកជំនន់ដ៏សាហាវ និងបង្កភាពចលាចល។ លោក Andy Beshear អភិបាលរដ្ឋ Kentucky បានព្រមានថា ដ្បិតភ្លៀងបានឈប់បង្អុលមកហើយមែន ក៏ស្ថានភាពនៅតែធ្ងន់ធ្ងរ ដោយផ្លូវនៅតែត្រូវទឹកជន់លិច។

លោក Beshear បញ្ជាក់ថា មនុស្ស ២៣៧ នាក់ត្រូវបានជម្លៀសដោយឧទ្ធម្ភាគចក្រ និងទូកចេញពីអគារផ្ទះល្វែងចំនួនពីរក្នុងតំបន់ Martin County ខណៈកម្ពស់ទឹកកើនឡើងខ្លាំងកាលពីថ្ងៃចន្ទ។

ចាប់តាំងពីទឹកជំនន់បានចាប់ផ្តើម ក្រុមសង្គ្រោះបន្ទាន់បានធ្វើការជួយសង្គ្រោះជាងមនុស្សជាង ១ ០០០នាក់, ផ្លូវជាង៣៤០ ត្រូវបានបិទ និងស្ពានចំនួន ១០ នៅតំបន់ Pike County ត្រូវបានលិចទាំងស្រុងដោយសារតែទឹកជំនន់។

គួរបញ្ជាក់ថាមហន្តរាយទឹកជំនន់នេះជាគ្រោះទឹកជំនន់ចុងក្រោយបង្អស់វាយប្រហាររដ្ឋKentucky ចាប់តាំងពីឆ្នាំ២០២២មក ដែលកាលនោះសម្លាប់មនុស្សចំនួន ៤៣ នាក់។ យ៉ាងណា កម្រិតទឹកជំនន់បច្ចុប្បន្នមិនឈានដល់កម្រិតដូចទឹកជំនន់ដ៏អាក្រក់កាលពីខែកក្កដា ឆ្នាំ ២០២២ នោះទេ៕

អត្ថបទ៖ ប៊ុន​ សុភាព