ព័ត៌មានអន្ដរជាតិ

យោធាណាតូ១ម៉ឺននាក់ធ្វើសមយុទ្ធនៅតំបន់បាល់កង់

បានផុស

២ សប្តាហ៍ មុន

នៅ

ថ្ងៃអង្គារ ១៨ កុម្ភៈ ២០២៥

ដោយ

អង្គការណាតូកំពុងធ្វើសមយុទ្ធយោធាដ៏ធំបំផុតនៅក្នុងឆ្នាំ២០២៥ ដែលមានយោធាសរុបប្រមាណ១ម៉ឺននាក់ ក្នុងនោះមានទាំងទ័ពផ្លូវគោក ផ្លូវទឹក និងកងទ័ពអាកាស ពីប្រទេសសម្ព័ន្ធមិត្តណាតូចំនួន៩ដែលរៀបចំឡើងក្នុងប្រទេសរ៉ូម៉ានី និងប៊ុលហ្គារី ក្នុងតំបន់បាល់កង់។

យន្តហោះចម្បាំងប្រើក្នុងក្នុងសមយុទ្ធរបស់អង្គការណាតូ។ NATO

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការរៀបចំលំហាត់សមយុទ្ធនេះគឺផ្អែកតាមផែនការការពារជាតិថ្មីរបស់អង្គការណាតូ។ នេះតាមសេចក្តីប្រកាសរបស់អង្គការណាតូ ដែលបានអះអាងបន្ថែមថា វាត្រូវបានរៀបចំឡើងដើម្បីសាកល្បងនិងហ្វឹកហ្វឺនយោធា ដោយផ្តោតសំខាន់លើការរៀបចំផែនការនិងអនុវត្តនៃសេណារីយ៉ូច្រើនយ៉ាងនៅមុនវិបត្តិ។

ការរៀបចំសមយុទ្ធរបស់អង្គការណាតូដែលជាសម្ព័ន្ធមិត្តយោធាក្នុងតំបន់អឺរ៉ុបនេះហាក់មានភាពរង្គោះរង្គើរយ៉ាងខ្លាំងជាមួយសម្ព័ន្ធមិត្តសហរដ្ឋអាមេរិក ដែលព្រមានដកខ្លួនចេញឈប់តគាំទ្រ ដរាបណាប្រទេសក្នុងសម្ព័ន្ធមិត្តណាតូក្នុងតំបន់អឺរ៉ុបបង្កើនការចំណាយលើវិស័យការពារជាតិរបស់ពួកគេរហូតដល់៥%ធៀបផលិតផលក្នុងស្រុកសរុបរបស់ប្រទេសនិមួយៗ។

ភាពល្អក់កករចុងក្រោយរវាងបណ្តាប្រទេសមហាអំណាចនៅអឺរ៉ុប គឺនៅពេលដែលសហរដ្ឋអាមេរិកបានងាកទៅចរចាជាមួយរុស្ស៊ីតែខ្លួនឯង លើដំណោះស្រាយបញ្ចប់សង្គ្រាមនៅអ៊ុយក្រែន ដោយផាត់ភាគីអឺរ៉ុបនិងប្រទេសអ៊ុយក្រែនដែលជាសាមីប្រទេសរងគ្រោះដោយសារការឈ្លានពានរបស់រុស្ស៊ី។

ក្នុងអំឡុងពេលនៃជម្លោះវោហារស័ព្ទរវាងសហរដ្ឋអាមេរិកនិងមហាអំណាចអឺរ៉ុបចុងក្រោយនេះ ប្រទេសសំខាន់ៗក្នុងតំបន់អឺរុប រួមមាន បារាំង អាល្លឺម៉ង់ អ៊ីតាលី អេស្ប៉ាញ ហួឡង់ ដាណឺម៉ាក ជាដើម បានប្រជុំគ្នាបន្ទាន់មួយ ហើយអាចឈានទៅបង្កើតកងកម្លាំងអឺរ៉ុបថែមទៀតផង៕

ដោយ រ៉ាន់ រើយ