ព័ត៌មានអន្ដរជាតិ

ជាង៥០ពាន់លានដុល្លារសម្រាប់កសាងហ្គាហ្សាឡើងវិញ ក្រោយអ៊ីស្រាអែលញាំញីអស់១៥ខែ

បានផុស

១ ខែ មុន

នៅ

ថ្ងៃពុធ ១៩ កុម្ភៈ ២០២៥

ដោយ

Chheang

ការវាយតម្លៃថ្មីមួយដោយអង្គការសហប្រជាជាតិ សហភាពអឺរ៉ុប និងធនាគារពិភពលោក បានប៉ាន់ប្រមាណថា ការកសាងតំបន់ហ្គាហ្សា និងតំបន់ West Bank ឡើងវិញបន្ទាប់ពីជម្លោះដ៏បំផ្លិចបំផ្លាញរវាងអ៊ីស្រាអែល និងក្រុមហាម៉ាស នឹងត្រូវការប្រាក់ជាង ៥០ពាន់លានដុល្លារ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

របាយការណ៍វាយតម្លៃការខូចខាត និងតម្រូវការឆាប់រហ័សបណ្តោះអាសន្ន បង្ហាញពីចំនួនសរុប ៥៣,២ពាន់លានដុល្លារ ដែលត្រូវការសម្រាប់ការកសាងឡើងវិញក្នុងរយៈពេលមួយទសវត្សរ៍ខាងមុខ ជាមួយនឹងតម្រូវការបន្ទាន់ចំនួន ២០ពាន់លានដុល្លារ ក្នុងរយៈពេលបីឆ្នាំដំបូង។ ការវាយតម្លៃការខូចខាតគ្របដណ្តប់លើហេដ្ឋារចនាសម្ព័ន្ធ លំនៅដ្ឋាន និងសេវាកម្មសំខាន់ៗនៅក្នុងតំបន់ ដែលត្រូវបានរងផលប៉ះពាល់យ៉ាងធ្ងន់ធ្ងរដោយសង្រ្គាមរយៈពេល ១៥ខែ។

ជាការឆ្លើយតប ប្រធានាធិបតីអេហ្ស៊ីបលោក Abdel Fattah al-Sisi គ្រោងនឹងធ្វើដំណើរទៅកាន់ទីក្រុងរីយ៉ាដ ដើម្បីពិភាក្សាអំពីគំនិតផ្តួចផ្តើមកសាងឡើងវិញដែលដឹកនាំដោយអារ៉ាប់ សម្រាប់តំបន់ហ្គាហ្សា។ ផែនការនេះគាំទ្រដោយអារ៉ាប៊ីសាអូឌីត អេហ្ស៊ីប ហ្ស៊កដានី អេមីរ៉ាតអារ៉ាប់រួម និងកាតា មានបំណងផ្តល់ការរួមចំណែកក្នុងតំបន់រហូតដល់ទៅ ២០ពាន់លានដុល្លារ។ កិច្ចខិតខំប្រឹងប្រែងនេះត្រូវបានគេមើលឃើញថាជាសំណើផ្ទុយទៅនឹង គំនិតផ្តួចផ្តើមរបស់សហរដ្ឋអាមេរិកដ៏ចម្រូងចម្រាសរបស់លោកប្រធានាធិបតី ដូណាល់ ត្រាំ ដែលស្នើឲ្យមានការកសាងតំបន់ហ្គាហ្សាឡើងវិញក្រោមការគ្រប់គ្រងរបស់អាមេរិក ខណៈពេលដែលប្រជាជនប៉ាឡេស្ទីនប្រមាណ២លាននាក់នឹងត្រូវផ្លាស់ទីលំនៅចេញពីទីនោះជារៀងរហូត។

ជុំរុំភៀសខ្លួនប៉ាឡេស្ទីននៅហ្គាហ្សា (រូបថត៖ Reuters)

ជម្លោះនៅហ្គាហ្សា បានបន្សល់ទុកចំនួនមនុស្សស្លាប់យ៉ាងមហន្តរាយ ដោយមានអ្នកបាត់បង់ជីវិតជាង ៥០ ០០០នាក់។ នៅក្នុងការវិវឌ្ឍចុងក្រោយ ក្រុមហាម៉ាសបានយល់ព្រមដោះលែងចំណាប់ខ្មាំងអ៊ីស្រាអែលចំនួន៦នាក់ និងប្រគល់សាកសពមនុស្ស ៤នាក់ផ្សេងទៀតជាថ្នូរនឹងសម្បទានរបស់អ៊ីស្រាអែល ដូចជាការបន្តដោះលែងអ្នកទោសប៉ាឡេស្ទីន និងការអនុញ្ញាតឲ្យឧបករណ៍ធុនធ្ងន់មានដូចជា គ្រឿងចក្រ និងយានជំនិះធំៗចូលទៅក្នុងហ្គាហ្សាដែលចាំបាច់សម្រាប់ការសាងសង់ រុះរើ និងជួសជុលហេដ្ឋារចនាសម្ព័ន្ធ៕

ដោយ៖ ឈាង