ត្រាំ បញ្ជាឲ្យដករដ្ឋអាជ្ញានៅសល់ពីជំនាន់ ចូ បៃដិន  ចោលទាំងអស់

ប្រធានាធិបតីសហរដ្ឋអាមេរិកលោក ដូណាល់ ត្រាំ បានប្រើធម៌ក្តៅ ដោយបញ្ជាឲ្យបោសសម្អាតក្រសួងយុត្តិធម៌ តាមរយៈការដករដ្ឋអាជ្ញាដែលនៅសេសសល់ពីជំនាន់លោក ចូ បៃដិន ចោលទាំងអស់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ The Hill, ប្រមុខសេតវិមានបានបង្ហោះសារលើបណ្តាញសង្គម Truth Social កាលពីថ្ងៃអង្គារទី១៨ខែកុម្ភៈឆ្នាំ២០២៥ថា «៤ឆ្នាំមកនេះ ក្រសួងយុត្តិធម៌ត្រូវបានគេប្រើយកធ្វើជាអាវុធនយោបាយ មិនធ្លាប់មានពីមុនមកសោះ។ ដូច្នេះខ្ញុំបានបញ្ជាឲ្យបណ្តេញរដ្ឋអាជ្ញានៅសេសសល់ចោលទាំងអស់! យើងត្រូវបោសសម្អាតភ្លាមៗ និងស្តារទំនុកចិត្តមកវិញ។ យុគសម័យមាសរបស់អាមេរិក ត្រូវតែមានប្រព័ន្ធយុត្តិធម៌ដ៏ត្រឹមត្រូវ។ ចាប់ផ្តើមថ្ងៃនេះ!»។

ពាក់ព័ន្ធរឿងនេះ ក្រសួងយុត្តិធម៌អាមេរិក មិនទាន់និយាយអ្វីនោះទេ ហើយគេក៏មិនដឹងច្បាស់ដែរថាតើ រដ្ឋអាជ្ញាកាលជំនាន់លោក បៃដិន នៅសល់ប៉ុន្មាននាក់ទៀតដែលកំពុងធ្វើការក្នុងក្រសួង។

យ៉ាងណាក្តី រដ្ឋអាជ្ញាដែលតែងតាំង​ដោយ​អតីត​ប្រធានាធិបតី​គណបក្ស​ប្រជាធិបតេយ្យ​លោក ចូ បៃដិន ជាច្រើនរូបនៅទូទាំងប្រទេស បានទទួលសារជូនដំណឹងបញ្ចប់ការងារពីសេតវិមានរួចទៅហើយ កាលពីសប្តាហ៍មុន។

លុះមកដល់ថ្ងៃអង្គារ មានរដ្ឋអាជ្ញាជាបន្តបន្ទាប់បានដើរចេញពីតួនាទីដូចជារដ្ឋអាជ្ញារដ្ឋ Maine, Arizona, Texas, South Carolina និង Montana ជាដើម៕

អត្ថបទ៖ សុខ សុវណ្ណ

ចុចអាន៖ លោក ត្រាំ៖ អ៊ុយក្រែន ត្រូវតែរៀបចំការបោះឆ្នោត