យន្តហោះ២គ្រឿងទៀត បុកគ្នាលើអាកាសនៅ អាមេរិក

យន្តហោះ២គ្រឿងទៀតហើយ បានបុកគ្នាលើអាកាសនៅសហរដ្ឋអាមេរិក ប៉ុន្តែលើកនេះគ្រាន់តែជាយន្តហោះខ្នាតតូចប៉ុណ្ណោះ ប៉ុន្តែយ៉ាងណាក៏បណ្តាលឲ្យមនុស្សស្លាប់ ២នាក់ផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ Boston Herald, ហេតុការណ៍នេះកើតឡើងនៅរដ្ឋ Arizona នៅពេលយន្តហោះស៊ីវិលមួយគ្រឿងជាប្រភេទ Cessna 172S បានហោះទៅបុកយន្តហោះមួយគ្រឿងទៀតជាប្រភេទ Lancair 360 MK នៅក្បែរអាកាសយានដ្ឋាន Marana ជាយក្រុង Tucson នាវេលាម៉ោង ៨:២៨នាទី ព្រឹកថ្ងៃទី១៩ខែកុម្ភៈ (ពេលវេលានៅអាមេរិក)។

តាមការបញ្ជាក់ពីក្រុមអ្នកស៊ើបអង្កេតសុវត្ថិភាពដែនអាកាសសហព័ន្ធ, យន្តហោះទាំងពីរជាប្រភេទម៉ាស៊ីនមួយ មានផ្ទុកមនុស្ស២នាក់ដូចគ្នា ហើយនៅពេលកើតឧបទ្ទវហេតុ អ្នកជិះក្នុងយន្តហោះ Cessna មិនមានគ្រោះថ្នាក់អ្វីទេ ប៉ុន្តែយន្តហោះ Lancair​ បានធ្លាក់ផ្ទុះឆេះ បណ្តាលឲ្យស្លាប់មនុស្ស២នាក់។

មកទល់ពេលនេះ គេនៅមិនទាន់ដឹងច្បាស់ឡើយអំពីមូលហេតុដែលនាំឲ្យយន្តហោះទាំងពីរ បុកគ្នាលើអាកាស ប៉ុន្តែក្រុមមន្ត្រីបានបើកការស៊ើបអង្កេតរួចហើយ។

សូមជម្រាបថា នេះគឺជាឧបទ្ទវហេតុចុងក្រោយបង្អស់ដែលញាំញីវិស័យអាកាសចរណ៍ ក្នុងឆ្នាំ២០២៥។ គ្រោះថ្នាក់ដំបូងគឺចាប់ផ្តើមនៅថ្ងៃទី២៩ខែមករា ពេលយន្តហោះដឹកអ្នកដំណើរ CRJ700 និងឧទ្ធម្ភាគចក្រកងទ័ពអាមេរិក បុកគ្នានៅភាគខាងត្បូងរដ្ឋធានីវ៉ាស៊ីនតោន រួចក៏ធ្លាក់ចូលទន្លេ សម្លាប់មនុស្ស៦៧នាក់។

បន្ទាប់មក មានឧប្បត្តិហេតុអាកាសចរណ៍ធំៗចំនួនបួនទៀត ដោយក្នុងនោះរួមមានការធ្លាក់យន្តហោះពេទ្យនៅទីក្រុង Philadelphia សម្លាប់មនុស្ស៦នាក់, ធ្លាក់យន្តហោះនៅជិតទីក្រុង Nome នៃរដ្ឋ Alaska សម្លាប់មនុស្ស១០នាក់, យន្តហោះឯកជនមួយគ្រឿងរអិលចេញពីផ្លូវរត់នៅ Scottsdale រដ្ឋ Arizona សម្លាប់អាកាសយានិក និងយន្តហោះ Delta Air Lines ដែលក្រឡាប់ផ្ងារជើងបន្ទាប់ពីចុះចតនៅទីក្រុង Toronto នៃប្រទេសកាណាដា៕

អត្ថបទ៖ សុខ សុវណ្ណ

ចុចអាន៖ យន្តហោះ២គ្រឿងទៀត បុកគ្នានៅ អាមេរិក