ព័ត៌មានអន្ដរជាតិ

រដ្ឋមន្ត្រីការពារថៃបំភ្លឺជាថ្មីម្តងទៀតថា សម្ដេចធិបតី ហ៊ុន ម៉ាណែត មិនបានថ្លែងសុំទោសថៃជុំវិញបញ្ហាប្រាសាទតាមាន់ធំនោះទេ

បានផុស

១ ខែ មុន

នៅ

ថ្ងៃព្រហស្បតិ៍ ២០ កុម្ភៈ ២០២៥

ដោយ

នៅថ្ងៃទី២០ ខែកុម្ភៈ ឆ្នាំ២០២៥នេះ លោក ភូមិថាំ វេឆាយ៉ាឆៃ (Phumtham Vejjayachai) ឧបនាយករដ្ឋមន្ត្រីនិងជារដ្ឋមន្ត្រីក្រសួងការពារជាតិថៃ បានបំភ្លឺអំពីករណីដែលសារព័ត៌មានមួយចំនួនចុះផ្សាយថា សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជាបានថ្លែងសម្តែងការសោកស្តាយ និងសុំទោសថៃចំពោះហេតុការណ៍នៅប្រាសាទតាមាន់ធំ។

លោកថា ព័ត៌មានដែលបានចុះផ្សាយទាំងនោះមិនត្រឹមត្រូវនោះទេ ដែលថា “ខ្ញុំនិយាយថា លោក ហ៊ុន ម៉ាណែត ទូរសព្ទមកសុំទោសខ្ញុំ” ដែលសារព័ត៌មានខ្លះបានចុះផ្សាយ ហើយវាក្លាយជាបញ្ហាសម្រាប់កម្ពុជា ព្រោះគេ(កម្ពុជា)មានអារម្មណ៍ថា គេមិនបានធ្វើនោះទេ។ ប្រៀបដូចជាយើងចុះផ្សាយព័ត៌មានគ្មានការពិត។

លោក ភូមិថាំ បានបន្តថា ជុំវិញបញ្ហានេះ មេបញ្ជាការយោធភូមិភាគ២ថៃក៏បានតវ៉ាហើយថា រឿងនេះមិនត្រឹមត្រូវនោះទេ ហើយខ្លួន(ភូមិថាំ)បានផ្តល់បទសម្ភាសន៍ជាមួយប្រព័ន្ធផ្សព្វផ្សាយថា តាមពិតទៅរឿងនេះមិនគួរមានអ្វីកើតឡើង និងមិនគួរព្រួយបារម្ភនោះទេ ពីព្រោះការដែលភ្ញៀវទេសចរទៅលេងហើយធ្វើសកម្មភាពអ្វីមួយក៏អាចក្លាយជាបញ្ហាបានដែរ។ ប៉ុន្តែមេបញ្ជាការយោធាគ្រប់លំដាប់ថ្នាក់របស់កម្ពុជានិងថៃអាចជជែកគ្នាបានដោយមិនមានបញ្ហាអ្វីនោះទេ។ ដូច្នេះអ្វីដែលលោកចង់កែតម្រូវព័ត៌មាននោះ គឺសម្ដេចធិបតី ហ៊ុន ម៉ាណែត មិនបានសុំទោសថៃទេ ហើយរឿងនេះក៏មិនមានអ្វីនិយាយឬរៀបរាប់ច្រើនដែរ ពោលគឺលោកគ្រាន់តែចង់ឱ្យរឿងនេះវារលូនប៉ុណ្ណោះ។ លោកបានបញ្ជាក់រួចថា ទំនាក់ទំនងរវាងថៃនិងកម្ពុជាក្នុងគ្រប់កម្រិតនិយាយគ្នាបានយ៉ាងល្អជាធម្មតា ទើបលោកសូមឱ្យជួយដោះស្រាយត្រង់ចំណុចនេះ បើមិនដូច្នោះទេវានឹងក្លាយជាបញ្ហា ព្រោះឥឡូវនេះយើងក៏បានដោះស្រាយបញ្ហាក្រុមឧក្រិដ្ឋជនឆបោកតាមអនឡាញផងដែរ ដែលទាមទារឱ្យមានការសហការពីគ្រប់ភាគី ប៉ុន្តែប្រសិនបើមានព័ត៌មានចុះផ្សាយហើយបង្កជាបញ្ហា លោកយល់ថា ប្រព័ន្ធផ្សព្វផ្សាយប្រហែលជាមិនមានការតាំងចិត្តនោះទេ ឬផ្នែកខ្លះអាចមានភាពមិនត្រឹមត្រូវក្នុងការនិយាយ ហើយនឹងមានព័ត៌មានបែបនេះជារឿយៗ ហើយលោកក៏មិនសប្បាយចិត្តនោះដែរ៕

ប្រភព ៖ nationtv