​​​ម្ចាស់​ភោជនីយដ្ឋាន​ល្បី​ឈ្មោះ​​នៅ​ក្រុងឡុង​ដ៍​បាត់របស់​ តែមិនប្តឹងប៉ូលិស​​

រូបសត្វឆ្មាជិត៥០០​ក្បាលត្រូវបានលួចក្នុងរយៈពេលមួយសប្តាហ៍ពីភោជនីយដ្ឋាន Gordon Ramsay ដែលទើបបើកថ្មីក្នុងទីក្រុងឡុងដ៍។ នេះបើយោងតាមការចេញផ្សាយរបស់កាសែត The Guardian នៅថ្ងៃទី២១ខែកុម្ភៈនេះ។

ម្ចាស់ភោជនីយដ្ឋានអាយុ៥៨ឆ្នាំដែលជាមេចុងភៅដ៏ល្បី លោក Gordon James Ramsay ថ្មីៗនេះបានបើកដំណើរការភោជនីយដ្ឋានឈ្មោះថា Lucky Cat 22 Bishopsgate នៅក្នុងអគារខ្ពស់បំផុតមួយក្នុងទីក្រុងឡុងដ៍ ដែលដាក់តាំង​បង្ហាញពីរូបចម្លាក់ឆ្មាជប៉ុនដែលហៅថា maneki-neko ជាច្រើននៅក្នុងហាង។

លោក បានប្រាប់កម្មវិធី The Jonathan Ross Show របស់ ITV ថា៖«មានចោរលួចរូបសត្វឆ្មាចំនួន​៤៧៧រូបកាល​ពីសប្តាហ៍មុន»។ ដោយរូបឆ្មានីមួយៗមានតម្លៃ៥ដុល្លារជាង ដូចនេះចំនួននេះមានន័យថា លោក Ramsay ខាតបង់ប្រាក់ចំនួន២៧១៦ដុល្លារក្នុងអំឡុងពេលមួយសប្តាហ៍។

បើតាមប៉ូលិសទីក្រុងឡុងដ៍បាននិយាយថា ខ្លួនមិនបានទទួលរបាយការណ៍ណាមួយនៃការលួចពីភោជនីយដ្ឋាននោះទេ។ ទោះយ៉ាងណាប៉ូលិសកំពុងធ្វើការស៉ើបអង្គេតពីរបៀបនៃការលួចនេះ។

រូបចម្លាក់ maneki-neko ត្រូវបានមនុស្សមួយចំនួននៅក្នុងវប្បធម៌ជប៉ុនជឿថា នាំមកនូវសំណាងល្អ និងផ្ដល់លក្ខណៈពិសេសទាក់ទាញនៅក្នុងភោជនីយដ្ឋានផងដែរ។

គួរបញ្ជាក់ថា លោក​ Gordon James Ramsay គឺជាមេចុងភៅដ៏ល្បីល្បាញជនជាតិអង់គ្លេស ម្ខាស់ភោជនីយដ្ឋាន ពិធីករទូរទស្សន៍ និងជាអ្នកនិពន្ធ។ លោកត្រូវបានគេស្គាល់ក្នុងកម្មវិធីទូរទស្សន៍ Hell’s Kitchen និង Ramsay’s Kitchen Nightmares Reality TV។

ភោជនីយដ្ឋានរបស់គាត់គឺភោជនីយដ្ឋាន Gordon Ramsay ត្រូវបានបង្កើតឡើងក្នុងឆ្នាំ១៩៩៧ និងមានជាង៨០ ទីតាំងនៅទូទាំងពិភពលោកហើយបានទទួលរង្វាន់ ១៧ Michelin​ Stars ផងដែរ៕

អត្ថបទ៖ ប៊ុន សុភាព