ព័ត៌មានអន្ដរជាតិ

មន្ត្រីយោធាកំពូលពីររូបរបស់អាមេរិក ត្រូវបណ្តេញចេញពីតំណែង

បានផុស

១ ខែ មុន

នៅ

ថ្ងៃសៅរ៍ ២២ កុម្ភៈ ២០២៥

ដោយ

មិនត្រឹមតែរដ្ឋបាលស៊ីវិលដែលរងផលប៉ះពាល់ដោយសារកំណែទម្រង់រដ្ឋបាលសហព័ន្ធរបស់រដ្ឋបាលរបស់លោក ដូណាល់ ត្រាំ នៅក្នុងជួរកងទ័ពក៏រងផលប៉ះពាល់នេះដែរ។ យោងសេចក្តីរាយការណ៍របស់សារព័ត៌មាន New York Times, រដ្ឋមន្ត្រីក្រសួងការពារជាតិសហរដ្ឋអាមេរិក លោក Pete Hegseth ដែលទើបទទួលបានការអនុម័តយល់ព្រមពីព្រឹទ្ធសភាអាមេរិកសម្រាប់ដំណែងរដ្ឋមន្ត្រីការពារជាតិអាមេរិកជំនួសលោក Lloyd Austin បានបណ្តេញប្រមុខយោធាជាន់ខ្ពស់អាមេរិកសំខាន់ៗពីររូប។

ឧត្តមសេនីយផ្កាយបួន Charles Brown Jr. និង ឧត្តមនាវីឯក Lisa Franchetti ដែលត្រូវបណ្តេញចេញ។ រូបភាព៖ DoD

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សេចក្តីរាយការណ៍នោះ បានឲ្យដឹងថា រដ្ឋមន្ត្រីការពារជាតិ Pete Hegseth បាននិយាយថា គាត់កំពុងបណ្ដេញ ឧត្តមនាវីឯក Lisa Franchetti ដែលជាមន្ត្រីស្រីដំបូងគេដែលឡើងកាន់តំណែងជាប្រធានប្រតិបត្តិការកំពូលរបស់កងនាវាចរ។ ឧត្តមនាវីឯក Franchettii បានចំណាយពេលប្រហែលពាក់កណ្តាលនៃអាជីព៤០ឆ្នាំរបស់គាត់នៅឯសមុទ្រ ដោយបញ្ជានាវាពិឃាត ក្រុមនាវាផ្ទុកយន្តហោះពីរ និងកងនាវាទីប្រាំមួយរបស់សហរដ្ឋអាមេរិក។

ក្នុងសេចក្តីរាយការណ៍ដាច់ដោយឡែកមួយទៀត ប្រធានាធិបតីសហរដ្ឋអាមេរិក លោក ដូណាល់ ត្រាំ បានបណ្តេញមន្ត្រីយោធាជាន់ខ្ពស់របស់ប្រទេសមហាអំណាចនេះ ដែលជាប្រពៃណី តួនាទីថ្នាក់ដឹកនាំយោធាជាន់ខ្ពស់នេះត្រូវស្ថិតនៅនឹងដដែល ទោះបីជាការផ្លាស់ប្តូរក្បាលម៉ាស៊ីនរដ្ឋបាលសហព័ន្ធ។

សេចក្តីរាយការណ៍នោះ បានឲ្យដឹងថា ឧត្តមសេនីយផ្កាយបួន Charles Brown Jr. ដែលជាអ្នកបើកយន្តហោះចម្បាំងត្រូវគេស្គាល់ថា C.Q. ដែលបានក្លាយជាជនជាតិអាមេរិកដើមកំណើតអាហ្រ្វិកទី២ ដែលកាន់តំណែងជាប្រធាននោះ។

ការដកតំណែងរបស់ឧត្តមសេនីយ Charles Brown Jr. នឹងត្រូវជំនួសមកវិញដោយឧត្តមសេនីយទ័ពអាកាសផ្កាយបីដែលចូលនិវត្តន៍គឺ Dan Caine ដែលស្និទ្ធស្នាលចំពោះប្រធានាធិបតីដូណាល់ត្រាំ នៅពេលដែលពួកគេបានជួបគ្នានៅអ៊ីរ៉ាក់កាលពី៦ឆ្នាំមុន។

រដ្ឋបាលលោកដូណាល់ ត្រំា ក្នុងអាណត្តិទី២របស់គាត់បានបង្ហាញការកែទម្រង់យ៉ាងខ្លាំងក្នុងរដ្ឋបាលសហព័ន្ធ និងនាំទៅដល់ផលប៉ះពាល់បុគ្គលិករាប់ម៉ឺន រហូតដល់រាប់សែននាក់ តាមរយៈការលុបចោលភ្នាក់ងាររដ្ឋសហព័ន្ធ និងការបណ្តេញបុគ្គលិកដែលជាប់កិច្ចសន្យា៕