ព័ត៌មានអន្ដរជាតិ
យន្តហោះក្រុមហ៊ុន American Airlines ផ្ទុកអ្នកដំណើរ ១៩៩នាក់ រងការគំរាមបំផ្ទុះគ្រាប់បែក នៅលើអាកាស
យន្តហោះមួយគ្រឿងរបស់ក្រុមហ៊ុន American Airlines ផ្ទុកអ្នកដំណើរចំនួន១៩៩នាក់និងក្រុមអាកាសយានិក១៥នាក់ បានហោះចេញពីអាកាសយានដ្ឋានអន្តរជាតិ John F. Kennedy ក្នុងដំណើរឆ្ពោះទៅកាន់អាកាសយានដ្ឋានអន្តរជាតិ Indira Gandhi ក្នុងទីក្រុង ញូវដែលី នៃប្រទេសឥណ្ឌា ប៉ុន្តែយន្តហោះនេះ ត្រូវបង្ខំចិត្តហោះបកក្រោយទៅចតនៅអាកាសយានដ្ឋាន Vinci Rome Fiumicino នៃប្រទេសអ៊ីតាលីវិញ ដោយសារតែមានការគំរាមបំផ្ទុះគ្រាប់បែកនៅលើយន្តហោះ។

តាមការបញ្ជាក់ពីរដ្ឋបាលអាកាសចរណ៍សហព័ន្ធអាមេរិក (FAA), យន្តហោះប្រភេទ Boeing 787-9 Dreamliner មួយគ្រឿងនេះ បានហោះចេញពីអាកាសយានដ្ឋានអន្តរជាតិ John F. Kennedy នៅរសៀលថ្ងៃអាទិត្យ ហើយក៏កើតមានការគំរាមបំផ្ទុះគ្រាប់បែកតាមអ៊ីម៉ែលនៅលើសមុទ្រ Caspian។
ដូច្នេះហើយ ជើងហោះហើរ AA 292 មួយនេះ ក៏ត្រូវបង្ខំចិត្តហោះបកក្រោយ ខណៈអ៊ីតាលី ក៏បញ្ជូនយន្តហោះចម្បាំងទៅអមដំណើរផងដែរ ហើយក្រោយមកវាក៏ចុះចតក្នុងទីក្រុងរ៉ូម ដោយសុវត្ថិភាព នៅម៉ោង ៥:២២នាទីល្ងាច។

ជុំវិញករណីនេះ ក្រុមហ៊ុន American Airlines បានចេញសេចក្តីថ្លែងការណ៍ថា «សុវត្ថិភាពនិងសន្តិសុខគឺជាអាទិភាពចម្បងរបស់យើង ហើយយើងសូមអរគុណអតិថិជន សម្រាប់ការអធ្យាស្រ័យ»។
ស្របពេលជាមួយគ្នានោះ ក្រុមហ៊ុនមិនប្រាប់ឡើយថាតើសារគំរាមបំផ្ទុះគ្រាប់បែកនោះ ចេញមកពីណា ព្រោះនេះគឺជាបញ្ហារសើប ដែលត្រូវលាក់ជាការសម្ងាត់សិន។
សូមបញ្ជាក់ថា នេះគឺជាបញ្ហាមួយទៀតដែលក្រុមហ៊ុន American Airlines ជួបប្រទះក្នុងរយៈពេលត្រឹម២ខែ។ កាលពីខែមករា យន្តហោះរបស់ក្រុមហ៊ុននេះ ដែលផ្ទុកដំណើរ៦០នាក់ និងអាកាសយានិក ៤នាក់ បានបុកជាមួយឧទ្ធម្ភាគចក្រ Black Hawk របស់កងទ័ពដែលផ្ទុកទាហានបីនាក់ នៅជិតអាកាសយានដ្ឋានជាតិ Reagan ក្នុងទីក្រុង វ៉ាស៊ីនតោន ឌីស៊ី ហើយធ្លាក់ចូលក្នុងទន្លេ Potomac បណ្តាលឲ្យមនុស្សស្លាប់ទាំងអស់៕
អត្ថបទ៖ សុខ សុវណ្ណ
ចុចអាន៖ យន្តហោះដឹករដ្ឋមន្ត្រីការបរទេសអាមេរិក ទៅអាល្លឺម៉ង់ ជួបបញ្ហាលើអាកាស

-
ព័ត៌មានអន្ដរជាតិ១០ ម៉ោង ago
កម្មករសំណង់ ៤៣នាក់ ជាប់ក្រោមគំនរបាក់បែកនៃអគារ ដែលរលំក្នុងគ្រោះរញ្ជួយដីនៅ បាងកក
-
សន្តិសុខសង្គម២ ថ្ងៃ ago
ករណីបាត់មាសជាង៣តម្លឹងនៅឃុំចំបក់ ស្រុកបាទី ហាក់គ្មានតម្រុយ ខណៈបទល្មើសចោរកម្មនៅតែកើតមានជាបន្តបន្ទាប់
-
ព័ត៌មានអន្ដរជាតិ៤ ថ្ងៃ ago
រដ្ឋបាល ត្រាំ ច្រឡំដៃ Add អ្នកកាសែតចូល Group Chat ធ្វើឲ្យបែកធ្លាយផែនការសង្គ្រាម នៅយេម៉ែន
-
ព័ត៌មានជាតិ២០ ម៉ោង ago
បងប្រុសរបស់សម្ដេចតេជោ គឺអ្នកឧកញ៉ាឧត្តមមេត្រីវិសិដ្ឋ ហ៊ុន សាន បានទទួលមរណភាព
-
ព័ត៌មានជាតិ៤ ថ្ងៃ ago
សត្វមាន់ចំនួន ១០៧ ក្បាល ដុតកម្ទេចចោល ក្រោយផ្ទុះផ្ដាសាយបក្សី បណ្តាលកុមារម្នាក់ស្លាប់
-
កីឡា១ សប្តាហ៍ ago
កញ្ញា សាមឿន ញ៉ែង ជួយឲ្យក្រុមបាល់ទះវិទ្យាល័យកោះញែក យកឈ្នះ ក្រុមវិទ្យាល័យ ហ៊ុនសែន មណ្ឌលគិរី
-
ព័ត៌មានអន្ដរជាតិ៥ ថ្ងៃ ago
ពូទីន ឲ្យពលរដ្ឋអ៊ុយក្រែនក្នុងទឹកដីខ្លួនកាន់កាប់ ចុះសញ្ជាតិរុស្ស៊ី ឬប្រឈមនឹងការនិរទេស
-
ព័ត៌មានអន្ដរជាតិ៣ ថ្ងៃ ago
តើជោគវាសនារបស់នាយករដ្ឋមន្ត្រីថៃ «ផែថងថាន» នឹងទៅជាយ៉ាងណាក្នុងការបោះឆ្នោតដកសេចក្តីទុកចិត្តនៅថ្ងៃនេះ?