សហភាពអឺរ៉ុប នឹងរៀបចំកិច្ចប្រជុំកំពូលបន្ទាន់ស្តីពីអ៊ុយក្រែន

សហភាពអឺរ៉ុប បានប្រកាស​​ពី​កិច្ចប្រជុំកំពូលបន្ទាន់មួយ ដែលគ្រោងធ្វើឡើងនៅថ្ងៃទី​៦​ខែមីនា ដើម្បីដោះស្រាយវិបត្តិដែលកំពុងកើតមាននៅក្នុងប្រទេសអ៊ុយក្រែន និងកង្វល់សន្តិសុខ​កាន់​តែ​ធំ​ឡើង​​របស់​អឺរ៉ុប។

ប្រធានក្រុមប្រឹក្សាអឺរ៉ុបលោក Antonio Costa បានសង្កត់ធ្ងន់លើភាពបន្ទាន់នៃ​កិច្ច​ប្រជុំ​នេះ ដោយពណ៌នាថាវាជាពេលវេលាកំណត់សម្រាប់ស្ថិរភាពរបស់អ៊ុយក្រែន និងអឺរ៉ុប។

ការ​សម្រេច​ចិត្ត​​រៀបចំ​កិច្ច​ប្រជុំ​បន្ទាន់ ធ្វើឡើងបន្ទាប់ពីមានការវិវឌ្ឍនាពេលថ្មីៗនេះ រួមទាំង​ការ​ចាប់ផ្តើម​របស់ប្រធានាធិបតីអាមេរិក លោក ដូណាល់ ត្រាំ ក្នុងការចរចាដោយផ្ទាល់ជាមួយរុស្ស៊ី ក្នុងគោលបំណងដោះស្រាយជម្លោះ។ គួរកត់សម្គាល់ថា កិច្ចពិភាក្សាទាំងនេះបានដកចេញទាំងតំណាងអ៊ុយក្រែន និងសហភាពអឺរ៉ុប ដែលជំរុញ​ឲ្យ​មេដឹកនាំអឺរ៉ុប​មាន​ក្ដី​ព្រួយ​បារម្ភ​​ជា​ខ្លាំង។

ប្រធានាធិបតីបារាំងលោក Emmanuel Macron បានកោះប្រជុំបន្ទាន់មួយនៅទីក្រុងប៉ារីសកាលពីសប្តាហ៍​មុន ដោយនាំយកមេដឹកនាំមកពីប្រទេសអាល្លឺម៉ង់ ចក្រភពអង់គ្លេស អ៊ីតាលី ប៉ូឡូញ អេស្បាញ ហូឡង់ ដាណឺម៉ាក​ និង​​តំណាង​​នៃ​អង្គការ​​​​​ណាតូ (អូតង់)​ និងតំណាង​​សហភាពអឺរ៉ុប។

កិច្ចពិភាក្សាផ្តោតលើកិច្ចខិតខំប្រឹងប្រែងរក្សាសន្តិភាពដែលមានសក្តានុពល និងផលប៉ះពាល់នៃកិច្ចសន្ទនារវាងអាមេរិក និងរុស្ស៊ី។ ទោះជាយ៉ាងណាក៏ដោយ ពួក​គេ​មិនបានឈានដល់ការឯកភាពគ្នាលើការដាក់ពង្រាយកងទ័ពរក្សាសន្តិភាពអឺរ៉ុប ដោយគ្មានការគាំទ្រពីសហរដ្ឋអាមេរិកនោះទេ។

កិច្ចប្រជុំកំពូលនៅខែមីនាខាងមុខនេះ មានគោលបំណងពង្រឹងជំហររបស់​សហភាព​អឺរ៉ុប លើការគាំទ្រអ៊ុយក្រែន ពង្រឹងសមត្ថភាពការពាររបស់អឺរ៉ុប និងធានាថា អឺរ៉ុបដើរតួនាទីសំខាន់ក្នុងការចរចាសន្តិភាព។ នៅពេលដែលស្ថានការណ៍បន្តវិវឌ្ឍ សហភាពអឺរ៉ុបនៅតែប្តេជ្ញាចិត្តរក្សាអធិបតេយ្យភាព និងសន្តិសុខក្នុងតំបន់របស់អ៊ុយក្រែន៕

ដោយ៖ ឈាង