ព័ត៌មានអន្ដរជាតិ

មនុស្សរាប់ម៉ឺននាក់ចូលរួមពិធីបុណ្យសពដ៏ធំរបស់មេដឹកនាំក្រុមហេសបូឡា

បានផុស

១ ខែ មុន

នៅ

ថ្ងៃចន្ទ ២៤ កុម្ភៈ ២០២៥

ដោយ

មនុស្សរាប់ម៉ឺននាក់ចូលរួមពិធីបុណ្យសពមេដឹកនាំក្រុមហេសបូឡា លោក Hassan Nasrallah ដែលបានពន្យារជិតប្រាំខែ បន្ទាប់ពីគាត់ត្រូវបានសម្លាប់នៅក្នុងការវាយប្រហារតាមអាកាសរបស់អ៊ីស្រាអែលនៅជាយក្រុងភាគខាងត្បូងទីក្រុង Beirut ប្រទេសលីបង់។ នេះបើយោងតាមការចេញផ្សាយរបស់សារព័ត៌មាន CNN នៅថ្ងៃទី២៤ខែកុម្ភៈនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកកាន់ទុក្ខរាប់ម៉ឺននាក់ដ៏ច្រើនកកកុញពេញកីឡដ្ឋាន Camille Chamoun Sports City ដ៏ធំបំផុតរបស់ទីក្រុង Beirut ជាកន្លែងដែលពិធីប្រារព្ធឡើង និងក៏មានការប្រមូលផ្តុំនៅតាមផ្លូវជុំវិញ។ ក្បួនដង្ហែដ៏ធំមួយបានតាមពីក្រោយមឈូសរបស់មេដឹកនាំទៅកាន់ទីសក្ការបូជាមួយនៅភាគខាងត្បូងទីក្រុងBeirut ជាកន្លែងដែលត្រូវបញ្ចុះសាកសពលោក។

បើតាមអគ្គលេខាធិការ ក្រុមហេសបូឡា លោក Naim Qassem បានថ្លែងទៅកាន់អ្នកកាន់ទុក្ខ និងបានប្តេជ្ញាថានឹងបន្តដើរតាមផ្លូវរបស់លោក Nasrallah «ទោះបីជាយើងទាំងអស់គ្នាត្រូវបានសម្លាប់ក៏ដោយ»។

ការស្លាប់របស់លោក Nasrallah គឺជាការបញ្ចប់យុគសម័យមួយសម្រាប់ក្រុមសកម្មប្រយុទ្ធដែលបានកើនឡើងពីក្រុមយុទ្ធជនទ័ពព្រៃដែលពោរពេញដោយកំហឹងក្នុងឆ្នាំ១៩៨២ទៅជាកម្លាំងក្នុងតំបន់ដែលឥទ្ធិពលរបស់វាលាតសន្ធឹងលើប្រទេសយ៉ាងហោចណាស់បួន។

លោកNasrallah ត្រូវបានជាប់ឆ្នោតជាមេដឹកនាំក្រុមប្រដាប់អាវុធក្នុងឆ្នាំ ១៩៩២ នៅអាយុ ៣២ ឆ្នាំ។ លោកបានបន្តធ្វើជាអធិបតីក្នុងយុទ្ធនាការទ័ពព្រៃនៅភាគខាងត្បូងប្រទេសលីបង់ ដែលនៅទីបំផុតបានបណ្ដេញកងកម្លាំងអ៊ីស្រាអែលចេញពីប្រទេសក្នុងឆ្នាំ ២០០០ ដោយបញ្ចប់ការកាន់កាប់រយៈពេល២២ឆ្នាំរបស់អ៊ីស្រាអែផល។ ក្នុងឆ្នាំ ២០០៦ លោកក៏បានដឹកនាំក្រុមសកម្មប្រយុទ្ធ ហេសបូឡា ក្នុងសង្គ្រាមប្រឆាំងអ៊ីស្រាអែល ដែលបានបំផ្លិចបំផ្លាញផ្នែកជាច្រើននៃប្រទេសលីបង់។

យោងតាមប្រព័ន្ធផ្សព្វផ្សាយក្នុងស្រុក និងរដ្ឋបានឱ្យដឹងថា ក្នុងអំឡុងពេលពិធីបុណ្យសពនេះ អ៊ីស្រាអែលបានវាយប្រហារទីតាំងជាច្រើននៅភាគខាងត្បូង និងភាគខាងកើតប្រទេសលីបង់ផងដែរ។ បើតាមយោធាអ៊ីស្រាអែលបានអះអាងថាបានវាយប្រហារឃ្លាំងស្តុកអាវុធរបស់ក្រុមហេសបូឡា។

គួររម្លឹកថាកិច្ចព្រមព្រៀងឈប់បាញ់គ្នារវាងក្រុមហេបូឡា និងអ៊ីស្រាអែលត្រូវបានចុះហត្ថលេខាកាលពីខែវិច្ឆិកាឆ្នាំមុន ដោយបញ្ចប់សង្គ្រាមរយៈពេលជាច្រើនខែ ប៉ុន្តែនៅតែមានការវាយប្រហារគ្នាទៅវិញទៅមកជារឿយៗ។

ឲ្យតែមានសង្រ្គាមផ្ទុះឡើងនៅក្នុងប្រទេសស៊ីរី អ៊ីរ៉ាក់ និងយេម៉ែន កងកម្លាំងរបស់លោក Nasrallah តែងធ្វើអន្តរាគមន៍ក្នុងនាមក្រុមដែលគាំទ្រដោយអ៊ីរ៉ង់ ដោយបានបង្រួបបង្រួមការគាំទ្ររបស់ទីក្រុងតេអេរ៉ង់។ ប៉ុន្តែសំណាងរបស់ពួកហេសបូឡាបានផ្លាស់ប្តូរបន្ទាប់ពីការវាយប្រហារដ៏គួរឱ្យភ្ញាក់ផ្អើលដែលដឹកនាំដោយហាម៉ាសលើអ៊ីស្រាអែលដែលបានសម្លាប់មនុស្សប្រហែល ១២០០នាក់នៅថ្ងៃទី ៧ ខែតុលាឆ្នាំ ២០២៣។

បន្ទាប់ពីការវាយប្រហារនេះក្រុមហេបូឡាបានបើកការវាយប្រហារដោយគ្រាប់រ៉ុក្កកែតទៅលើអ៊ីស្រាអែលដើម្បីគាំទ្រក្រុមហាម៉ាសដោយបង្ខំឲ្យជម្លៀសប្រជាជនអ៊ីស្រាអែលប្រហែល៦០០០០ នាក់ ខណៈអ្នកស្រុកលីបង់ប្រហែល ១០០០០០ នាក់នៅភាគខាងត្បូងក៏ត្រូវបានផ្លាស់ទីលំនៅនៅក្នុងការវាយប្រហាររបស់អ៊ីស្រាអែលផងដែរ។ លោក Nasrallah បានហៅវាថាជា «រណសិរ្សគាំទ្រ» ដែលមានគោលបំណងដាក់សម្ពាធលើអ៊ីស្រាអែល ឱ្យបញ្ឈប់ការវាយលុកសងសឹករបស់ខ្លួននៅក្នុងតំបន់ហ្គាហ្សាដែកបានសម្លាប់មនុស្សជាង៤៨០០០នាក់៕