ពូទីន៖ កងទ័ពរុស្ស៊ីប្រយុទ្ធនៅសមរភូមិជាមួយអ៊ុយក្រែន គឺដើម្បី យុត្តិធម៌

ក្នុងទិវាអ្នកការពារមាតុភូមិកាលពីថ្ងៃអាទិត្យទី២៣ខែកុម្ភៈឆ្នាំ២០២៥ ប្រធានាធិបតីរុស្ស៊ីលោក វ្ល៉ាឌីមៀរ ពូទីន បានជួបជាមួយឥស្សរជនក្នុងជួរកងទ័ព ហើយបានកោតសរសើរមិនដាច់ពីមាត់ចំពោះវីរភាពដ៏អង់អាចរបស់ពលទាហាន នៅសមរភូមិ ដោយបញ្ជាក់ថា ពួកគេកំពុងប្រយុទ្ធដើម្បីយុត្តិធម៌និងអនាគតរបស់ប្រទេសរុស្ស៊ី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ RT, ក្នុងឱកាសនោះ មេដឹកនាំរុស្ស៊ីថ្លែងថា «អ្នកចូលរួមប្រតិបត្តិការយោធាពិសេសនៅអ៊ុយក្រែន គឺជាអ្នកការពារកេរដំណែលដ៏រុងរឿងរបស់ដូនតាយើង។ ពួកគេបង្ហាញភាពក្លាហាន ការពារប្រទេសរុស្ស៊ី និងតស៊ូដើម្បីការពិត យុត្តិធម៌ សន្តិភាព និងអនាគតរបស់ប្រជាជនយើង»។

ការអបអរទិវានេះកើតឡើងចំពេលរុស្ស៊ី បើកការវាយប្រហារដោយយន្តហោះគ្មានមនុស្សបើក (ដ្រូន) ​ជាទ្រង់ទ្រាយធំបំផុតមិនធ្លាប់មានសោះចាប់តាំងពីសង្គ្រាមជាមួយអ៊ុយក្រែន ផ្ទុះឡើងកាលពី៣ឆ្នាំមុន។

សារព័ត៌មាន Kyiv Independent រាយការណ៍ថា រុស្ស៊ីបានបញ្ជូនយន្តហោះគ្មានមនុស្សបើកចំនួន២៦៧គ្រឿង វាយប្រហារទូទាំងប្រទេសអ៊ុយក្រែន កាលពីរាត្រីថ្ងៃអាទិត្យ ប៉ុន្តែខែលការពារដែនអាកាស បាញ់ទម្លាក់បានត្រឹម១៣៨គ្រឿងប៉ុណ្ណោះ។

ទោះបីជាយ៉ាងណាក៏ដោយ មិនមាននរណាម្នាក់បាត់បង់ជីវិតឡើយ ប៉ុន្តែមានមនុស្សរងរបួសចំនួន៣នាក់។

មិនមែនតែយន្តហោះ​គ្មាន​មនុស្ស​បើកទេ ​រុស្ស៊ី​ក៏​​បាញ់​មីស៊ីលស្រោចលើ​អ៊ុយក្រែន​ដែរ ខណៈការវាយប្រហារធ្ងន់ធ្ងរបំផុត បានកើតឡើងនៅក្នុងទីក្រុង Kryvyi Rih នៃតំបន់ Dnipropetrovsk។

ការវាយប្រហារនោះធ្វើឲ្យខូចខាតសំណង់ហេដ្ឋារចនាសម្ព័ន្ធស៊ីវិលរបស់ទីក្រុងយ៉ាងដំណំ រួមទាំងអគារផ្ទះល្វែងចំនួន១២កន្លែង មណ្ឌលចាស់ជរានិងព្រះវិហារមួយផងដែរ៕

អត្ថបទ៖ សុខ សុវណ្ណ

ចុចអាន៖ រ៉យទ័រ៖ រុស្ស៊ី​អាចយល់ព្រម​​យក​លុយ​ដែល​បង្កក​ ៣០០​ពាន់​លាន​ដុល្លារ​ទៅ​ដោះស្រាយ​សង្គ្រាម​នៅ​អ៊ុយក្រែន