មិនចេះតិច! ឥណ្ឌា រកឃើញអ្នកឆ្លងកូវីដថ្មីជិត ៤៤,០០០ ករណីក្នុងមួយថ្ងៃ

តាមតួលេខចុងក្រោយពីក្រសួងសុខាភិបាលសហព័ន្ធឥណ្ឌាបានឲ្យដឹងថា ចំនួនករណីឆ្លងសរុបនៃជំងឺកូវីដ ១៩ របស់ឥណ្ឌាបានកើនឡើងដល់ ១១,៥៩៩,១៣០ ករណី ខណៈនៅថ្ងៃអាទិត្យនេះមានករណីឆ្លងថ្មីចំនួន ៤៣,៨៤៦ ករណីត្រូវបានកត់ត្រាក្នុងអំឡុងពេល ២៤ ម៉ោងចុងក្រោយនេះ ។

ចំណែកចំនួនអ្នកស្លាប់បានកើនឡើងដល់ ១៥៩,៧៥៥ ​​នាក់ ខណៈអ្នកជំងឺកូវីដ ១៩ ចំនួន ១៩៧ នាក់បានស្លាប់ចាប់តាំងពីព្រឹកថ្ងៃសៅរ៍ ។

ទាំងករណីឆ្លងថ្មី និងការស្លាប់ដែលត្រូវបានកត់ត្រាក្នុងអំឡុងពេល ២៤ ម៉ោងចុងក្រោយនេះគឺជាចំនួនខ្ពស់បំផុនៅឆ្នាំនេះ ។ កាលពីដើមសប្តាហ៍នេះលោកនាយករដ្ឋមន្រ្តី Narendra Modi បានសម្តែងការព្រួយបារម្ភចំពោះការកើនឡើងភ្លាមៗនៃករណីឆ្លងជំងឺកូវីដ ១៩ ហើយបានអំពាវនាវឲ្យមានវិធានការជាបន្ទាន់ដើម្បីទប់ស្កាត់រលកទីពីរនៃជំងឺរាតត្បាតដែលអាចកើតមាននៅក្នុងប្រទេស ។

ទន្ទឹមនោះករណីកំពុងសម្រាកព្យាបាលនៅតែមានចំនួន ៣០៩,០៨៧ នាក់នៅក្នុងប្រទេសនេះ ខណៈដែលមនុស្ស ១១,១៣០.២៨៨ នាក់បានចាកចេញពីមន្ទីរពេទ្យ បន្ទាប់ពីការព្យាបាលជាសះស្បើយ ។

បន្ថែមពីនេះចំនួនអ្នកកំពុងសម្រាកព្យាបាលមានការកើនឡើង ២០,៦៩៣ ករណីក្នុងអំឡុងពេល ២៤ ម៉ោងចុងក្រោយនេះដែលក្នុងនោះមាន ១៣,៤៤៦ ករណីមកពីរដ្ឋ Maharashtra ភាគនិរតី ៕

ប្រែសម្រួលដោយ ៖ ជីវ័ន្ត

ប្រភព ៖ XINHUA

ចុចអាន ៖ រដ្ឋមានជាងគេបំផុតរបស់ឥណ្ឌាជាចំណុចផ្ទុះកូវីដខ្លាំងរលកទីពីរ

ចុចអាន ៖ នាយករដ្ឋមន្រ្តីប៉ាគីស្ថាន និងភរិយា តេស្តវិជ្ជមានកូវីដ ១៩ ក្រោយចាក់វ៉ាក់សាំងដូសដំបូង ពីរថ្ងៃ