គីម ជុងអ៊ុន៖ មាន​អាវុធតែ​អត់​​មនោគមវិជ្ជា ប្រៀប​ដូច ដែក​គ្មាន​បាន​ការ

មេដឹកនាំកូរ៉េខាងជើងលោក គីម ជុងអ៊ុន បានគូសបញ្ជាក់ពីសារៈសំខាន់​នៃការប្តេជ្ញាចិត្តមនោគមវិជ្ជានៅក្នុងកងកម្លាំងយោធារបស់ប្រទេស ដោយអះអាងថា អាវុធដែលគ្មានមូលដ្ឋានមនោគមវិជ្ជាគឺគ្រាន់តែជា «ដែក» ធម្មតា​ប៉ុណ្ណោះ។

យោង​តាម​ការ​ចុះផ្សាយ​របស់​ទីភ្នាក់ងារព័ត៌មាន​រដ្ឋ KCNA ក្នុងសុន្ទរកថា​​នៅ​ឯ​​សកលវិទ្យាល័យយោធា Kim Il Sung លោក គីម បានលើកឡើងពីភាពចាំបាច់នៃកម្លាំងនយោបាយ មនោគមវិជ្ជា ស្មារតី និងសីលធម៌ក្នុងចំណោមកងទ័ព ជាពិសេសចំពោះការបាត់បង់ដ៏​ច្រើ​ន​របស់​ទាហានកូរ៉េខាងជើងជាង ១​ម៉ឺន​នាក់​ ដែលកំពុងគាំទ្រ​សង្គ្រាម​រុស្ស៊ីក្នុងប្រទេសអ៊ុយក្រែន។

បន្ថែម​ពី​នេះ លោក​សង្កត់​ធ្ងន់​ថា ទាហាន​កូរ៉េ​ខាង​ជើង​គួរ​តែ​ក្លាយ​ជា​កង​កម្លាំង​ដ៏​ខ្លាំង​បំផុត​​ជាងគេ​នៅ​លើ​ពិភពលោក ដោយ​បន្ថែម​ថា៖ «ការពង្រឹងកងទ័ពជាមួយនឹងមនោគមវិជ្ជាមុនពេលបំពាក់អាវុធជាមួយបច្ចេកវិទ្យាយោធា គឺជាស្នូលនៃការកសាងកងទ័ព»។

ការលើកឡើងរបស់លោក គីម ធ្វើឡើងចំពេលមានសេចក្តីរាយការណ៍ថា កូរ៉េខាងជើងបានលួចលាក់នាំចូលសមាសធាតុមីស៊ីល ក្រោម​រូបភាព​ក្លែងបន្លំ​ថា​ជា​វត្ថុប្រើប្រាស់ស៊ីវិល ក្នុងគោលបំណងពង្រឹងសមត្ថភាពនុយក្លេអ៊ែររបស់ខ្លួន។ ប្រតិបត្តិការសម្ងាត់នេះពាក់ព័ន្ធនឹងក្រុមហ៊ុនដូចជា ក្រុមហ៊ុន Myongan Trading Company នៅរុស្ស៊ី និងក្រុមហ៊ុន Tongmyong Technology Trade ក្នុងប្រទេសឡាវ ដែលសម្របសម្រួលការទិញគ្រឿងបន្លាស់ មានបំណងកែលម្អប្រព័ន្ធមីស៊ីល និងក្បាលគ្រាប់នុយក្លេអ៊ែរ។

ក្នុងពេលជាមួយគ្នានេះ ក្រុង​ព្យុងយ៉ាង​បានរិះគន់សហរដ្ឋអាមេរិក និងសម្ព័ន្ធមិត្តអាស៊ីរបស់​អាមេរិក ចំពោះការបន្តនូវអ្វីដែលខ្លួនចាត់ទុកថា «មិនសមហេតុផល» សម្រាប់​ផែនការរំសាយអាវុធនុយក្លេអ៊ែររបស់កូរ៉េខាងជើង។ កូរ៉េ​ខាង​ជើង បាន​ប្ដេជ្ញា​ពង្រីកឃ្លាំងអាវុធនុយក្លេអ៊ែររបស់ខ្លួនក្រោមការដឹកនាំរបស់លោក គីម ដោយព្រមានចាត់​វិធានការ​ដ៏​ខ្លាំងក្លា​​ប្រឆាំង​សត្រូវ បើសន្តិសុខរបស់ខ្លួនត្រូវបានគំរាមកំហែង៕

ដោយ៖ ឈាង