​សំាងឡើងថ្លៃ​នៅ​ព្រំដែន​មីយ៉ាន់ម៉ា ម្ចាស់​រថយន្តចូល​មក​ចាក់សាំង​នៅថៃ បង្កកកស្ទះខ្លាំង​

ផ្លូវនៅ Mae Sot ព្រំដែនមីយ៉ាន់ម៉ាជាមួយថៃត្រូវបានកកស្ទះដោយរថយន្តមកពីប្រទេសមីយ៉ាន់ម៉ា ស្វែករកកន្លែងចាក់សាំង ខណៈដែលតម្លៃសាំងនៅ Myawaddy ឡើងដល់៧០បាតដែលស្មើនឹងប្រមាណ២ដុល្លារក្នុងមួយលីត្រ។ នេះបើយោងតាមការចេញផ្សាយរបស់សារប័ត៌មាន The Nation នៅថ្ងៃទី២៥ខែកុម្ភៈនេះ។

ស្ថានីយប្រេងក្នុងស្រុកនៅខាងថៃឃើញថា មានចរាចរណ៍ខ្លាំង បន្ទាប់ពីការដាច់ចរន្តអគ្គិសនី និងប្រេងក្នុងប្រទេស មីយ៉ាន់ម៉ា។ ទីក្រុងព្រំដែន Mae Sot ក្នុងខេត្ត Tak ឃើញថាមានរថយន្តកកកុញ ដែលភាគច្រើនជារថយន្តមកពី Myawaddy កំពុងស្វែងរកកន្លែងចាក់សាំង បន្ទាប់ពីតម្លៃប្រេងនៅក្នុងទីក្រុងព្រំដែនមីយ៉ាន់ម៉ាបានឡើងថ្លៃដល់ប្រហែល ២ដុល្លារក្នុងមួយលីត្រ។

ទំព័រហ្វេសប៊ុកក្នុងស្រុកដែលមានចំណងជើងថា Today in Mae Sot បានរាយការណ៍ថាផ្លូវធំៗនៅ Mae Sot បានកកស្ទះយ៉ាងខ្លាំងនៅព្រឹកថ្ងៃអង្គារនេះ ខណៈដែលរថយន្តពី Myawaddy ឆ្លងកាត់ស្ពានមិត្តភាពថៃ-មីយ៉ាន់ម៉ាទីមួយ ដើម្បីចាក់សាំងនៅស្ថានីយ៍នានានៅខាងភាគីថៃ។

គួរបញ្ជាក់ថាបន្ទាប់​ពី​ប្រទេស​ថៃ​បាន​កាត់​ផ្តាច់​ចរន្ត​អគ្គិសនី និង​ការ​ផ្គត់ផ្គង់​ប្រេង​ដល់​តំបន់​ព្រំដែន​មីយ៉ាន់ម៉ា​ចំនួន​ប្រាំ​កាល​ពី​ថ្ងៃ​ទី​៥ ខែ​កុម្ភៈ នោះ​មាន​តែ​ស្ថានីយ​ប្រេង​ធំៗ​ក្នុង​ក្រុង Myawaddy ដែល​នៅ​តែ​ដំណើរការ។

មានសេចក្តីរាយការណ៍មកថា ស្ថានីយ៍ប្រេងឥន្ធនៈនៅម្តុំMyawaddy បានបើកដំណើរការត្រឹមតែមួយម៉ោងប៉ុណ្ណោះក្នុងមួយថ្ងៃ ដោយតម្លៃប្រេងឥន្ធនៈឡើងដល់ ៧០ បាតក្នុងមួយលីត្រ និងតម្លៃប្រេងម៉ាស៊ូតឡើងដល់ ៧១ បាតក្នុងមួយលីត្រគិតត្រឹមព្រឹកថ្ងៃអង្គារ។

គួរបញ្ជាក់ថាការផ្ដាច់ចរន្ដអគ្គិសនីនិងប្រេងឥន្ទនៈនេះគឺកើតឡើងក្នុងចំណាត់ការរបស់ថៃដើម្បីបង្រាបក្រុមជនបោកប្រាស់តាមអ៊ីនធឺណិតនៅតាមព្រំដែលថៃនិងមីយ៉ាន់ម៉ាដែលមកដល់ពេលនេះជួយសង្គ្រោះបានមនុស្សរាប់ពាន់នាក់មកហើយ៕

អត្ថបទ៖ ប៊ុន សុភាព