ឥណ្ឌូណេស៊ី​រងការវាយប្រហារ​ដោយ​​​គ្រោះរញ្ជួយដី​​​បង្ខំឱ្យអ្នកស្រុកចាកចេញពីផ្ទះ

រញ្ជួយដីកម្រិត ៦.១ រ៉ិចទ័របានវាយប្រហារនៅតំបន់ឆ្នេរសមុទ្រនៃកោះ Sulawesi របស់ប្រទេសឥណ្ឌូណេស៊ី​នៅ​ព្រឹកថ្ងៃពុធ​នេះ​ ដោយ​បង្ខំឱ្យអ្នកស្រុកចាក​ចេញពីលំនៅឋាន​របស់ពួកគេ។ នេះបើយោងតាមការចេញផ្សាយរបស់សារព័ត៌មាន CNA នៅថ្ងៃទី២៦ខែកុម្ភៈនេះ។

បើតាមការស្ទាបស្ទង់ភូមិសាស្ត្ររបស់សហរដ្ឋអាមេរិក (USGS) បានរាយការណ៍ថាមិនមានការខូចខាតភ្លាមៗ ឬជនរងគ្រោះ​ដោយសារការរញ្ជួយដីដែលបានកើតឡើងនៅម៉ោង ៦:៥៥ នាទីព្រឹកម៉ោងក្នុងស្រុកនោះទេ។ ប៉ុន្តែការរញ្ជួយនេះបានធ្វើឲ្យអ្នកស្រុកនៅ Sulawesi ភ័យស្លន់ស្លោ និងរត់ចេញពីផ្ទះឬអគារដែលពួកគេស្នាក់នៅ។

USGS បាននិយាយថា ការរញ្ជួយដីបានវាយប្រហារនៅជម្រៅ១០គីឡូម៉ែត្រ ជាមួយនឹងចំណុចកណ្តាលនៃ​ការ​រញ្ជូយ​ត្រង់​​ឆ្នេរសមុទ្រនៅជិតកោះ Sulawesi ខាងជើង។ តែបើតាមទីភ្នាក់ងារឧតុនិយមរបស់ប្រទេសឥណ្ឌូណេស៊ី បានរាយការណ៍ថា មានកម្រិតទាបជាង​ការ​ព្យាករណ៍​​​ខាងលើ​បន្តិចគឺ​ត្រឹម​ ៦.០ រ៉ិចទ័រ និងមិនមានហានិភ័យនៃរលកយក្សស៊ូណាមិ​នោះ​ទេ​​។

គួរបញ្ជាក់ថា ប្រទេសឥណ្ឌូណេស៊ី ស្ថិតនៅ​មហាសមុទ្រប៉ាស៊ីហ្វិក ​មាន​ខ្សែ​​​ភ្នំភ្លើង​ «Ring of Fire» ដែលជាតំបន់ដែលគេស្គាល់​ថា មានសកម្មភាពរញ្ជួយដីជាញឹកញាប់។ នៅខែមករាឆ្នាំ២០២១ ការរញ្ជួយដីកម្រិត ៦.២រ៉ិចទ័រនៅ Sulawesi បានសម្លាប់មនុស្សជាង១០០នាក់ និងរាប់ពាន់នាក់បានផ្លាស់ទីលំនៅ។

ការរញ្ជួយដីកម្រិត៧.៥រ៉ិចទ័រ និងរលកយក្សស៊ូណាមិជាបន្តបន្ទាប់នៅទីក្រុង Palu ក្នុងឆ្នាំ ២០១៨ ក៏បានសម្លាប់មនុស្សជាង​២២០០នាក់។

ការរញ្ជួយ​ដីដែលធ្ងន់ធ្ងរខ្លាំងជាងគេនៅ ខេត្ត Aceh ឆ្នាំ២០០៤ ដែលមានកម្រិត​៩.១​រ៉ិចទ័រ បានបណ្តាលឱ្យមានរលកយក្ស​ស៊ូណាមិ ដែលបានឆក់យកជីវិតមនុស្សជាង ១៧ម៉ឺន​នាក់នៅក្នុងប្រទេសឥណ្ឌូណេស៊ី៕

អត្ថបទ៖ ប៊ុន សុភាព