អ៊ីស្រាអែល និង​ហាម៉ាស យល់ព្រម​លើ​វិធី​ថ្មី​ក្នុង​ការ​ដោះដូរ​ចំណាប់ខ្មាំង ដើម្បី​កុំ​ឲ្យ​បទ​ឈប់បាញ់​បរាជ័យ

មន្ត្រីអ៊ីស្រាអែល និងក្រុមហាម៉ាស បាននិយាយកាលពីថ្ងៃអង្គារ​ទី​២៥​កុម្ភៈ​ថា ពួកគេបានឈានដល់កិច្ចព្រមព្រៀងមួយដើម្បីផ្លាស់ប្តូរសាកសពចំណាប់ខ្មាំង ជាមួយ​ការដោះលែងអ្នកទោសប៉ាឡេស្ទីនរាប់រយនាក់ ដោយរក្សាបទឈប់បាញ់ដ៏ផុយស្រួយរបស់ពួកគេយ៉ាងហោចណាស់​ឲ្យ​មាន​សុពលភាព​ពីរ​ទៅ​បី​ថ្ងៃទៀត មុន​ដំណាក់កាល​ទី​មួយ​ត្រូវ​បញ្ចប់​នៅ​ចុង​សប្ដាហ៍​នេះ។

អ៊ីស្រាអែល បានពន្យារពេលដោះលែងអ្នកទោសប៉ាឡេស្ទីនប្រមាណ ៦០០​នាក់ចាប់តាំងពីថ្ងៃសៅរ៍​សប្ដាហ៍​មុន ដើម្បីតវ៉ានឹងអ្វីដែលខ្លួននិយាយថា​ជា​ការធ្វើបាបចំណាប់ខ្មាំងយ៉ាងឃោរឃៅក្នុងអំឡុងពេលដោះលែងពួកគេដោយក្រុមហាម៉ាស។ ក្រុមសកម្មប្រយុទ្ធ​ហាម៉ាស បាននិយាយថា ការពន្យារពេលនេះគឺជា «ការរំលោភយ៉ាងធ្ងន់ធ្ងរ» នៃបទឈប់បាញ់ ហើយថា ការចរចាលើដំណាក់កាលទីពីរគឺមិនអាចធ្វើទៅបានទេរហូតដល់​អ្នក​ទោស​ប៉ាឡេស្ទីន​ត្រូវបានដោះលែង។

ភាពជាប់គាំង​នេះ បានគំរាមកំហែងដល់ការដួលរលំ​នៃ​បទឈប់បាញ់ នៅពេលដែលកិច្ចព្រមព្រៀងដំណាក់កាលដំបូងរយៈពេលប្រាំមួយសប្តាហ៍​នឹងផុតកំណត់នៅចុងសប្តាហ៍នេះ។

ប៉ុន្តែកាលពីល្ងាចថ្ងៃអង្គារ ក្រុមហាម៉ាស បាន​ប្រាប់​ថា កិច្ចព្រមព្រៀងមួយត្រូវបានសម្រេច ដើម្បីដោះស្រាយជម្លោះ ក្នុងអំឡុងពេលដំណើរទស្សនកិច្ចទៅកាន់ទីក្រុងគែរដោយគណៈប្រតិភូដែលដឹកនាំដោយ​លោក Khalil al-Hayya ដែលជាមន្ត្រីនយោបាយកំពូលនៅក្នុងក្រុមហាម៉ាស។

ការ​សម្រេច​បាន​នេះ ជួយ​សម្រួល​ដល់​ការ​ប្រគល់​​សាកសពចំណាប់ខ្មាំង​បួននាក់ និងអ្នកទោស​ប៉ាឡេស្ទីន​រាប់រយនាក់បន្ថែមទៀត ដែលគ្រោងនឹងដោះលែងនៅក្រោមបទឈប់បាញ់​បច្ចុប្បន្ន។

សេចក្តីថ្លែងការណ៍របស់ហាម៉ាស បានលើក​ឡើង​ថា អ្នកទោសពីមុន​ដែល​ត្រូវ​បានកំណត់សម្រាប់ការដោះលែង «នឹងត្រូវបានដោះលែងក្នុងពេលដំណាលគ្នាជាមួយនឹងសាកសពអ្នកទោសអ៊ីស្រាអែលដែលត្រូវបានយល់ព្រមប្រគល់​ឲ្យ» រួមជាមួយនឹងការដោះលែងអ្នកទោសប៉ាឡេស្ទីនថ្មីមួយក្រុម​ទៀត។

​ប្រព័ន្ធ​ផ្សព្វផ្សាយ​របស់​អ៊ីស្រាអែល​ បាន​និយាយ​ថា​ ការ​ដោះដូរ​អាច​នឹង​ធ្វើ​ឡើង​ភ្លាមៗ​នៅ​ថ្ងៃ​ពុធ។ វិបសាយ​ព័ត៌មាន Ynet បានផ្សាយ​ថា សាកសព​ចំណាប់ខ្មាំង​របស់អ៊ីស្រាអែល នឹងត្រូវប្រគល់ទៅ​ឲ្យ​អាជ្ញាធរអេហ្ស៊ីប ដោយមិនរៀបចំ​ពិធីសាធារណៈណាមួយឡើយ។

សូម​បញ្ជាក់​ថា ក្រុមហាម៉ាស បានដោះលែងចំណាប់ខ្មាំង និងសាកសពចំណាប់ខ្មាំងបួននាក់ នៅក្នុងពិធីសាធារណៈដ៏ធំ​មួយ ខណៈ​ចំណាប់ខ្មាំង​​អ៊ីស្រាអែល​ត្រូវបាន​ដាក់​ឲ្យ​ដង្ហែរក្បួន និងត្រូវ​គេ​បង្ខំ​ឲ្យ​រាដៃ​​ទៅកាន់​ហ្វូង​មនុស្សយ៉ាងច្រើន។ អ៊ីស្រាអែល រួមជាមួយនឹងមន្ត្រីកាកបាទក្រហម និងអង្គការសហប្រជាជាតិ បាននិយាយថា ពិធីនេះ ​ជា​ការ​ធ្វើ​ឲ្យ​ចំណាប់ខ្មាំង​អាម៉ាស​មុខ ហើយអ៊ីស្រាអែលកាលពីចុងសប្តាហ៍មុនក៏​បានពន្យារពេលការដោះលែងអ្នកទោស​ប៉ាឡេស្ទីន។

ដំណាក់កាលដំបូងនៃបទឈប់បាញ់​រវាង​ក្រុម​ហាម៉ាស និង​អ៊ីស្រាអែល បាន​ចែង​ពី​ការ​ប្រគល់ចំណាប់ខ្មាំង ៣៣​នាក់ ក្នុង​នោះ​មាន​ទាំង​សាកសព​៨​នាក់ ជាថ្នូរនឹង​ការ​ដោះលែង​អ្នកទោសប៉ាឡេស្ទីនជិត ២ ០០០​នាក់។

ការប្រយុទ្ធគ្នាយ៉ាងសាហាវ​រវាង​ហាម៉ាស និង​អ៊ីស្រាអែល ដែល​មាន​រយៈពេល ១៥​ខែ បានផ្ទុះឡើងបន្ទាប់ពី​ការវាយប្រហារ​របស់ពួកហាម៉ាសកាលពីថ្ងៃទី​៧​ខែតុលា​ឆ្នាំ​២០២៣ ដែលបានសម្លាប់មនុស្សប្រហែល ១ ២០០​នាក់នៅអ៊ីស្រាអែល និងបានចាប់មនុស្សប្រហែល ២៥០​នាក់ធ្វើជាចំណាប់ខ្មាំង។

ប្រតិបត្តិការ​សងសឹក​របស់អ៊ីស្រាអែល បានសម្លាប់ជនជាតិប៉ាឡេស្ទីនជាង ៤៨ ០០០​នាក់ ខណៈ​ប្រជាជន​ប៉ាឡេស្ទីន​ក្នុង​តំបន់​ហ្គាហ្សា​​​ប្រមាណ ៩០% បានផ្លាស់ទីលំនៅ។ ក្រសួងសុខាភិបាលដែលគ្រប់គ្រងដោយក្រុមហាម៉ាស មិន​បាន​បែងចែក​ចំនួន​អ្នក​ស្លាប់​ថា​​តើ​មាន​​ជនស៊ីវិល និងក្រុមសកម្មប្រយុទ្ធ​ប៉ុន្មាន​នោះទេ គ្រាន់​​​បញ្ជាក់​ថា​ជាងពាក់កណ្តាលនៃអ្នកស្លាប់គឺជាស្ត្រី និងកុមារ៕

ដោយ៖ ឈាង