ព័ត៌មានអន្ដរជាតិ

ហាម៉ាស ប្រគល់សាកសពចំណាប់ខ្មាំង៤នាក់ ឲ្យអ៊ីស្រាអែល តាមរយៈកាកបាទក្រហម

បានផុស

១ ខែ មុន

នៅ

ថ្ងៃព្រហស្បតិ៍ ២៧ កុម្ភៈ ២០២៥

ដោយ

Chheang

ក្រុមហាម៉ាស បានប្រគល់សាកសពចំណាប់ខ្មាំងអ៊ីស្រាអែលចំនួន៤នាក់ទៅឲ្យកាកបាទក្រហមនៅតំបន់ហ្គាហ្សាភាគខាងត្បូង។ សកម្មភាពនេះ គឺជាផ្នែកមួយនៃកិច្ចព្រមព្រៀងដែលមានគោលបំណងរក្សាបទឈប់បាញ់ដ៏ផុយស្រួយរវាងក្រុមហាម៉ាស និងអ៊ីស្រាអែល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សាកសពរបស់ចំណាប់ខ្មាំងអ៊ីស្រាអែល ត្រូវបានផ្ទេរទៅកាន់កាកបាទក្រហមនៅព្រឹកថ្ងៃព្រហស្បតិ៍ទី២៧កុម្ភៈនេះ ដោយគ្មានការរៀបចំពិធីសាធារណៈអ្វីឡើយ ជៀសវាងការមិនពេញចិត្តពីភាគីអ៊ីស្រាអែល។ កាលពីសប្ដាហ៍មុន ក្រុមហាម៉ាស បានដោះលែងចំណាប់ខ្មាំង និងសាកសពបួននាក់ នៅក្នុងពិធីសាធារណៈដ៏ធំមួយ ខណៈចំណាប់ខ្មាំងអ៊ីស្រាអែលត្រូវបានដាក់ឲ្យដង្ហែរក្បួន និងត្រូវគេបង្ខំឲ្យរាដៃទៅកាន់ហ្វូងមនុស្សយ៉ាងច្រើន។ អ៊ីស្រាអែល រួមជាមួយនឹងមន្ត្រីកាកបាទក្រហម និងអង្គការសហប្រជាជាតិ បាននិយាយថា ពិធីនេះ ជាការធ្វើឲ្យចំណាប់ខ្មាំងអាម៉ាសមុខ ហើយអ៊ីស្រាអែលកាលពីចុងសប្តាហ៍មុនក៏បានពន្យារពេលដោះលែងអ្នកទោសប៉ាឡេស្ទីន។

យោងតាមសេចក្តីថ្លែងការណ៍មួយពីការិយាល័យប្រព័ន្ធផ្សព្វផ្សាយរបស់ហាម៉ាស ជាការឆ្លើយតប អ៊ីស្រាអែលនឹងដោះលែងអ្នកទោសប៉ាឡេស្ទីនចំនួន៦២០នាក់ពីពន្ធនាគារ ក្នុងនោះមាន ១៥១នាក់ដែលត្រូវបានកាត់ទោសឲ្យជាប់ពន្ធនាគារអស់មួយជីវិត។ វាគឺជាការដោះលែងដ៏ធំបំផុតរបស់ប៉ាឡេស្ទីន សម្រាប់ដំណាក់កាលដំបូងនៃកិច្ចព្រមព្រៀងបទឈប់បាញ់។ ក្នុងចំណោមអ្នកទោសដែលអ៊ីស្រាអែលដោះលែង ៤៤៥នាក់គឺជាប្រជាជនហ្គាហ្សា ដែលត្រូវបានចាប់ខ្លួនបន្ទាប់ពីសង្រ្គាមបានចាប់ផ្តើមកាលពីថ្ងៃទី៧ខែតុលាឆ្នាំ២០២៣។

ការដោះដូរចំណាប់ខ្មាំងនិងអ្នកទោសនេះ ត្រូវបានបិទបញ្ចប់សម្រាប់ដំណាក់កាលដំបូងនៃកិច្ចព្រមព្រៀងឈប់បាញ់ដែលសម្របសម្រួលដោយសហរដ្ឋអាមេរិក អេហ្ស៊ីប និងកាតា ដែលបានចូលជាធរមាននៅថ្ងៃទី១៩ខែមករាឆ្នាំ២០២៥ បន្ទាប់ពីជម្លោះរយៈពេល១៥ខែ ដែលផ្តួចផ្តើមឡើងដោយការវាយប្រហាររបស់ក្រុមហាម៉ាសលើអ៊ីស្រាអែលក្នុងខែតុលាឆ្នាំ២០២៣។

ដំណាក់កាលដំបូងពាក់ព័ន្ធនឹងការដោះដូរចំណាប់ខ្មាំង៣៣នាក់ រួមទាំងសាកសព៨នាក់ ជាថ្នូរនឹងអ្នកទោសប៉ាឡេស្ទីនជិត ២ ០០០នាក់។ ការប្រគល់នាពេលថ្មីៗនេះ បានដោះស្រាយភាពជាប់គាំងដែលបានកើតឡើងនៅពេលដែលអ៊ីស្រាអែលពន្យារពេលដោះលែងអ្នកទោសប៉ាឡេស្ទីនចំនួនជាង៦០០នាក់។

ជាមួយនឹងដំណាក់កាលទីមួយត្រូវបានបញ្ចប់ ការយកចិត្តទុកដាក់ឥឡូវនេះបានផ្ដោតសំខាន់ទៅលើដំណាក់កាលទីពីរនៃការចរចា ដែលមានគោលបំណងដោះស្រាយការដោះលែងចំណាប់ខ្មាំងដែលនៅសេសសល់ និងពិភាក្សាអំពីការបញ្ចប់ជម្លោះ។ បេសកជនសហរដ្ឋអាមេរិក លោក Steve Witkoff ត្រូវបានគេរំពឹងថានឹងជួយសម្រួលដល់ការពិភាក្សាទាំងនេះ។ ទោះបីជាយ៉ាងណាក៏ដោយ ភាពមិនប្រាកដប្រជានៅតែបន្តកើតមាន ខណៈដែលអ៊ីស្រាអែលព្យាយាមពន្យារពេលអនុវត្តបទឈប់បាញ់បច្ចុប្បន្ន ហើយក្រុមហាម៉ាសវិញនៅរក្សាការទាមទារឲ្យអ៊ីស្រាអែលដកកងកម្លាំងខ្លួនចេញទាំងស្រុង និងធ្វើការដោះលែងអ្នកទោសប៉ាឡេស្ទីនបន្ថែមទៀត។

ស្ថានការណ៍នៅតែល្អក់កករ ដោយភាគីទាំងពីរស្ថិតក្រោមសម្ពាធអន្តរជាតិដើម្បីឈានដល់ដំណោះស្រាយយូរអង្វែង។ ប៉ុន្មានថ្ងៃខាងមុខនឹងមានសារៈសំខាន់ខ្លាំងក្នុងការកំណត់ថាតើបទឈប់បាញ់អាចរក្សា និងនាំទៅរកកិច្ចព្រមព្រៀងសន្តិភាពប្រកបដោយនិរន្តរភាពដែរឬក៏យ៉ាងណា៕

ដោយ៖ ឈាង

ចុចអាន៖ អ៊ីស្រាអែល និងហាម៉ាស យល់ព្រមលើវិធីថ្មីក្នុងការដោះដូរចំណាប់ខ្មាំង ដើម្បីកុំឲ្យបទឈប់បាញ់បរាជ័យ

Related Topics:សង្គ្រាមអ៊ីស្រាអែល-ប៉ាឡេស្ទីន