ព័ត៌មានអន្ដរជាតិ

នាយករដ្ឋមន្ត្រីថៃនឹងទៅព្រំដែនជាប់ប៉ោយប៉ែត ពិនិត្យមើលសកម្មភាពឆបោកតាមអនឡាញ

បានផុស

៤ សប្តាហ៍ មុន

នៅ

ថ្ងៃព្រហស្បតិ៍ ២៧ កុម្ភៈ ២០២៥

ដោយ

នាយករដ្ឋមន្ត្រីថៃ លោកស្រី ផែថងថាន ស៊ីណាវ៉ាត្រា នឹងធ្វើដំណើរទស្សនកិច្ចមកកាន់ខេត្តជាប់ព្រំដែនកម្ពុជានៅថ្ងៃទី២៨ខែកុម្ភៈ ដើម្បីត្រួតពិនិត្យមើលស្ថានភាពទូទៅនៃស្ថានភាពឆបោកតាមអ៊ិនធឺណិត ដែលកំពុងតែចោទជាបញ្ហាយ៉ាងខ្លាំងនៅតាមខេត្តព្រំដែនជុំវិញប្រទេសជាពិសេសព្រំដែនជាមួយមីយ៉ាន់ម៉ា។

លោកស្រី នាយករដ្ឋមន្ត្រីថៃ ផែថងថាន ស៊ីណាវ៉ាត្រា ដឹកនាំកិច្ចប្រជុំគណៈកម្មការបង្ក្រាបបទល្មើស។ Ing Shinawatra

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកស្រី ផែថងថាន បានបញ្ជាក់ថា ចំពោះរឿងនេះរដ្ឋាភិបាលនឹងអនុវត្តយ៉ាងម៉ឺងម៉ាត់ទាំងនៅថៃ ចិន មីយ៉ាន់ម៉ានិងកម្ពុជា ហើយ លោកស្រីនឹងចុះទៅច្រកព្រំដែនខ្លងលឹកជិតផ្សាររោងក្លឿ ស្រុកអារញ្ញ ខេត្តស្រះកែវ ជាប់ព្រំដែនក្រុងប៉ោយប៉ែត ខេត្តបន្ទាយមានជ័យរបស់ប្រទេសកម្ពុជា នៅថ្ងៃទី២៨ខែកុម្ភៈ ដើម្បីតាមដាន និងត្រួតពិនិត្យមើលបញ្ហានេះដោយខ្លួនឯងផ្ទាល់ និងដើម្បីពន្លឿនការដោះស្រាយនិងលុបបំបាត់ឱ្យអស់ពីប្រទេសថៃឱ្យបានឆាប់បំផុត។

លោកស្រី ផែថងថាន បានទទួលស្គាល់ថា បទល្មើសឆបោកតាមអ៊ីនធឺណិតបង្កផលប៉ះពាល់ដល់ប្រជាពលរដ្ឋយ៉ាងខ្លាំង ខណៈអាជ្ញាធរថៃបានបង្ក្រាបយ៉ាងចាស់ដៃនៅតាមព្រំដែនជាប់មីយ៉ាន់ម៉ា និងបន្តមកកាន់ព្រំដែនជាប់កម្ពុជា។

សារព័ត៌មានថៃ Khaosod បានផ្សាយថា លោកស្រី នាយករដ្ឋមន្ត្រីថៃ បានដឹកនាំកិច្ចប្រជុំគណៈរដ្ឋមន្ត្រីអំពីការបង្ក្រាបក្រុមឧក្រិដ្ឋជនឆបោកតាមអនឡាញ និងបានចាត់ទុកថាបទល្មើសនេះបង្កផលប៉ះពាល់ដល់ប្រជាពលរដ្ឋយ៉ាងខ្លាំង។

លោកស្រីនាយករដ្ឋមន្ត្រី ក្នុងពេលថ្មីៗក៏ធ្លាប់បានអះអាងថា លោកស្រីស្ទើរតែចាញ់បោកក្រុមឆបោកតាមអនឡាញ ដែលប្រើប្រាស់បច្ចេកវិទ្យា AI យកត្រាប់សម្លេងរបស់ប្រធានាធិបតីសហរដ្ឋអាមេរិក លោក ដូណាល់ ត្រាំ ដោយអះអាងថា ប្រទេសរបស់លោកស្រីមិនទាន់បានបង់មូលនិធិសប្បុរសធម៌ ហើយតម្រូវឲ្យលោកស្រីវេរមូលនិធិនោះទៅកាន់ទីក្រុងហុងកុង។

តាមការចុះផ្សាយរបស់សារព័ត៌មានថៃ លោកស្រីនាយករដ្ឋមន្ត្រី បានអះអាងថា បច្ចុប្បន្ននេះថៃបានបើកប្រតិបត្តិការបង្ក្រាបនៅខេត្តទាំង១៤ ដែលជាប់ព្រំដែន ហើយបានទទួលកិច្ចសហការយ៉ាងល្អពីប្រទេសចិននិងមីយ៉ាន់ម៉ា ធ្វើឱ្យអាចចាប់ខ្លួនបានមួយចំនួនធំ។ អ្នកដែលត្រូវបានចាប់ខ្លួន ក្រសួងការពារជាតិថៃបានសម្របសម្រួលជាមួយប្រទេសគោលដៅឱ្យមកទទួលយកពួកគេជាក្រុម២ត្រឡប់ទៅស្រុកវិញ ដើម្បីជៀសវាងកុំឱ្យមានបញ្ហាកើតឡើង។

លោកស្រីថា ប្រទេសថៃ ចិន និងមីយ៉ាន់ម៉ា បានបង្កើតគណៈកម្មការត្រីភាគីមួយដើម្បីពិភាក្សានិងដោះស្រាយបញ្ហាជាក់ស្តែងលើករណីនេះ ដោយបញ្ជាឱ្យចាត់វិធានការយ៉ាងតឹងរ៉ឹងចំពោះមន្ត្រីដែលពាក់ព័ន្ធនឹងអំពើពុករលួយ ដោយរុញឲ្យប្រើវិធានការច្បាប់ ហើយក្រសួងឌីជីថលថៃត្រូវធ្វើការជាមួយគណៈកម្មាធិការផ្សព្វផ្សាយ និងទូរគមនាគមន៍ អាជីវកម្មទូរទស្សន៍ និងក្រុមហ៊ុនទូរគមនាគមន៍ដើម្បីធ្វើការរុះបង្គោលអង់តែនអ៊ីនធឺណិតនៅជិតព្រំដែន កាត់បន្ថយកម្ពស់និងកម្លាំងសេវា ហើយបង្វែរសេវាឆ្ពោះទៅកាន់ព្រំដែនថៃវិញ ព្រមទាំងកាត់ផ្តាច់ប្រអប់ស៊ីមអ៊ីនធឺណិតផងដែរ។

លោកស្រីថា ចំពោះក្រុមឧក្រិដ្ឋជនឆបោកអនឡាញនេះត្រូវតែបង្ក្រាបឱ្យអស់ ប្រសិនបើបង្ក្រាបមិនអស់មិនឈប់នោះទេ៕

ដោយ រ៉ាន់ រើយ