ព័ត៌មានអន្ដរជាតិ

ត្រាំមិនមាត់មិនក ជុំវិញជំហរការពារកោះតៃវ៉ាន់

បានផុស

១ ខែ មុន

នៅ

ថ្ងៃព្រហស្បតិ៍ ២៧ កុម្ភៈ ២០២៥

ដោយ

ប្រធានាធិបតីសហរដ្ឋអាមេរិក លោក ដូណាល់ ត្រាំ បានបដិសេធមិនធ្វើការអធិប្បាយថាតើអាមេរិកនឹងធ្វើអន្តរាគមន៍ក្នុងការរារាំងប្រទេសចិនពីការកាន់កាប់តៃវ៉ាន់ដោយការប្រើប្រាស់កម្លាំងដែរឬទេ។ យោងការចេញផ្សាយរបស់បណ្តាសារព័ត៌មានអន្តរជាតិ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ត្រាំ បាននិយាយនៅក្នុងការឆ្លើយតបទៅនឹងសំណួររបស់អ្នកយកព័ត៌មានកាលពីថ្ងៃពុធក្នុងអំឡុងពេលកិច្ចប្រជុំគណៈរដ្ឋមន្ត្រីនៅឯសេតវិមានថា៖«ខ្ញុំមិនដែលធ្វើអត្ថាធិប្បាយលើរឿងនេះទេ។ ខ្ញុំមិនធ្វើអត្ថាធិប្បាយលើអ្វីនោះទេ ព្រោះខ្ញុំមិនចង់ដាក់ខ្លួននៅក្នុងរឿងនោះ»។

ការបដិសេធមិនធ្វើអត្ថាធិប្បាយនេះគឺជាការចាកចេញគួរឲ្យតាមដានពីសេចក្តីថ្លែងការណ៍របស់អតីតប្រធានាធិបតី ចូ បៃដិន ដែលបាននិយាយម្តងហើយម្តងទៀតថា គាត់នឹងធ្វើអន្តរាគមន៍ផ្នែកយោធា ប្រសិនបើចិនឈ្លានពានតៃវ៉ាន់។

ជាធម្មតាសហរដ្ឋអាមេរិកបានចៀសវាងការធានាសុវត្ថិភាពច្បាស់លាស់ចំពោះកោះតៃវ៉ាន់រាប់ទសវត្សរ៍មកហើយ ដោយបន្តការរក្សាគោលនយោបាយនៃភាពមិនច្បាស់លាស់ជាយុទ្ធសាស្ត្ររហូតមក។ ច្បាប់ទំនាក់ទំនងតៃវ៉ាន់ឆ្នាំ១៩៧៩ អំពាវនាវឱ្យសហរដ្ឋអាមេរិកផ្តល់ធនធានឲ្យតៃវ៉ាន់ដើម្បីការពារខ្លួន និងប្រឆាំងនឹងការផ្លាស់ប្តូរស្ថានភាពឯកតោភាគីណាមួយ ប៉ុន្តែមិនបាននិយាយច្បាស់លាស់ថា សហរដ្ឋអាមេរិកនឹងធ្វើអន្តរាគមន៍នោះទេ។

គួរបញ្ជាក់ថា ក្នុងអំឡុងយុទ្ធនាការឃោសនាបោះឆ្នោត លោក ត្រាំ បានស្នើនៅក្នុងបទសម្ភាសន៍ជាមួយ Bloomberg News ថា តៃវ៉ាន់«គួរតែបង់ប្រាក់ឱ្យអមេរិកសម្រាប់ការពារជាតិ»។ មួយវិញទៀតនោះកាលពីថ្ងៃពុធ លោក ត្រាំ បាននិយាយថា លោកមាន «ទំនាក់ទំនងដ៏អស្ចារ្យ» ជាមួយមេដឹកនាំចិន Xi Jinping ហើយរំពឹងថានឹងជំរុញពាណិជ្ជកម្មឱ្យកាន់តែប្រសើរជាមួយទីក្រុងប៉េកាំង៕