តម្លៃស៊ុតនៅអាមេរិកកើនឡើងជាង​៥០%​ខ្ពស់បំផុត​មិនធ្លាប់មាន ខណៈរដ្ឋបាលត្រាំ​បញ្ចេញ​លុយ​១០០០​លាន​​

តម្លៃស៊ុតនៅសហរដ្ឋអាមេរិកបានឡើងដល់កម្រិតខ្ពស់បំផុត ឈានដល់ជាមធ្យម ៨.១១ ដុល្លារអាមេរិកក្នុងមួយឡូ (១២គ្រាប់) គិតត្រឹមថ្ងៃពុធ ពោលគឺកើនឡើង៥៣ភាគរយធៀបនឹងឆ្នាំមុន ដោយសារការផ្ទុះឡើងនៃជំងឺគ្រុនផ្តាសាយបក្សីដ៏បំផ្លិចបំផ្លាញដែលកាត់បន្ថយចំនួនមេមាន់ពងរបស់ប្រទេសនេះ។

ការផ្ទុះឡើងនៃជំងឺគ្រុនផ្តាសាយបក្សី (HPAI) ដែលបានចាប់ផ្តើមតាំងពីឆ្នាំ ២០២២ បានបង្ខំឱ្យកសិករសម្លាប់មេមាន់ប្រមាណ១៦៦លានក្បាលក្នុងរយៈពេល៣ឆ្នាំចុងក្រោយនេះ។​ នេះបើយោងតាមរដ្ឋមន្ត្រីក្រសួងកសិកម្មសហរដ្ឋអាមេរិកលោក Brooke Rollins។

វិបត្តិនេះកាន់តែខ្លាំងឡើងនៅដើមឆ្នាំ២០២៥ ដោយសារស៊ុតពាណិជ្ជកម្មប្រហែល១៨.៨លានគ្រាប់បានរងផលប៉ះពាល់ដោយ HPAI នៅក្នុងខែមករាតែមួយ ដែលជាចំនួនសរុបប្រចាំខែខ្ពស់បំផុតចាប់តាំងពីការផ្ទុះឡើង។

នៅក្នុងការព្យាករណ៍តម្លៃអាហារប្រចាំ​ខែកុម្ភៈ ក្រសួងកសិកម្មសហរដ្ឋអាមេរិក (USDA) បាន​ព្យាករណ៍ថា តម្លៃស៊ុតនឹងកើនឡើង៤១.១ ភាគរយនៅឆ្នាំ២០២៥។ ការកើនឡើងតម្លៃយ៉ាងគំហុកនេះកំពុងមានផលប៉ះពាល់យ៉ាងខ្លាំងនៅទូទាំងឧស្សាហកម្មម្ហូបអាហារ ជាពិសេសប្រជាជននៅ ញូវយ៉ក និងកាលីហ្វ័រញ៉ា កំពុងជួបប្រទះនឹងតម្លៃកាន់តែខ្ពស់ ដោយអ្នកខ្លះចំណាយច្រើនដល់ទៅ៩ដុល្លារ ឬច្រើនជាងនេះក្នុងស៊ុតមួយឡូ។

ពាក់ព័ន្ធបញ្ហានេះ រដ្ឋបាលលោក ដូ ណាល់ត្រាំ បានប្រកាសពីយុទ្ធសាស្ត្រប្រាំចំណុចកាលពីថ្ងៃពុធ ដើម្បីប្រយុទ្ធប្រឆាំងនឹង​វិបត្តិនេះ ដោយសន្យា​​ទម្លាក់​លុយជំនួយ​ដល់ទៅ១ពាន់លានដុល្លារអាមេរិកក្នុងវិធានការណ៍សង្គ្រោះ ក្នុងនោះ​៥០០​លាន​ដុល្លារ​ ដើម្បីបង្កើនវិធានការការពារជីវសុវត្ថិភាពនៅកសិដ្ឋានចិញ្ចឹមសត្វ ផ្តល់ជំនួយសង្គ្រោះហិរញ្ញវត្ថុចំនួន ៤០០ លាន​ដុល្លារដល់កសិករដែលរងផលប៉ះពាល់ និងបែងចែក១០០​លានដុល្លារទៀតសម្រាប់ការស្រាវជ្រាវរកវ៉ាក់សាំង។

យុទ្ធសាស្ត្ររបស់រដ្ឋបាលក៏មានការស្វែងរកប្រភពស៊ុតពីទីផ្សារក្រៅប្រទេស ដូចជាការនាំចូលស៊ុតពីប្រទេសតួកគី។USDA បាន​បញ្ជាក់​ថា ខ្លួនក៏​កំពុង​ពិភាក្សា​ជាមួយ​ប្រទេស​មួយ​ចំនួន​ទៀត​ដើម្បី​ធានា​ការ​នាំ​ចូល​ស៊ុត​បន្ថែម​ដែល​ជា​ផ្នែក​នៃ​ដំណោះស្រាយ​រយៈពេល​ខ្លី​​ចំពោះ​វិបត្តិនេះ។

ទោះយ៉ាងណាអ្នក​រិះគន់​បាន​ចង្អុល​ទៅ​ការ​ដោះស្រាយ​វិបត្តិ​របស់​រដ្ឋបាល​ថា​អាច​ធ្វើ​ឲ្យ​ស្ថានការណ៍​កាន់តែ​អាក្រក់។ ការបញ្ឈប់ការងារយ៉ាងច្រើននាពេលថ្មីៗនេះរបស់រដ្ឋបាល លោក ត្រាំ នៅទីភ្នាក់ងារសហព័ន្ធ រួមទាំង USDA បានរំខានដល់ការតាមដាន ការធ្វើតេស្ត និងការផ្សព្វផ្សាយរបស់រដ្ឋាភិបាលចំពោះជំងឺផ្តាសាយបក្សី៕

អត្ថបទ៖ ប៊ុន សុភាព