លោក ត្រាំ ពង្រឹង​សន្ដិសុខ​នៅ​ព្រំដែន​ម៉ិកស៊ិក ដោយ​​ពង្រាយ​ទ័ព​បន្ថែម ៣ ០០០​នាក់

មន្ទីរបញ្ចកោណ បានប្រកាសពីការដាក់ពង្រាយទាហានសកម្មប្រមាណ ៣ ០០០​នាក់បន្ថែមទៀតទៅកាន់ព្រំដែនអាមេរិក-ម៉ិកស៊ិក ដើម្បីទប់ស្កាត់ការធ្វើអន្តោប្រវេសន៍ខុសច្បាប់ ដែលជាការផ្តោតសំខាន់នៃរដ្ឋបាលរបស់ប្រធានាធិបតី ដូណាល់ ត្រាំ។

ការដាក់ពង្រាយនេះ មានទាហាន ២ ៤០០​នាក់មកពីក្រុមប្រយុទ្ធនៃកងពលតូច Stryker និងបុគ្គលិក ៥០០​នាក់មកពីកងពលតូចអាកាសចរណ៍ដែលនាំឲ្យ​ចំនួនទាហានសរុបនៅព្រំដែនមានប្រហែល ៩ ០០០​នាក់។ កងកម្លាំងដែលត្រូវបានតែងតាំងថ្មីត្រូវបានគេរំពឹងថានឹងទៅដល់ក្នុងប៉ុន្មានសប្តាហ៍ខាងមុខនេះ ដើម្បីពង្រឹងសន្តិសុខតាមព្រំដែន និងការពារបូរណភាពទឹកដីរបស់សហរដ្ឋ​អាមេរិក។

សកម្មភាពនេះ ធ្វើតាមបទ​បញ្ជាប្រតិបត្តិពីប្រធានាធិបតី ត្រាំ ដែលដឹកនាំយោធា​ឲ្យ​ចាត់វិធានការចាំបាច់ ដើម្បីបញ្ឈប់អ្វីដែលគាត់បានពិពណ៌នាថាជា«ការឈ្លានពាន» នៃជនអន្តោប្រវេសន៍ខុសច្បាប់។ រដ្ឋមន្ត្រីការពារជាតិលោក Pete Hegseth បានសង្កត់ធ្ងន់លើការប្តេជ្ញាចិត្តរបស់រដ្ឋបាលក្នុងការសម្រេចបាននូវការគ្រប់គ្រងប្រតិបត្តិការពេញលេញនៃព្រំដែនភាគខាងត្បូង។

កងទ័ព​ដែល​ត្រៀម​ដាក់​ពង្រាយ​បន្ថែម នឹងគាំទ្រដល់ប្រតិបត្តិការសន្តិសុខព្រំដែនដែលមានស្រាប់ រួមទាំងការតាមដាន-ត្រួតពិនិត្យ ការងាររដ្ឋបាល ការដឹកជញ្ជូន ការថែទាំយានយន្ត និងជំនួយផ្នែកវិស្វកម្ម។ គួរកត់សម្គាល់ថា បុគ្គលិកយោធានឹងមិនចូលរួមដោយផ្ទាល់នៅក្នុងសកម្មភាពរារាំង ឬនិរទេសខ្លួនឡើយ។

នេះ​គឺ​ជាផ្នែកមួយនៃកិច្ចខិតខំប្រឹងប្រែងបន្តដើម្បីកាត់បន្ថយការឆ្លងដែនខុសច្បាប់ ដែលមានការថយចុះយ៉ាងខ្លាំងចាប់តាំងពីលោក ត្រាំ ចូលកាន់តំណែង។ ខែកុម្ភៈបានកត់ត្រាចំនួនទាបបំផុតនៃការឆ្លងដែនខុសច្បាប់ក្នុងប្រវត្តិសាស្ត្រ នេះបើយោងតាម​របាយការណ៍​គយ និងការ​ការពារ​នៅ​ព្រំដែន​អាមេរិក។

ការបន្តវត្តមានយោធា មានគោលបំណងដោះស្រាយបញ្ហាទាក់ទងនឹងការធ្វើចំណាកស្រុក ការជួញដូរគ្រឿងញៀន និងឧក្រិដ្ឋកម្មឆ្លងដែននៅតាមព្រំដែនភាគខាងត្បូង។ បុគ្គលិកយោធាបាននិងកំពុងជួយនៅព្រំដែនអស់ជាច្រើនទសវត្សរ៍ ដើម្បីប្រយុទ្ធប្រឆាំងនឹងបញ្ហាប្រឈមទាំងនេះ ហើយការដាក់ពង្រាយបច្ចុប្បន្នបានគូសបញ្ជាក់ពីការយកចិត្តទុកដាក់​រឹត​តែ​ខ្លាំង​​របស់រដ្ឋបាលលោក ត្រាំ ក្នុងការពង្រឹងសន្តិសុខព្រំដែន៕

ដោយ៖ ឈាង