ព័ត៌មានអន្ដរជាតិ

ព្រឹលបាក់សង្កត់ជម្រកកម្មករសំណង់បណ្តាលឲ្យស្លាប់៨នាក់នៅរដ្ឋជាប់ព្រំដែនឥណ្ឌា-ចិន

បានផុស

៤ សប្តាហ៍ មុន

នៅ

ថ្ងៃចន្ទ ៣ មីនា ២០២៥

ដោយ

ចំនួនអ្នកស្លាប់បានកើនឡើងដល់៨នាក់ក្នុងហេតុការណ៍បាក់ព្រឹលកាលពីថ្ងៃសុក្រនៅក្នុងតំបន់ភ្នំហិម៉ាឡៃនៃរដ្ឋ Uttarakhand របស់ប្រទេសឥណ្ឌា បន្ទាប់ពីអាជ្ញាធរបានបញ្ចប់ប្រតិបត្តិការដើម្បីជួយសង្គ្រោះកម្មករដែលជាប់នៅក្នុងនោះ។ នេះបើយោងតាមការចេញផ្សាយរបស់សារព័ត៌មាន Al Jazeera នៅថ្ងៃទី៣ខែមីនានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីថ្ងៃសុក្រមានហេតុការណ៍បាក់ព្រឹលវាយប្រហារកន្លែងស្នាក់នៅរបស់កម្មករសំណង់ប្រមាណ៥៥នាក់ នៅជិតភូមិ Mana ក្នុងស្រុក Chamoli ជាប់ព្រំដែនជាមួយទីបេក្នុងតំបន់ភ្នំហិម៉ាឡៃយ៉ានរដ្ឋ Uttarakhand។

គិតត្រឹមថ្ងៃសៅរ៍ ក្រុមអ្នកជួយសង្រ្គោះអាចជួយមនុស្សចំនួន៥០នាក់ចេញពីកន្លែងកើតហេតុ ប៉ុន្តែ៤នាក់ក្រោយមកបានបាត់បង់ជីវិត ដោយសាររបួសធ្ងន់ធ្ងរពេក។ មកដល់ថ្ងៃអាទិត្យ ក្រុមជួយសង្គ្រោះបានរកឃើញសាកសពដែលនៅសេសសល់ តាមរយៈយន្តហោះគ្មានមនុស្សបើក និងសត្វឆ្កែស្វែងរកដែលនាំឲ្យចំនួនអ្នកស្លាប់កើនដល់៨នាក់។

យោងតាមកងទ័ពឥណ្ឌា ភាគច្រើននៃអ្នកដែលជាប់ក្នុងកន្លែងស្នាក់នៅគឺជាពលករចំណាកស្រុកដែលធ្វើការលើគម្រោងពង្រីកផ្លូវហាយវេដែលមានប្រវែង៥០គីឡូម៉ែត្រពី Mana ដែលជាភូមិរបស់ឥណ្ឌាទៅ Mana Pass ក្បែរព្រំដែនចិន។

គួររម្លឹកថាក្នុងឆ្នាំ២០២១ មនុស្សជិត១០០នាក់បានស្លាប់នៅរដ្ឋ Uttarakhand ដោយសារផ្ទាំងទឹកកកព្រឹលដ៏ធំមួយបានធ្លាក់ចូលទៅក្នុងទន្លេដែលបង្កឱ្យមានទឹកជំនន់ភ្លាមៗ។ កាលពីឆ្នាំ២០១៣ ក៏មានការបំផ្លិចបំផ្លាញដោយសារទឹកជំនន់ និងការរអិលបាក់ព្រឹលបានសម្លាប់មនុស្ស៦០០០នាក់ ហើយបាននាំឱ្យមានការអំពាវនាវឱ្យពិនិត្យឡើងវិញនូវគម្រោងអភិវឌ្ឍន៍នៅក្នុងរដ្ឋ។ ជាមួយគ្នានេះនៅឆ្នាំ ២០២២ ហេតុការណ៍បាក់ផ្ទាំងទឹកកកព្រឹលក៏បានសម្លាប់អ្នកឡើងភ្នំចំនួន២៧នាក់នៅរដ្ឋ Uttarakhandដែរ៕