ព័ត៌មានអន្ដរជាតិ

ត្រាំ ត្រៀមដកទណ្ឌកម្មចេញខ្លះពី រុស្ស៊ី

បានផុស

២ នាទីutes មុន

នៅ

ថ្ងៃអង្គារ ៤ មីនា ២០២៥

ដោយ

ស្របពេលសហរដ្ឋអាមេរិក កាន់តែមានទំនាក់ទំនងល្អឡើងៗជាមួយរុស្ស៊ីនោះ ឥឡូវលោក ដូណាល់ ត្រាំ កំពុងត្រៀមដកទណ្ឌកម្មចេញខ្លះពីប្រទេសរុស្ស៊ី។

លោក ត្រាំ និងលោក ពូទីន កាលពីឆ្នាំ២០១៧ (រូបថត៖ EPA)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាំងពីឡើងកាន់តំណែងមក លោក ត្រាំ បានខិតខំពង្រឹងចំណងទាក់ទងផ្នែកការទូតជាមួយទីក្រុងមូស្គូខ្លាំងមែនទែន ហើយព្យាយាមចរចាដើម្បីបញ្ចប់សង្គ្រាមនៅអ៊ុយក្រែន ខណៈសម្ព័ន្ធមិត្តអឺរ៉ុបមួយចំនួន កំពុងបារម្ភថា អ៊ុយក្រែន នឹងត្រូវខ្ទេចនៅក្នុងអាណត្តិរបស់លោក ត្រាំ នេះ ទើបនាំគ្នាស្វះស្វែងជួយទីក្រុងកៀវ ជាពិសេសអង់គ្លេសនិងបារាំងតែម្តង។

តាមការចុះផ្សាយរបស់ RT នៅថ្ងៃអង្គារទី៤ខែមីនាឆ្នាំ២០២៥, ពេលនេះ សេតវិមានបានបញ្ជាឲ្យក្រសួងការបរទេសនិងរតនាគារ ធ្វើបញ្ជីហើយ និងដាក់រាយទណ្ឌកម្មដែលនឹងត្រូវបន្ធូរបន្ថយលើក្រុមហ៊ុន អង្គភាព ក៏ដូចជាជនជាតិរុស្ស៊ី ជាពិសេសអ្នកជំនួញតែម្តង។

យ៉ាងណា គេនៅតែមិនទាន់ដឹងថា តើទីក្រុងមូស្គូ នឹងដោះដូរអ្វីវិញដែរឬអត់ ជាមួយការដកទណ្ឌកម្មនេះ ខណៈស្ថានទូតរុស្ស៊ីប្រចាំនៅទីក្រុងវ៉ាស៊ីនតោន ក៏មិនទាន់ធ្វើអត្ថាធិប្បាយអ្វីដែរ។

សូមជម្រាបថា លោក ត្រាំ បាននិយាយទូរស័ព្ទជាមួយប្រធានាធិបតីរុស្ស៊ី វ៉្លាឌីមៀរ ពូទីន កាលថ្ងៃទី១២ខែកុម្ភៈ ដែលបើកផ្លូវសម្រាប់ការស្តារទំនាក់ទំនងប្រទេសទាំងពីរឡើងវិញ ក្រោយការផ្តាច់ចំណងការទូតជិត៣ឆ្នាំ បន្ទាប់ពីរុស្ស៊ីលើកទ័ពលុកលុយអ៊ុយក្រែនកាលថ្ងៃទី២៤ខែកុម្ភៈឆ្នាំ២០២២។

លោក ត្រាំ និងលោក ពូទីន កាលពីឆ្នាំ២០១៩ (រូបថត៖ RIA)

រដ្ឋមន្ត្រីការបរទេសរុស្ស៊ីនិងសហរដ្ឋអាមេរិក បានជួបពិភាក្សាគ្នាលើកដំបូងនៅថ្ងៃទី១៨ខែកុម្ភៈក្នុងរាជធានីរីយ៉ាដនៃប្រទេសអារ៉ាប៊ីសាអូឌីត ដែលជាកិច្ចពិភាក្សាលម្អិតលើដំណើរការស្តារទំនាក់ទំនងការទូតនេះឈានទៅរកប្រក្រតីភាពឡើងវិញ។

ចាប់តាំងពីពេលនោះមក រដ្ឋមន្ត្រីការបរទេសរុស្ស៊ី លោក Sergei Lavrov បានបំពេញទស្សនកិច្ចការទូតទៅកាន់បណ្តាប្រទេសជាសម្ព័ន្ធមិត្តរបស់ខ្លួនស្រាប់ ដូចជា អ៊ីរ៉ង់ និងប្រទេសមួយចំនួនក្នុងតំបន់អារ៉ាប់ដូចជា កាតា និងទៅកាន់ប្រទេសនៅតំបន់អាហ្រ្វិក ក៏ដូចជាចូលរួមកិច្ចប្រជុំរដ្ឋមន្ត្រីការបរទេសនៃក្រុមប្រទេសអភិវឌ្ឍន៍សេដ្ឋកិច្ចហៅកាត់ថា G20 ផងដែរ៕

អត្ថបទ៖ សុខ សុវណ្ណ

ចុចអាន៖ រុស្ស៊ីពង្រឹងការទូតយ៉ាងខ្លាំង ក្រោយអាមេរិកផ្សះផ្សាវិញ ប៉ុន្តែដូណាល់ ត្រាំបំបែកសម្ព័ន្ធមិត្ត