សំរាម១៥០០តោន​​អណ្តែត​តាមទឹកជំនន់​នៅ​ទន្លេ Ciliwung​ នៅ​​ឥណ្ឌូណេស៊ី

ទឹកជំនន់ដែលបណ្ដាលមកពីភ្លៀងធ្លាក់ខ្លាំងបានវាយប្រហារនៅទីក្រុង Bekasi ក្បែរទីក្រុងហ្សាការតាប្រទេសឥណ្ឌូណេស៉ី​ បណ្ដាលឲ្យទឹកហៀរហូរនាំសំរាមចូលទន្លេ Ciliwung​ ប្រមាណ១៥០០តោន។ នេះបើយោងតាមការចេញផ្សាយរបស់សារព័ត៌មាន CNN នៅថ្ងៃទី៤ខែមីនានេះ។

យោងតាមទីភ្នាក់ងារគ្រប់គ្រងគ្រោះមហន្តរាយក្នុងតំបន់ Bekasi City (BPBD) កម្រិតទឹកបានឡើងដល់កម្រិត ៨៧៥សង់ទីម៉ែត្រ ដែលច្រើនជាងពីរដងនៃសមត្ថភាពអតិបរមារបស់ទន្លេ Bekasi ដែលមានត្រឹមទំហំ៣៥០សង់​ទីម៉ែត្រ។ ដោយសារកម្រិតទឹកហក់ឡើងខ្លាំង ទន្លេ Bekasi បានហូរហៀរ ធ្វើឱ្យលិចតំបន់លំនៅដ្ឋានដែលនៅជាប់ច្រាំងទន្លេ ខណៈសំរាមហូរតាមទឹកពាសវាលពាសកាល។

ទីតាំងដែលរងគ្រោះខ្លាំងបំផុត រួមមាន TmBN Kemang IFI, Pondok Gede Permai និង Vila Nusa Indah ដែលមានទឹកជំនន់ឡើងដល់ជាងបីម៉ែត្រ ដោយបានលិចទឹកលើដំបូលផ្ទះនៅជាន់ទីមួយ។ ទឹកជំនន់បានលិចដល់ផ្លូវសំខាន់ៗក្នុងទីក្រុង Bekasi និងតំបន់នានាដែលនៅជាប់នោះ ខណៈស្ពានឆ្លងកាត់ទន្លេ Bekasi ក៏ត្រូវបានបិទដោយសារតែលិចទឹកផងដែរ។

អាជ្ញាធរក៏បានពង្រាយក្រុម​រុករក​និង​ជួយ​សង្គ្រោះ​ ប៉ូលិស យោធា ក៏ដូចជាអ្នកស្ម័គ្រចិត្តកាន់​កន្លែង​ជន់​លិច​ក្នុង​ក្រុងទីក្រុង Bekasi ដើម្បីជួយដល់ប្រតិបត្តិការជួយសង្គ្រោះនេះផងដែរ៕

អត្ថបទ៖ ប៊ុន សុភាព