អ្នកជំនាញ៖ កូរ៉េខាងជើង ប្រហែលមាននុយក្លេអ៊ែរ អាចបាញ់ខ្ទេចទីក្រុងអាមេរិកមួយបានហើយ

អ្នកជំនាញផ្នែកអភិវឌ្ឍន៍កម្មវិធីនុយក្លេអ៊ែររបស់កូរ៉េខាងជើងនៅវិទ្យាស្ថានសន្តិភាពអន្តរជាតិ Carnegie Endowment នៃសហរដ្ឋអាមេរិក លោក Ankit Panda បានព្រមានថា ឥឡូវនេះ ប្រទេសកូរ៉េខាងជើង ប្រហែលមានក្បាលគ្រាប់នុយក្លេអ៊ែរដែលមានសមត្ថភាពអាចបំផ្ទុះខ្ទេចទីក្រុងអាមេរិកមួយបានហើយ។ 

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Panda លើកឡើងថា សម្ព័ន្ធភាពរុស្ស៊ី-កូរ៉េខាងជើង បានពង្រឹងកម្លាំងទីក្រុងព្យុងយ៉ាងឲ្យកាន់តែខ្លាំង និងជួយបង្កើនសមត្ថភាពប្រទេសនេះឲ្យផលិតបានក្បាលគ្រាប់នុយក្លេអ៊ែរ ដែលនឹងបំផ្ទុះទីក្រុងមួយរបស់អាមេរិក ឲ្យខ្ទេចបានរួចទៅហើយ។

មិនត្រឹមប៉ុណ្ណឹង លោក Panda ក៏ព្រមានដែរថា ត្រឹមឆ្នាំ២០៣៥ កូរ៉េខាងជើង អាចមានអាវុធនុយក្លេអ៊ែរ ច្រើនជាងចក្រភពអង់គ្លេសទៅទៀត នេះក៏ព្រោះតែមានជំនួយពីប្រទេសរុស្ស៊ី។

បច្ចុប្បន្ន កូរ៉េខាងជើងមានអាវុធនុយក្លេអ៊ែរប្រហែល៥០គ្រាប់ ប៉ុន្តែអាចកើនដល់៣០០គ្រាប់ក្នុងរយៈពេលមួយទសវត្សរ៍ ចំណែកអង់គ្លេសឥឡូវមាន ២២៥គ្រាប់។

ដំបូងឡើយមានសេចក្តីរាយការណ៍ថា លោកគីម ជុងអ៊ុន សុខចិត្តបញ្ជូនទ័ពទៅរុស្ស៊ី ជាថ្នូរឲ្យលោកពូទីន ជួយជាជំនួយបច្ចេកទេសក្នុងការអភិវឌ្ឍនិងពន្លឿនកម្មវិធីនុយក្លេអ៊ែរ ហើយនេះគឺជាអ្វីដែលធ្វើឲ្យគេបារម្ភរឹតខ្លាំងចំពោះវិធីនុយក្លេអ៊ែរ របស់ទីក្រុងព្យុងយ៉ាង។

ពាក់ព័ន្ធនឹងអាវុធនុយក្លេអ៊ែរនេះដែរ អ្នកជំនាញអន្តរជាតិបានព្រមានថា អឺរ៉ុបត្រូវតែបង្កើនស្តុកអាវុធនុយក្លេអ៊ែររបស់ខ្លួនឲ្យបានខ្លាំងបំផុត ប្រសិនបើសហរដ្ឋអាមេរិកដកខ្លួនចេញពីអង្គការណាតូ ហើយឈប់ផ្តល់ការធានាសន្តិសុខដល់ទ្វីបនេះ ព្រោះអឺរ៉ុបកំពុងប្រឈមមុខនឹងការគំរាមកំហែងពីរុស្ស៊ី។

លោក Maximilian Terhalle អតីតទីប្រឹក្សាជាន់ខ្ពស់សម្រាប់កិច្ចការយុទ្ធសាស្ត្ររបស់ក្រសួងការពារជាតិអង់គ្លេស បានប្រាប់កាសែត The Telegraph ថា «យើងត្រូវធ្វើយ៉ាងណា ឲ្យបានចំនួនស្មើនឹងក្បាលគ្រាប់យុទ្ធសាស្ត្រ ១ ៥៥០គ្រាប់ដែលរុស្ស៊ីបានដាក់ពង្រាយ បើមិនដូច្នោះទេ យើងមិនអាចទប់ទល់នឹងលោក ពូទីន បានឡើយ»៕

អត្ថបទ៖ សុខ សុវណ្ណ

ចុចអាន៖ កូរ៉េ​ខាង​ជើង ស្ដី​ឲ្យ​អាមេរិក​ថា​ចេះតែ​បង្ក​រឿង ក្រោយ​ដាក់​ពង្រាយ​នាវា​ផ្ទុក​យន្តហោះចម្បាំង​នៅ​ប៊ូសាន