អាល្លឺម៉ង់ ប្រកាសថា សព្វាវុធដែលខ្លួនបម្រុងទុកសម្រាប់ជួយអ៊ុយក្រែន គឺយកចេញអស់ពីឃ្លាំងហើយ

ប្រទេសអាល្លឺម៉ង់ប្រកាសថា ពេលនេះសព្វាវុធដែលខ្លួនបម្រុងទុកសម្រាប់ជួយអ៊ុយក្រែន គឺត្រូវបានបញ្ចេញអស់ពីឃ្លាំងហើយ។ នេះបើតាមការចុះផ្សាយរបស់ RT។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងសន្និសីទសារព័ត៌មាននៅថ្ងៃព្រហស្បតិ៍ទី៦ខែមីនាឆ្នាំ២០២៥ អ្នកនាំពាក្យក្រសួងការពារជាតិ Michael Stempfle បានបញ្ជាក់យ៉ាងច្បាស់ថា ពិតណាស់ទីក្រុងបែរឡាំងគឺជាម្ចាស់ជំនួយដ៏ធំមួយរបស់អ៊ុយក្រែន ដោយជួយទីក្រុងកៀវច្រើនណាស់។ យ៉ាងណា អាល្លឺម៉ង់ក៏ត្រូវតែពង្រឹងសមត្ថភាពការពាររបស់ខ្លួនដែរ ដូច្នេះសូមសម្ព័ន្ធមិត្តយល់ពីរឿងនេះ។ អាវុធដែលអាល្លឺម៉ង់ បម្រុងទុកជួយអ៊ុយក្រែននោះ គឺត្រូវបានយកចេញអស់ពីឃ្លាំងបាត់ទៅហើយ។

ចាប់តាំងពីជម្លោះរុស្ស៊ី-អ៊ុយក្រែនផ្ទុះឡើងក្នុងឆ្នាំ២០២២មក អាល្លឺម៉ង់បានផ្តល់ជំនួយផ្នែកយោធានិងហិរញ្ញវត្ថុដល់ទីក្រុងកៀវប្រមាណ ៤៧ពាន់លានដុល្លារអាមេរិក ហើយជំនួយនោះក៏រួមមានទាំងរថក្រោះ Leopard, រ៉ុកកែតប្រឆាំងរថក្រោះ Panzerfaust 3, មីស៊ីលបាញ់យន្តហោះ Stinger និងរថពាសដែកប្រឆាំងយន្តហោះ Gepard ផងដែរ។

ការលើកឡើងពីសំណាក់មន្ត្រីជាន់ខ្ពស់អាល្លឺម៉ង់រូបនេះ គឺចំពេលសហរដ្ឋអាមេរិក សម្រេចផ្អាកជំនួយអ៊ុយក្រែនគ្រប់មុខ ក្រោយលោក ដូណាល់ ត្រាំ ទាស់សម្តីជាមួយប្រមុខអ៊ុយក្រែន វ៉ូឡូឌីមៀរ ហ្សេលេនស្គី។

មិនត្រឹមតែផ្អាកជំនួយជាសព្វាវុធទេ ក៏មានសេចក្តីរាយការណ៍ដែរថា អាមេរិកថែមទាំងពិចារណាលែងចែករំលែកព័ត៌មានសម្ងាត់ និងការបណ្តុះបណ្តាលសម្រាប់កងទ័ពនិងអាកាសយានិកអ៊ុយក្រែនទៀតផង។

វិធានការនេះ ធ្វើឲ្យរុស្ស៊ីសប្បាយចិត្តញញឹមបិទមាត់មិនជិត ហើយអ្នកនាំពាក្យវិមានក្រឹមឡាំងលោក Dmitry Peskov និយាយថា ការធ្វើបែបនេះ នឹងអាចដោះស្រាយឈានទៅរកការបញ្ចប់ជម្លោះបាន។

យោងតាមលោក Peskov, អាមេរិក ជាម្ចាស់ជំនួយយោធាធំបំផុតរបស់អ៊ុយក្រែន ហើយបើសិនអាមេរិកលែងខ្វាយខ្វល់និងដកដៃផ្អាកការផ្អត់ផ្គង់មែននោះ វានឹងក្លាយជាការរួមចំណែកដ៏ល្អបំផុតដល់បុព្វហេតុសន្តិភាព។ អ៊ុយក្រែន នឹងលែងសូវសម្បូរគ្រាប់ដូចមុន ព្រមទាំងខ្វះគ្រឿងសឹកនិងផ្នែកចារកម្ម ដូច្នេះពួកគេនឹងងាកមករកដំណោះស្រាយស្ថានការណ៍ដោយសន្តិវិធី៕

អត្ថបទ៖ សុខ សុវណ្ណ

ចុចអាន៖ រុស្ស៊ី ពេញចិត្តខ្លាំងដែលអាមេរិក ផ្អាកជំនួយទៅអ៊ុយក្រែន