ព័ត៌មានអន្ដរជាតិ

បារាំង អង់គ្លេស និងអាល្លឺម៉ង់ ជំរុញឲ្យអ៊ីស្រាអែលបើកជំនួយចូលតំបន់ហ្គាហ្សាឡើងវិញ

បានផុស

៤៥ វិនាទី មុន

នៅ

ថ្ងៃព្រហស្បតិ៍ ៦ មីនា ២០២៥

ដោយ

Chheang

បារាំង ចក្រភពអង់គ្លេស និងអាល្លឺម៉ង់ នៅថ្ងៃទី៦ខែមីនានេះបានរួមគ្នាអំពាវនាវឲ្យអ៊ីស្រាអែលរក្សាកាតព្វកិច្ចអន្តរជាតិរបស់ខ្លួន ដោយអនុញ្ញាតឲ្យមានលំហូរជំនួយមនុស្សធម៌ដែលមិនមានការរឹតបន្តឹងទៅកាន់តំបន់ហ្គាហ្សា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងសេចក្តីថ្លែងការណ៍ដែលចេញផ្សាយដោយរដ្ឋមន្ត្រីការបរទេសរបស់ពួកគេ ប្រទេសទាំងបីបានសង្កត់ធ្ងន់ថា ជំនួយគួរតែត្រូវបានផ្តល់នៅក្នុងលក្ខណៈ«ពេញលេញ រហ័ស សុវត្ថិភាព និងគ្មានការរារាំង» ដោយមិនមានលក្ខខណ្ឌនយោបាយ ឬលក្ខខណ្ឌបទឈប់បាញ់។

ពួកគេបានគូសបញ្ជាក់ពីភាពបន្ទាន់នៃការរក្សាបទឈប់បាញ់ និងធានាការដោះលែងចំណាប់ខ្មាំងទាំងអស់ ដោយបន្ថែមថា ស្ថានភាពមនុស្សធម៌នៅតំបន់ហ្គាហ្សានៅតែមានសភាពធ្ងន់ធ្ងរ ដោយមានជនស៊ីវិលរាប់លាននាក់កំពុងត្រូវការជំនួយជាបន្ទាន់។

ប្រទេសអ៊ឺរ៉ុបទាំងបី បានពណ៌នាអំពីស្ថានភាពមនុស្សធម៌នៅហ្គាហ្សាថាជា «មហន្តរាយ» ដោយលើកឡើងថា៖ «ជំនួយមនុស្សធម៌មិនគួរជាប់ពាក់ព័ន្ធនឹងបទឈប់បាញ់ ឬប្រើជាឧបករណ៍នយោបាយឡើយ»។

សូមបញ្ជាក់ថា ដំណាក់កាលដំបូងនៃកិច្ចព្រមព្រៀងឈប់បាញ់គ្នានៅតំបន់ហ្គាហ្សាបានបញ្ចប់កាលពីចុងសប្តាហ៍មុន ក្រោយការអនុវត្តរយៈពេលប្រាំមួយសប្តាហ៍ ដោយមានការផ្លាស់ប្តូរចំណាប់ខ្មាំងអ៊ីស្រាអែលដែលត្រូវបានចាប់ខ្លួននៅពេលដែលក្រុមហាម៉ាសបានវាយប្រហារអ៊ីស្រាអែលនៅថ្ងៃទី៧ខែតុលាឆ្នាំ២០២៣ សម្រាប់អ្នកទោសប៉ាឡេស្ទីនដែលត្រូវបានឃុំខ្លួននៅក្នុងពន្ធនាគារអ៊ីស្រាអែល៕

ដោយ៖ ឈាង

ចុចអាន៖ អ៊ីស្រាអែល គំរាមផ្ដាច់ទឹក និងភ្លើងនៅតំបន់ហ្គាហ្សា ដើម្បីដាក់សម្ពាធក្រុមហាម៉ាស