ឧទ្ធម្ភាគចក្រពេទ្យធ្លាក់​នៅរដ្ឋ Mississippi​ បណ្តាល​ឲ្យស្លាប់​៣នាក់​

មនុស្ស៣នាក់ដែលជាអ្នកបើកបរ និងបុគ្គលិកមន្ទីរពេទ្យពីរនាក់បាន​ស្លាប់ បន្ទាប់ពីឧទ្ធម្ភាគចក្រពេទ្យបានធ្លាក់នៅក្នុងរដ្ឋ Mississippi សហរដ្ឋអាមេរិក​​។ នេះបើយោងតាមការចេញផ្សាយរបស់ទីភ្នាក់ងារព័ត៌មាន AP នៅថ្ងៃទី១១ខែមីនានេះ។

ឧទ្ធម្ភាគចក្រពេទ្យមួយគ្រឿង​បានធ្លាក់នៅតំបន់ដែលមានព្រៃឈើយ៉ាង​ក្រាស់​ នៅ​​ភាគខាងត្បូងនៃ​ ឧទ្យាន​​ជាតិ Natchez Trace Parkway និងភាគខាងជើងនៃផ្លូវ Pipeline Road នៅតំបន់ Madison County ក្នុងរដ្ឋ Mississippi នៅម៉ោងប្រហែល១២:៣០យប់ កាលពីថ្ងៃចន្ទ ទី១០ខែមីនា។

ការធ្លាក់នេះបានសម្លាប់មនុស្សទាំងអស់នៅលើឧទ្ធម្ភាគចក្រដែល​ហោះ​ហើរ​ដោយ​​គ្មានអ្នកជំងឺនៅលើឧទ្ធម្ភាគចក្រ​នោះទេ​។ ក្រុមគ្រួសារជនរងគ្រោះទាំងបីត្រូវបានជូនដំណឹង ប៉ុន្តែអាជ្ញាធរមិនបានបញ្ចេញឈ្មោះ​អ្នកស្លាប់​ឡើយ​ទេ​ ដើម្បីការពារឯកជនភាព​របស់​ពួកគេ។

គួរបញ្ចាក់ថា នេះ​ជា​ការឧទ្ធម្ភាគចក្រ​ពេទ្យនេះលើក​ដំបូង​ក្នុង​រយៈពេល២៩ឆ្នាំ​ដែល​សេវា​សង្គ្រោះ​បន្ទាន់ AirCare ត្រូវ​បាន​ដំណើរការ​។ មិនទាន់មានរបាយការណ៍ជាក់លាក់ពីមូលហេតុនៃការធ្លាក់នេះនោះទេ ប៉ុន្តែរដ្ឋបាលអាកាសចរណ៍សហព័ន្ធ (FAA) និងក្រុមប្រឹក្សាសុវត្ថិភាពដឹកជញ្ជូនជាតិ (NTSB) នឹងស៊ើបអង្កេតការធ្លាក់នេះ៕

អត្ថបទ៖ ប៊ុន សុភាព