លោក Rubio ប្រាប់ឲ្យទាំងរុស្ស៊ីនិងអ៊ុយក្រែន ត្រូវតែធ្វើសម្បទាន ដើម្បីសន្តិភាព 

មុនជួបជាមួយគណៈប្រតិភូដែលធ្វើដំណើរមកពីទីក្រុងកៀវសម្រាប់កិច្ចពិភាក្សានៅឯប្រទេសអារ៉ាប៊ីសាអូឌីត រដ្ឋមន្ត្រីការបរទេសអាមេរិក Marco Rubio បានប្រាប់ទៅអ្នកកាសែតតាមផ្លូវទៅកាន់ទីក្រុង Jeddah កាលពីថ្ងៃចន្ទទី១០ខែមីនាឆ្នាំ២០២៥ថា បើអ៊ុយក្រែន ចង់ចរចារកសន្តិភាពជាមួយរុស្ស៊ីមែន ពួកគេត្រូវទទួលស្គាល់ថា ទឹកដីដែលរុស្ស៊ីដណ្តើមយកបានហើយនោះ គឺមិនអាចវិលត្រឡប់មកវិញទេ ចំណែកភាគីរុស្ស៊ីឯណោះក៏ត្រូវធ្វើសម្បទានដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដ្បិតមិនបកស្រាយលម្អិតអំពីកិច្ចព្រមព្រៀងណាមួយក៏ដោយ ប៉ុន្តែលោក Rubio លើកឡើងថា «រឿងសំខាន់បំផុតគឺថា ទាំងរុស្ស៊ីនិងអ៊ុយក្រែន ត្រូវតែយល់ពីគ្នា ហើយធ្វើការសម្រេចចិត្តដ៏លំបាកដើម្បីបញ្ចប់ជម្លោះ។ ដូច្នេះហើយ ការធ្វើសម្បទានរបស់ភាគីទាំងពីរ គឺជារឿងដ៏សំខាន់បំផុតដើម្បីឈានដល់ដំណោះស្រាយការទូត។ យោងតាមស្ថានភាពបច្ចុប្បន្ន គឺមិនអាចប្រើដំណោះស្រាយផ្នែកយោធាបានទេ។ រុស្ស៊ីមិនអាចគ្រប់គ្រងអ៊ុយក្រែនទាំងស្រុងបានឡើយ ហើយអ៊ុយក្រែន ក៏មិនអាចវាយទ័ពរុស្ស៊ីនិងយកទឹកដីឲ្យដូចឆ្នាំ២០១៤វិញបានដែរ»។

រម្លឹកទៅឆ្នាំ២០១៤ កាលនោះតំបន់ Crimea បានបោះឆ្នោតបំបែកចេញពីប្រទេសអ៊ុយក្រែន ទៅចូលរួមជាមួយរុស្ស៊ី បន្ទាប់ពីរដ្ឋប្រហារប្រដាប់អាវុធគាំទ្រដោយលោកខាងលិចនៅទីក្រុងកៀវ ខណៈតំបន់ភាគខាងកើតចំនួនពីរ បានប្រកាសឯករាជ្យ។

លុះក្រោយជម្លោះរុស្ស៊ី-អ៊ុយក្រែនផ្ទុះឡើងក្នុងឆ្នាំ២០២២ សាធារណរដ្ឋប្រជាមានិត Donetsk និង Lugansk រួមជាមួយតំបន់ Kherson និង Zaporozhye ក៏បានធ្វើប្រជាមតិ ចូលរួមជាមួយរុស្ស៊ីដែរ ហើយឥឡូវទីក្រុងមូស្គូទទួលស្គាល់ទឹកដីទាំងនេះថាជារបស់ខ្លួន៕

អត្ថបទ៖ សុខ សុវណ្ណ

ចុចអាន៖ ត្រាំ នឹងឲ្យជំនួយអ៊ុយក្រែនវិញ បើកិច្ចប្រជុំនៅអារ៉ាប៊ីសាអូឌីត ទទួលបានផ្លែផ្កា