ត្រាំ អញ្ជើញ ហ្សេលេនស្គី ទៅសេតវិមាន ម្តងទៀត

ថ្លែងទៅកាន់អ្នកសារព័ត៌មានក្រោយពេលអ៊ុយក្រែនឯកភាពលើបទឈប់បបាញ់ដែលស្នើឡើងដោយទីក្រុងវ៉ាស៊ីនតោន, ប្រធានាធិបតីអាមេរិក ដូណាល់ ត្រាំ និយាយថា លោកនឹងអញ្ជើញមេដឹកនាំអ៊ុយក្រែន វ៉ូឡូឌីមៀរ ហ្សេលេនស្គី ឲ្យមកសេតវិមានសាជាថ្មី។ នេះបើតាមការចុះផ្សាយរបស់ Telegraph កាលពីថ្ងៃអង្គារទី១១ខែមីនាឆ្នាំ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅឯទីក្រុង Jeddah នៃប្រទេសអារ៉ាប៊ីសាអូឌីតឯណោះ កិច្ចប្រជុំរវាងគណៈប្រតិអាមេរិកនិងអ៊ុយក្រែន ហាក់ទទួលបានផ្លែផ្កាជាទីគាប់ចិត្ត ដោយទីក្រុងកៀវយល់ព្រមលើសំណើឈប់បាញ់រយៈពេល៣០ថ្ងៃជាមួយរុស្ស៊ី ហើយទីក្រុងវ៉ាស៊ីនតោនក៏សម្រេចផ្តល់ជំនួយយោធានិងចែករំលែកការណ៍សម្ងាត់ឲ្យអ៊ុយក្រែនវិញដែរ។

ដោយមើលឃើញពីការវិវឌ្ឍយ៉ាងវិជ្ជមានដូច្នេះ លោក ត្រាំ បានប្រកាសអញ្ជើញលោក ហ្សេលេនស្គី មកសេតវិមានម្តងទៀត ហើយលោកក៏បញ្ជាក់ដែរថា នឹងនិយាយជាមួយប្រធានាធិបតីរុស្ស៊ី វ្ល៉ាឌីមៀរ ពូទីន នៅចុងសប្តាហ៍នេះ ជាមួយក្តីសង្ឃឹមថា ទីក្រុងមូស្គូ ក៏នឹងបើកចិត្តទទួលបទឈប់បាញ់នេះដូចគ្នា។

យ៉ាងណា គេនៅមិនទាន់ភ្លេចឡើយចំពោះរឿងហេតុកាលពីចុងខែកុម្ភៈ ដែលពេលនោះ លោក ត្រាំនិងហ្សេលេនស្គី បានទាស់សម្តីគ្នាបែកផ្សែងក្នុងការិយាល័យអូវ៉ាល់ ឈានដល់បង្ខំឲ្យមេដឹកនាំអ៊ុយក្រែន ដើរចេញពីសេតវិមានទាំងមិនបានចុះកិច្ចព្រមព្រៀងអ្វីសោះ។

តាមគម្រោង កាលនោះប្រធានាធិបតីអ៊ុយក្រែន ធ្វើដំណើរទៅទីក្រុងវ៉ាស៊ីនតោន ដើម្បីចុះហត្ថលេខាលើកិច្ចព្រមព្រៀងរ៉ែ ក្នុងគោលបំណងឲ្យអាមេរិកជួយបញ្ចប់សង្គ្រាមជាមួយរុស្ស៊ី ប៉ុន្តែលោក ត្រាំ បែរជាចោទ ហ្សេលេនស្គី ថា ​មិនចេះ​ដឹង​គុណដល់​ការ​គាំទ្រ​របស់​សហរដ្ឋ​អាមេរិកទៅវិញ។

ដោយសារខឹងចិត្ត ក្រោយមក ត្រាំ ក៏បញ្ជាឲ្យផ្អាកជំនួយអាមេរិកទៅអ៊ុយក្រែន ទាំងអស់ ជាពិសេសឈប់ផ្តល់ការណ៍សម្ងាត់អំពីរុស្ស៊ីឲ្យទីក្រុងកៀវថែមទៀតផង ដែលធ្វើឲ្យទ័ពលោកហ្សេលេនស្គី ជួបបញ្ហាប្រឈមដ៏ធំនៅសមរភូមិ។

មុននេះដែរ បេសកជនពិសេសរបស់លោក ត្រាំ គឺលោក Steve Witkoff អះអាងថា «លោក ហ្សេលេនស្គី បានផ្ញើលិខិតសុំទោសលោក ត្រាំ រួចហើយចំពោះហេតុការណ៍ដែលកើតឡើងក្នុងការិយាល័យពងក្រពើ»។

ដូច្នេះ គេរង់ចាំមើលថា បើលោកហ្សេលេនស្គី ពិតជាវិលទៅសេតវិមានម្តងទៀតមែន តើនឹងមានអ្វីកើតឡើង? ប្រធានាធិបតីអ៊ុយក្រែន នឹងទទួលបានប្រយោជន៍អ្វីខ្លះឬថាតើលោក ត្រាំ អាចធ្វើរឿងឲ្យពិភពលោកភ្ញាក់ផ្អើលទៀតឬក៏អត់?

អត្ថបទ៖ សុខ សុវណ្ណ

ចុចអាន៖ អាមេរិក ផ្តល់ជំនួយយោធានិងចែករំលែកការណ៍សម្ងាត់ឲ្យអ៊ុយក្រែន វិញហើយ