ព័ត៌មានអន្ដរជាតិ

ស្លាប់១៦នាក់ក្នុងហេតុការណ៍រថយន្តក្រុងក្រឡាប់នៅ ភាគឦសានអាហ្វ្រិកខាងត្បូង

បានផុស

១ នាទីute មុន

នៅ

ថ្ងៃពុធ ១២ មីនា ២០២៥

ដោយ

យ៉ាងហោចណាស់មនុស្ស១៦នាក់បានស្លាប់ និង រាប់សិបនាក់ផ្សេងទៀតបានរងរបួស បន្ទាប់ពីរថយន្តក្រុងមួយបានក្រឡាប់នៅក្នុងខេត្ត Gauteng ភាគឦសាននៃប្រទេសអាហ្វ្រិកខាងត្បូង។ យោងតាមភ្នាក់ងារព័ត៌មាន Xinhua នៅថ្ងៃទី១២ខែមីនានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Andile Mngwevu សមាជិកក្រុមប្រឹក្សាក្រុង បានអះអាងថា ឧបទ្ទវហេតុនេះបានកើតឡើងនៅលើផ្លូវហាយវ៉េក្នុងក្រុង Ekurhuleni ក្បែរអាកាសយានដ្ឋានអន្តរជាតិ OR Tambo របស់ទីក្រុង Johannesburg នៅម៉ោងប្រហែល ៦:៤៥ នាទីព្រឹក ម៉ោងក្នុងស្រុកកាលថ្ងៃអង្គារ។ រថយន្តក្រុងនេះកំពុងធ្វើដំណើរពី Katlehong ទៅ Kempton Park ។

បើតាមអ្នកនាំពាក្យក្រសួងដឹកជញ្ជូន រថយន្តក្រុងមួយគ្រឿងនេះបានបាត់បង់ការគ្រប់គ្រង ហើយបានក្រឡាប់សម្លាប់មនុស្ស ១៦នាក់ ដោយ១២ នាក់បានស្លាប់នៅកន្លែងកើតហេតុ និង៤នាក់នៅមន្ទីរពេទ្យ។ លើសពីនេះអ្នកដំណើរ១១ នាក់បានរងរបួសធ្ងន់ធ្ងរនិង ២៤នាក់បានរងរបួសស្រាល។

ការបង្កគ្រោះថ្នាក់នេះមិនប៉ះពាល់ដល់រថយន្តផ្សេងទៀតទេ ហើយសមត្ថកិច្ចក៏មិនទាន់រកឃើញមូលហេតុដែលបណ្ដាលឲ្យមានគ្រោះថ្នាក់នេះនៅឡើយទេ ខណៈប៉ូលិសកំពុងស៊ើបអង្កេត។

ពាក់ព័ន្ធបញ្ហានេះរដ្ឋមន្ត្រីដឹកជញ្ជូនអាហ្រ្វិកខាងត្បូងលោកស្រី Barbra Creecy បាននិយាយថា លោកស្រីមាន «ការព្រួយបារម្ភយ៉ាងខ្លាំង» ព្រោះវាគឺជាគ្រោះថ្នាក់រថយន្តក្រុងធ្ងន់ធ្ងរទីបីគិតចាប់ពីសប្តាហ៍មុន។ លោកស្រីបានណែនាំសាជីវកម្មគ្រប់គ្រងចរាចរណ៍ផ្លូវគោកឱ្យជួបជាមួយប្រតិបត្តិកររថយន្តក្រុងទាំងអស់ក្នុងសប្តាហ៍ខាងមុខ ដើម្បីពិភាក្សាអំពីវិធីកែលម្អសុវត្ថិភាពអ្នកដំណើរផងដែរ៕