ព័ត៌មានអន្ដរជាតិ

ប្រជាជន Greenland បោះឆ្នោតប្តូរមេដឹកនាំ ក្នុងកាលៈទេសៈផ្លាស់ប្តូរអនាគតកោះនេះ

បានផុស

២៨ វិនាទី មុន

នៅ

ថ្ងៃពុធ ១២ មីនា ២០២៥

ដោយ

លទ្ធផលបោះឆ្នោតសភាដែលមានសមាជិក៣១រូបរបស់កោះ Greenland បង្ហាញថា គណបក្សប្រជាធិបតេយ្យនិយមកណ្តាល «Demokraatit Party» បានឈ្នះការបោះឆ្នោតក្នុងកាលៈទេសៈដ៏សំខាន់នៃការប្រឈមនឹងការផ្លាស់ប្តូរជំហររបស់កោះនេះទៅរកឯករាជ្យ ឬបន្តស្ថិតនៅក្រោមការគ្រប់គ្រងរបស់ប្រទេសណាមួយ មានមហាអំណាចសហរដ្ឋអាមេរិក ឬបន្តនៅជាមួយដាណឺម៉ាក ដែលធ្លាប់ផ្តល់ការគាំទ្រផ្នែកការទូត នយោបាយ និងសេដ្ឋកិច្ចក្នុងពេលកន្លងមក។

លោក Jens-frederik nielsen (កណ្តាល) ប្រធានបក្សប្រជាធិបតេយ្យ រីករាយក្រោយដឹងថាឈ្នះឆ្នោត។ Sermitsiaq

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

Greenland ជាដែនដីកោះធំបំផុតក្នុងពិភពលោកស្ថិតនៅតំបន់អាកទិក មានប្រជាជនសរុបប្រមាណ៥៦០០០នាក់ បានស្ថិតនៅក្នុងរ៉ាដារបស់សហរដ្ឋអាមេរិកក្រោមរដ្ឋបាលលោក ដូណាល់ ត្រាំ ចាប់តាំងពីចុងអាណត្តិទីមួយរបស់គាត់ ហើយ ការប៉ុនប៉ងចង់បានកោះនេះស្ថិតក្រោមការគ្រប់គ្រងរបស់អាមេរិកបង្ហាញកាន់តែច្បាស់នៅពេលលោកកាន់អំណាចសាជាថ្មីនៅក្នុងអាណត្តិទី២នេះ។

ការថ្លែងសារបំណងយកដែនដីកោះ Greenland មកស្ថិតក្រោមការគ្រប់គ្រងចុងក្រោយរបស់លោក ដូណាល់ ត្រាំ គឺនៅពេលលោកថ្លែងនៅក្នុងសភាកាលពីអាទិត្យមុន ដោយនិយាយថា ការយកកោះនេះគឺជារឿងជៀសមិនរួចដោយមធ្យោបាយមួយ ឬដោយមធ្យោបាយណាផ្សេងទៀត។ មធ្យោបាយដែលលោកធ្លាប់លើកឡើងគឺដោយការទិញពីប្រទេសដាណឺម៉ាក ឬក៏ដោយមធ្យោបាយយោធា។

យោងទីភ្នាក់ងារព័ត៌មាន AP គណបក្សប្រជាធិបតេយ្យ (Demokraatit) បានឈ្នះឆ្នោតច្រើនបំផុត ខណៈគណបក្ស Naleraq (Point of Orientation) បានឈ្នះលំដាប់លេខ២។ គណបក្សទាំងពីរនេះត្រូវបានគេដឹងថា គាំទ្រឲ្យមានឯករាជ្យពីប្រទេសដាណឺម៉ាក ប៉ុន្តែមានជំហរផ្សេងគ្នាក្នុងដំណើរទៅរកការប្រកាសឯករាជ្យ។

ការរាប់សន្លឹកឆ្នោតនៅទីក្រុង Nuuk, Greenland។ REUTERS/Marko Djurica

គណបក្ស Naleraq មានជំហរគាំទ្រការទាមទារឯករាជ្យខ្លាំងជាង ខណៈគណបក្សប្រជាធិបតេយ្យមានជំហរសម្របសម្រួលក្នុងជំហរឯករាជ្យ។

គណបក្ស Egede’s Inuit Ataqatigiit (United Inuit) និងគណបក្ស Siumut ដែលគណបក្សទាំងពីរមានប្រវត្តិគ្រប់គ្រងរដ្ឋបាលកោះនេះក្នុងប៉ុន្មានឆ្នាំចុងក្រោយ ត្រូវបានគេរំពឹងថា ឈ្នះការបោះឆ្នោត ប៉ុន្តែលទ្ធផលបានបង្ហាញផ្សេងពីការរំពឹងទុក។

គណបក្ស៤ក្នុងចំណោមគណបក្សសំខាន់៥ ក្នុងការរត់ប្រណាំងស្វែងរកឯករាជ្យភាព ប៉ុន្តែពួកគេមិនទាន់ដឹងពេលណានិងមធ្យោបាយណានោះទេ។ ដែនដីកោះ Greenland បានស្វែងរកការប្រកាសឯករាជ្យពីដាណឺម៉ាកតាំងពីឆ្នាំ២០០៩ មកម្ល៉េះ ប៉ុន្តែចរន្តរុញច្រានរបស់រដ្ឋបាលដូណាល់ ត្រាំ អាចនឹងផ្លាស់ប្តូរជោគវាសនាកោះនេះក្នុងពេលដ៏ខ្លីខាងមុខ។

កោះ Greenland ដែលស្ថិតក្រោមការគ្រប់គ្រងរដ្ឋបាលរបស់ប្រទេសដាណឺម៉ាកក្នុងតំបន់អឺរ៉ុបខាងជើង បានក្លាយជាទីចាប់អារម្មណ៍របស់ប្រធានាធិបតីអាមេរិកលោក ដូណាល់ ត្រាំ ក្នុងការគ្រប់គ្រងកោះដែលសម្បូរទៅដោយសារ ធាតុរ៉ែ ប៉ុន្តែនាយករដ្ឋមន្ត្រី ដាណឺម៉ាក ធ្លាប់បានបង្ហាញជំហរទន់ភ្លន់ចំពោះរដ្ឋបាល ដូណាល់ ត្រាំ ដោយអះអាងថា កោះនោះមិនមែនសម្រាប់លក់ទេ ហើយ ប្រជាជននៅលើកោះជាអ្នកសម្រេចជោគវាសនារបស់ពួកគេ។

ទោះបីជាយ៉ាងណា មេដឹកនាំមហាអំណាចអឺរ៉ុបខ្លះមានអាល្លឺម៉ង់ជាដើម ធ្លាប់បានបង្ហាញជំហរជំទាស់ចំពោះផែនការអាមេរិក ដោយអះអាងថា នឹងខិតខំការពារដែនដីរបស់អឺរ៉ុប។

កោះដ៏ធំដែលមានប្រជាជនជិត៦ម៉ឹននាក់ត្រូវបានជាប់នៅក្នុងការប្រកួតប្រជែងភូមិសាស្ត្រនយោបាយសម្រាប់ភាពលេចធ្លោនៅតំបន់អាកទិក ជាកន្លែងដែលផ្ទាំងទឹកកករលាយកំពុងធ្វើឱ្យធនធានរបស់វាកាន់តែងាយស្រួល និងបើកផ្លូវដឹកជញ្ជូនថ្មី។ ទាំងរុស្ស៊ី និងចិនបានបង្កើនសកម្មភាពយោធានៅក្នុងតំបន់នោះដែរ។ យោងទីភ្នាក់ងាររ៉យទ័រ។

កោះ Greenland ដែលមានទំហំធំជាងគេបំផុតក្នុងសកលលោក រហូតដល់ជាង២លានគីឡូម៉ែត្រការ៉េ នឹងក្លាយជាជម្លោះក្នុងភូមិសាស្ត្រនយោបាយនៃប្រទេសមហាអំណាចនាពេលខាងមុខ ខណៈដែលប្រទេសនៅតំបន់អឺរ៉ុបក៏នឹងមិនបោះបង់ដែនដីរបស់ខ្លួនទៅឲ្យសហរដ្ឋអាមេរិកដោយងាយៗនោះដែរ៕

ដោយ រ៉ាន់ រើយ