Update: កម្លាំងប៉ាគីស្ថាន​សម្លាប់​ក្រុមសកម្ម​ប្រយុទ្ធ​​១៦នាក់ក្នុងប្រតិបត្តិការសង្គ្រោះចំណាប់ខ្មាំង

កងកម្លាំងសន្តិសុខប៉ាគីស្ថានបានសម្លាប់​ក្រុមសកម្មប្រយុទ្ធ​យ៉ាងហោចណាស់១៦នាក់ក្នុងអំឡុងពេលប្រតិបត្តិការជួយសង្គ្រោះចំណាប់ខ្មាំង បន្ទាប់ពីការវាយប្រហារលើរថភ្លើងនៅក្នុងខេត្ត Balochistan ភាគនិរតីរបស់ប្រទេសកាលពីថ្ងៃអង្គារ។ យោង​ភ្នាក់ងារព័ត៌មាន Xinhua នៅថ្ងៃទី១២ខែមីនានេះ។

តាមសេចក្តីរាយការណ៍​ មានការបាញ់ប្រហារគ្នាយ៉ាងសាហាវ​រវាងកងកម្លាំងសន្តិសុខ និងក្រុម​​សកម្មប្រយុទ្ធ​ដើម្បី​ជួយ​សង្គ្រោះ​ចំណាប់ខ្មាំងដែលជាអ្នកដំណើរនៅក្នុងរថភ្លើង។ កងកម្លាំងសន្តិសុខប៉ាគីស្ថានបានរំដោះចំណាប់ខ្មាំងចំនួន ១០៤​​នាក់ ចេញពីក្រុមភេរវករដោយជោគជ័យ ក្នុងនោះមានបុរស ៥៨នាក់ ស្រី៣១នាក់ និងកុមារ១៥នាក់។ យ៉ាងហោចណាស់​អ្នកដំណើរ១៧នាក់រងរបួស ខណៈកិច្ចខិតខំប្រឹងប្រែងកំពុងបន្តដើម្បីធានាឱ្យមានការដោះលែងអ្នកដំណើរដែលនៅសេសសល់ដោយសុវត្ថិភាព។

គួរបញ្ជាក់ថា កងទ័ពរំដោះ Baloch (BLA) ដែលត្រូវបានចាត់ទុកជាភេរវរករបានវាយប្រហារលើរថភ្លើង Jaffar Express នៅពេលវាធ្វើដំណើរពី Quetta ទៅ Peshawar ដែលមានអ្នកដំណើរពី ៤០០-៤៥០ នាក់ស្ថិត​នៅលើរថភ្លើង​​។

ក្រុមសកម្មប្រយុទ្ធបានធ្វើការបះបោរអស់រយៈពេលជាច្រើនទសវត្ស​រ៍​​​ដើម្បី​ទាម​ទារបំបែកខ្លួន​​និង​ឯករាជ្យ និងបានបើកការវាយប្រហារយ៉ាងសាហាវជាច្រើន​លើក​ ​ដែលជារឿយៗសំដៅទៅលើប៉ុស្តិ៍ប៉ូលិស ខ្សែរថភ្លើង និងផ្លូវហាយវេ។ អាជ្ញាធរប៉ាគីស្ថាន ក៏ដូចជាប្រទេសលោកខាងលិចមួយចំនួន រួមទាំងចក្រភពអង់គ្លេស និងសហរដ្ឋអាមេរិក បានចាត់ទុក BLA ជាអង្គការភេរវកម្ម​​៕

អត្ថបទ៖ ប៊ុន សុភាព