រុស្ស៊ី បោះពាក្យថា លក្ខខណ្ឌបទឈប់បាញ់គឺខ្លួនជាអ្នកកំណត់ មិនមែនសម្រេចដោយអាមេរិកទេ

បន្ទាប់ពីប្រធានាធិបតីអ៊ុយក្រែន វ៉ូឡូឌីមៀរ ហ្សេលេនស្គី ឯកភាពលើសំណើបទឈប់បាញ់ដែលរៀបរៀងដោយទីក្រុងវ៉ាស៊ីនតោន ហើយរដ្ឋមន្ត្រីការបរទេសអាមេរិក Marco Robio ព្រលយពាក្យថា លោកនឹងនាំយកសំណើនេះទៅចរចាជាមួយភាគីរុស្ស៊ីនោះ ស្រាប់តែទីក្រុងមូស្គូ បញ្ចេញប្រតិកម្មភ្លាមៗដោយបញ្ជាក់យ៉ាងច្បាស់ថា រាល់លក្ខខណ្ឌនៃបទឈប់បាញ់គឺកំណត់ដោយរុស្ស៊ី មិនមែនអាមេរិក ជាអ្នកសម្រេចទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Konstantin Kosachev អនុប្រធានសភាជាន់ខ្ពស់រុស្ស៊ី និយាយនៅថ្ងៃពុធទី១២ខែមីនាឆ្នាំ២០២៥ថា «រុស្ស៊ីកំពុងរក្សាសន្ទុះរបស់ខ្លួន ដូច្នេះជំហររបស់យើងប្រហែលខុសគ្នា។ កិច្ចព្រមព្រៀងនិងសម្បទានណាមួយ គឺយើងជាអ្នកធ្វើ មិនមែនអាមេរិកទេ។ 

ការអះអាងបែបនេះត្រូវគេដឹងថា ជាប្រតិកម្មដំបូងពីសំណាក់មន្ត្រីជាន់ខ្ពស់រុស្ស៊ី បន្ទាប់ពីគណៈប្រតិភូអាមេរិក-អ៊ុយក្រែន បញ្ចប់កិច្ចពិភាក្សានៅប្រទេសអារ៉ាប៊ីសាអូឌីត ជាមួយនឹងលទ្ធផលគាប់ប្រសើរ។

ពាក់ព័ន្ធបទឈប់បាញ់នេះដែរ មុននេះប្រធានាធិបតីអាមេរិក ដូណាល់ ត្រាំ បានបញ្ជាក់ហើយថា លោកនឹងនិយាយជាមួយប្រធានាធិបតីរុស្ស៊ី វ្ល៉ាឌីមៀរ ពូទីន នៅចុងសប្តាហ៍នេះ ជាមួយក្តីសង្ឃឹមថា ទីក្រុងមូស្គូ ក៏នឹងបើកចិត្តទទួលបទឈប់បាញ់ដូចគ្នា។ 

លោកត្រាំ ថែមទាំងបញ្ជាក់ទៀតផងថា រុស្ស៊ីស្រួលនិយាយជាងអ៊ុយក្រែនទេ ក្នុងការឈានដល់កិច្ចព្រមព្រៀងសន្តិភាព។

ថ្លែងនៅឯសមាគម Business Roundtable ក្នុងទីក្រុងវ៉ាស៊ីនតោន នៅថ្ងៃពុធទី១២ខែមីនាឆ្នាំ២០២៥ លោកត្រាំ បញ្ជាក់ថា បើនិយាយពីការហៅភាគីមកចុះកិច្ចព្រមព្រៀងសន្តិភាពនោះ លោកមើលឃើញថា រុស្ស៊ីស្រួលនិយាយជាងអ៊ុយក្រែនទៅទៀត។ ទីក្រុងមូស្គូច្បាស់ជាយល់ស្របលើបទឈប់បាញ់រយៈពេល៣០ថ្ងៃនោះ ជាក់ជាមិនខាន៕

អត្ថបទ៖ សុខ សុវណ្ណ

ចុចអាន៖ ទាក់ទងបទឈប់បាញ់, ត្រាំ ថា រុស្ស៊ី ស្រួលនិយាយជាង អ៊ុយក្រែន ទេ