ត្រាំ ថា នឹងកាត់យក ​Greenland​ ហើយ ​ណាតូ​ ប្រហែល​ចូលជួយ​

ឆ្លើយសំណួរអ្នកកាសែតអំពីទស្សនៈវិស័យ​ក្នុងការកាត់យកកោះ Greenland, ប្រធានាធិបតីអាមេរិក ​ដូណាល់​ ត្រាំ​ និយាយកាលពីថ្ងៃព្រហស្បតិ៍ទី១៣ខែមីនាឆ្នាំ២០២៥ថា៖​«ខ្ញុំគិតថា ថ្ងៃណាមួយ រឿងនេះនឹងកើតឡើង។ យើងត្រូវការ Greenland សម្រាប់សន្តិសុខអន្តរជាតិ ហើយ​រឿងនេះក៏អាចមានណាតូ ចូលជួយដែរ»។ នេះបើតាមការចុះផ្សាយរបស់ Politico។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ត្រាំ បានលើកឡើងបែបនេះក្នុងអំឡុងជំនួបជាមួយប្រមុខអង្គការណាតូ លោក ម៉ាក រូតេ នៅឯសេតវិមាន ដោយបញ្ជាក់ថា លោកចង់ឲ្យសម្ព័ន្ថភាពយោធាដឹកនាំដោយអាមេរិកមួយនេះ ជួយទីក្រុងវ៉ាស៊ីនតោន ដើម្បីកាត់យកទឹកដី Greenland។

ពាក់ព័ន្ធការលើកឡើងអំពីសន្តិសុខ Greenland, លោក រូតេ គាំទ្រសម្តីលោក ត្រាំ ថាគាត់និយាយត្រូវ ដោយសារបច្ចុប្បន្នរុស្ស៊ីនិងចិន ក៏កំពុងតែបង្ហាញសាច់ដុំនៅតំបន់នោះដែរ ហើយនេះជាភាពចាំបាច់ដែលប្រជាជាតិនៅលោកខាងលិច ត្រូវរួមដៃគ្នាធ្វើការក្រោមការដឹកនាំរបស់អាមេរិក។ 

ទោះបីជាយ៉ាងណាក៏ដោយ លោករូតេ បានបញ្ជាក់ថា លោកមិនចង់យកណាតូចូលលូកលាន់ក្នុងរឿងនេះឡើយ ទុកឲ្យលោក ត្រាំ ធ្វើការដោយខ្លួនឯងវិញ។

Greenland គឺជាដែនដីស្វយ័តរបស់ដាណឺម៉ាក ដែលស្ថិតក្រោមការគ្រប់គ្រងរបស់ប្រទេសនេះអស់រយៈពេលជាង៦០០ឆ្នាំមកហើយ ខណៈបច្ចុប្បន្ន វា​មាន​ប្រជាជន​​​​​​ប្រមាណ​​៥៦ ០០០​នាក់។ 

Greenland ស្ថិតនៅចន្លោះមហាសមុទ្រអាត្លង់ទិកនិងអាកទិក ត្រូវ​បាន​គ្របដណ្ដប់ដោយផ្ទាំងទឹកកក​ចំនួន​ ៨០% និងជាជម្រករបស់មូលដ្ឋានយោធាអាមេរិកដ៏ធំមួយ។ កោះដ៏ធំបំផុតរបស់ពិភពលោក​មួយ​នេះ មានរដ្ឋធានីនៅជិតទីក្រុងញូវយ៉ក ជាងរដ្ឋធានីកូប៉ិនហាករបស់ដាណឺម៉ាក ហើយ​សម្បូរ​​ធនធានរ៉ែ ប្រេង និងឧស្ម័នធម្មជាតិ ប៉ុន្តែការអភិវឌ្ឍ​មានសភាពយឺតយ៉ាវ ដែលធ្វើឲ្យសេដ្ឋកិច្ចរបស់ខ្លួន​ត្រូវ​ពឹងផ្អែកលើការនេសាទ និងការឧបត្ថម្ភធនប្រចាំឆ្នាំពីប្រទេសដាណឺម៉ាក។

នាយករដ្ឋមន្ត្រី​ ដាណឺម៉ាក​ អ្នកស្រី Mette Frederiksen អះអាងរួចហើយថា ​កោះនោះ​មិនមែនសម្រាប់លក់ទេ ហើយ ប្រជាជន​នៅលើ​កោះ​ជាអ្នកសម្រេចជោគវាសនា​របស់ពួកគេ​៕

អត្ថបទ៖ សុខ សុវណ្ណ

ចុចអាន៖ ​ ប្រជាជន Greenland​ បោះឆ្នោត​ប្តូរ​មេដឹកនាំ ​ក្នុងកាលៈទេសៈផ្លាស់ប្តូរ​​​​​អនាគត​កោះ​នេះ​​